نغم بقلم لبنى دراز الجزء الثالث
أحمد:: لأ يا حبيبى انا راشق .. فيها لا أخفيها
طارق:: خلاص اسكت و يلا قوم عشان ندهوا ع رقم الرحلة بتاعتنا
و بالفعل ركبوا الطيارة و بعد كام ساعة وصلوا ألمانيا و خرجوا من المطار ركبوا تاكسي وصلوا بيه الاوتيل اللى هينزلوا فيه و بعد ما أرتاحوا كل واحد فـ اوضته
طارق:: اتصل بـ أحمد .. الووو
أحمد:: الوهين تلاتة يا خويا خير
طارق:: عايزك تنزل تقابلنى فـ الكافيه تحت بس لوحدك
أحمد:: حاضر بس ليه
طارق:: أنزل يا أحمد و هتعرف كل حاجة
أحمد:: حاضر نازل و فعلا نزل بسرعة لـ طارق و اول ما شافه .. خير يا طارق قلقتنى فى إيه
طارق:: أقعد يا أحمد و أفهمنى كويس أرجوك
أحمد:: بقلق .. مالك يا طارق فى ايه
طارق:: بوجع .. أنا عندى لوكيميا
أحمد:: بصدمة .. أيه ؟! أيه اللى أنت بتقوله ده
طارق:: غمض عينه و بوجع أكبر .. زى ما سمعت يا أحمد انا عندى كانسر فـ الدم و للاسف الدكاترة فـ مصر قالوا الحالة متأخرة
أحمد:: مصدوم من اللى بيسمعه و بدموع قام و شد طارق لـ حضنه .. مافيش حاجة اسمها الحالة متأخرة دول أكيد مابيفهموش و بعدين أنت عرفت منين أصلا الكلام ده
طارق:: خرج من حضن أحمد .. انا بقالى شهرين تعبان يا أحمد حاسس دايما بإرهاق و همدان فـ جسمى و نزيف مناخيرى المستمر و أعراض تانية كتير و لما كشفت و عملت التحاليل أتأكد شك الدكتور
أحمد:: بقولك أيه انا الكلام ده مش داخل دماغى أحنا طالما هنا انت تكشف من جديد و تتأكد ان مافيش حاجة خالص عندك انت فاهم
طارق:: بتنهيدة وجع .. هو ده اللى ناوى عليه أصلا عشان كدا قولتلك تيجى معايا .. انا تواصلت مع أكبر دكاترة متخصصين فـ اللوكيميا هنا و هبتدى رحلة الكشف و العلاج من بكرة ان شاء الله و عايز منك تقول لـ حياة بالظبط نفس الكلام اللى هقوله لـ نغم و هو اننا هنستغل الفرصة و نروح الجامعة الصبح نقابل أصدقائنا هنا و نشوف ايه التطورات الجديدة فـ مجالنا و وقت ما نكون فـ المستشفى يبقوا فاكرين اننا فـ الجامعة و لما نخلّص و نرجع نخرج و نتفسح
أحمد:: بوجع .. حاضر يا طارق
طارق:: أرجوك يا أحمد خليك طبيعى مش عايز حياة و نغم ياخدوا بالهم من حاجة
و بالفعل أحمد حاول يبان طبيعى رغم وجعه ع صاحب عمره و من تانى يوم أبتدت رحلته مع الدكاترة عشان العلاج
نغم بقلم_____________لبنى دراز
