نغم بقلم لبنى دراز الجزء الثاني

شيرين:: وليييييد متأكد انك مش مخبي عليا حاجة ؟؟

وليد:: بتوتر .. هخبي ايه انا يعنى ها قال مخبي قال ده اللى كان ناقص كمان

شيرين:: ولييييد أحنا مش عِشرة يومين يا حبيبى يعنى بفهمك من نظرة عينيك فـ هات من الأخر و قول ايه اللى مخبيه

وليد:: بنفس توتره .. هقولك بس ما تقوليش لـ غالية يا شيرين عشان خاطرى

شيرين:: بقلق .. خير يا حبيبى قلقتنى

وليد:: و هو بيتلفت حواليه خايف يكون حد بيسمعه و لا تكون غالية نازلة من اوضتها .. أنا كنت عارف أن طارق متجوز نغم من 3 شهور

شيرين:: بصدمة .. نعععم !!

وليد:: وطى صوتك أحسن حد يسمعك

شيرين:: بصوت واطى .. انت كنت عارف و ساكت يا وليد و ماقولتش لـ غالية

وليد:: و مش بس كدا انا كمان شاهد ع عقد الجواز

شيرين:: حطت إيدها ع بؤقها من كتر الصدمة .. دى كارثة ماما غالية لو عرفت الكلام ده هتروح فيها .. أنت يا وليد تعمل كدا انت؟! بدل ما تعقّل أخوك و تعرّفه ان اللى عمله ده غلط .. أنت اللى تروح معاه و تجوزه من ورا غالية

وليد:: بقلة حيلة .. أعمل ايه يا شيرين هو طلب منى أقف جنبه و اساعده يتجوز البنت اللي بيحبها و لما رفضت فـ الاول قالى بصريح العبارة كدا هتقف معايا و لا أشوف حد تانى
أضطريت أوافق ع الاقل أعرف البنت دى حكايتها ايه بالظبط

شيرين:: و أيه حكايتها بقى

وليد:: هى بصراحة بنت أخلاقها عالية فعلا و هادية جدا و اللى عرفته انها يتيمة أب و أم و مالهاش حد غير واحد قريب باباها هو اللى كتب كتابها

شيرين:: و طارق عرفها ازاى

وليد:: طالبة عنده فـ الكلية .. ما هى دى البنت اللى وصانى أشغلها فـ الشركة

شيرين:: اممممم أفتكرت .. و بعدين

وليد:: و لا قابلين من وقت لما اشتغلت فـ الشركة لاحظت ان طارق موجود بأستمرار بس ماخدتش فـ بالى و بعد كدا بدأت ألاحظ انه بيهتم بيها بس قولت جايز لانها طالبة عنده و لا حاجة .. لغاية ما جه فـ يوم و عرفنى انه هيكتب كتابه عليها بعد ساعتين و لازم أكون معاه

شيرين:: سكتت شوية بتفكير .. بس لحظة هو ازاى متجوزها من 3 شهور و ماكانش فى اى تغير ملحوظ عليه فـ تصرفاته كان طبيعى جدا و مواعيده زى ما هى ما أتغيرش فيها حاجة بالعكس يمكن الاول كان بيروح شقته كتير يبات فيها انما دلوقتي انا ملاحظة انه بقاله كتير ماراحش يبات فـ الشقة غير أمبارح بس .. يبقى ازاى بقى