نغم بقلم لبنى دراز الجزء الثالث

غالية:: بغيظ متدارى .. ايه ده بجد معلش يا حبيبى المهم تكون استفدت

طارق:: و هو بيقوم يطلع اوضته .. باس إيدها و راسها أستفدت كتير يا حبيبتى اسمحيلنا نطلع نرتاح شوية

غالية:: اطلع يا حبيبى و خد راحتك .. و بعد ما طلع طارق هو و نغم .. بنرفزة لـ نفسها بقى كدا يا طارق لسة بتكدب عليا حتى بعد ما رجعت مااااشى يا طارق براحتك خليك ماشى ورا الهانم بتاعتك لما نشوف أخرتها

وليد:: داخل الڤيلا و شايفها متنرفزة .. مالك يا غالية مين منرفزك و معصبك بالشكل ده

غالية:: هيكون مين يعنى غير أخوك و الجربوعة بتاعته

وليد:: مالهم بس يا غوغو عملولك ايه

غالية:: بغيظ أخوك راجع من السفر بعد شهر و لسه بيكدب عليا برضوا و مصمم انه كان فـ رحلة علمية تبع الجامعة

وليد:: بدهشة .. ايه ده هو طارق رجع ؟!

غالية:: بعصبية انا بقولك ايييه و انت فـ اييييه .. أه رجع بسلامته و شكله تعبان و لما سألته قال انهم ماكانوش بيناموا قال ايه من الجامعة للأماكن المعمارية اللى بيتعلموا منها أخر التطورات بذمتك ده كلام يدخل العقل

وليد:: و فيها ايه بس يا أمى كلامه منطقى هو دكتور جامعة و طبيعى يكون رايح يتعلم أخر التطورات زى ما قال

غالية:: ولييييد ما تعصبنيش أكتر ما انا متعصبة انت فاهم

وليد:: حاضر يا قلب وليد سلامتك من العصبية يا غوغو .. هى شيرين فين مش شايفها يعنى

غالية:: شيرين فـ اوضتها و الولاد كمان فـ اوضتهم

وليد:: خلاص ياقلبى انا هطلع أخد شاور و أغيّر هدومى و أنزل انا و شيرين و الولاد عشان نتعشى سوا

غالية:: خلاص يا حبيبى أطلع و انا هقولهم يحضروا العشى لغاية ما تنزل و خبط ع أخوك عشان ينزل معاك

وليد:: حاضر يا حبيبتى

و بالفعل طلع وليد عشان يغير هدومه و ينزل هو و شيرين و كمان طارق ونغم و ولادهم

_______________________

فـ الجامعة

بعد مرور سنتين اللى حصل فيهم طارق بنى الأرض بنفسه و معاه أحمد لـ نغم و طلعها برج كبير جهز لها شركتها و عمل ورق الشراكة مع أحمد عشان يقدر يدعم نغم زى ما وصاه طارق .. نغم تفوقت زى عوايدها كل سنة بأمتياز و قبل حفلة التخرج عرفت بالصدفة بمرض طارق رغم انه حاول بكل الطرق يخبى عليها .. أحمد كان مع طارق بأستمرار فـ رحلة علاجه ما كانش بيسيبه و لو كان الامر بيتطلب انه يتحجز فـ المستشفى كان بيروح معاه و يقولوا انهم مسافرين تبع الجامعة و اول ما يتحسن يرجع كأنه كان مسافر فعلا .. غالية طبعا زى ما هى بل زادت جبروت بس قصاد طارق ملاك بريء و من وراه كالعادة مبهدلة نغم و أخيرا النهاردة حفلة تخرج نغم و حياة