لقاء في القطر الجزء الثاني

فتنفعل عليهم عواطف وتغتاظ لقربهما الشديد .. قائلةً ..

عواطف : ما تخلصونا بقى حنتسمم واللا حتقضوها حب فى بعض ..

نظر حاتم إلى والدته فى يأس وغيظ .. ثم يحول نظره إلى والده الذى خجل من طريقة زوجته فى الحديث هكذا .. فقال الأب ..

فاروق : حناكل طبعا ثم سيبيهم يحبوا فى بعض .. دى أحلى ايامهم دلوقتى ..
عواطف : لا والله .. طب خلصونى عايزة ارجع البيت ..
آية : ليه ياطنط مش حتقضى معانا اليوم ؟
عواطف : اقضى ايه ؟ لا طبعا انا حاكل واروح عشان تعبانة ..
آية ( فى حزن ) : سلامتك ياطنط ..
عواطف : الله يسلمك يختى ..
حاتم ( فى حدة ) : ما خلاص بقى ياماما ..
عواطف ( فى انفعال ) : انت بتزعقلى ياحاتم ..
حاتم ( محاولاً مسك أعصابه ) : ياماما لو سمحتى متبوظيش علينا اليوم .. كفاية كدة ..
عواطف ( فى انفعالٍ أكبر ) : انا ببوظ عليكو اليوم ياسى حاتم .. طيب ابقى شوف بعد كدة مين حيخرج معاك .. انا حروح .. سلام ..

تأخذ عواطف حقيبتها وتغادر المكان سريعاً .. ويقوم فاروق للحاق بها ولكن قبل مغادرته نظر إلى آية قائلاً ..

فاروق : ولا يهمك .. عيشى حياتك واخرجى براحتك .. بكرة ربنا يهديها ..

يرحل فاروق عن المكان للحاق بزوجته وقد أعدَّ لها من الكلمات ما لذ وطاب .. وكان حاتم صامتاً لم يستطع فعل شيئاً لآية التى عندما نظر إليها وجدها تدمع فى صمت ..

رواية لقاء في القطار.

بعد رحيل الأب والأم من النادى نظر حاتم إلى آية ليجدها دامعة العينين وصامتة .. فمسك يديها محاولاً مصالحتها عما فعلته والدته ..

حاتم : حبيبتى .. انا بجد مش عارف اقولك ايه .. انا بجد آسف ..
آية : وانت ذنبك ايه ياحاتم .. بس طنط مش بتحبنى .. تفتكر حنقدر نستمر مع بعض وهى مش بتحبنى ومش عيزانى ..
حاتم : ياحبيبتى هى بس خايفة تاخدينى منها ومتشوفنيش تانى .. زيها زى اى ام يعنى .. وفاهمة ان بطريقتها دى ومعاملتها دى حتخلينى جنبها بس صدقينى احنا بس نتجوز ونطمنها من ناحية الموضوع ده ..
آية : وانا يعنى حفضل فى القهرة دى لحد ما نتجوز ياحاتم .. لازم يكون فى حل ولإما تحبنى لإما ……….
حاتم : لإما ايه ياآية ؟
آية : مش عارفة ياحاتم .. انا خوفت منها وقلقت على مستقبلى معاك ..
حاتم : لا ياحبيبتى انا عايزك متقلقيش ولا تخافى والله هى طيبة اوى بس معلش بقى حما .. كلها ايام وان شاء الله تتعود عليكى وتحبك .. استحملى ياآية عشان خاطرى ..
آية : حاضر ياحاتم .. عشان خاطرك حستحمل ..
حاتم : طب فين ابتسامتك الحلوة عشان نتغدى بقى .. انا جوعت اووووووووى ..