نغم بقلم لبنى دراز الجزء الثاني

نغم:: بتوتر .. احنا وصلنا ؟

طارق:: وهو بيفتح لها باب العربية عشان تنزل .. هز دماغه بأبتسامة تؤتؤ لسة بس هنشترى حاجة من هنا الأول

نغم:: نزلت من العربية و شافت طارق مادد لها إيده مدت أيدها هى كمان وساكتة بس جواها اول مرة تحس بالأمان اللى كانت محرومة منه معقول ايه الراحة دى و الدفى ده يااااااااه قد ايه انا كنت مفتقدة كل ده

طارق:: عينيه عليها و هى واقفة ساكتة .. نغم . نغغغمم ايه روحتى فين

نغم:: فاقت من شرودها .. ها كنت بتقول حاجة

طارق:: بقول يلا نمشى .. و بالفعل مشيّت معاه لغاية ما وصل عند محل مجوهرات .. يلا أدخلى

نغم:: بصت له و بتشاور ع المحل .. هنا؟

طارق:: اه هندخل هنا مستغربة ليه .. يلا أدخلى

نغم:: حاضر

طارق:: دخل المحل .. مساء الخير يا اشرف

أشرف صاحب المحل:: مساء الخير يا دكتور أخيرا شرفتنا بنفسك

طارق:: هتشوفنى كتير بعد كدا

أشرف:: بسعادة .. يبقى شكلك ناويت تفرح غالية هانم و تتجوز

طارق:: وعينيه ع نغم .. دى حقيقة يا أشرف و يلا بقى بطل رغى و هات أحدث تشكيلة أطقم سوليتير و انت ساكت

نغم:: مصدومة من شكل المحل و كمان من كلام طارق مع صاحب المحل و ساكتة كالعادة

أشرف:: أتفضل يا دكتور دى حاجة بيور لسة واصلة و ما شافتهاش عين لسة

طارق:: شكرا يا اشرف و لـ نغم يلا أختارى طقم منهم بعد ما فتح لها 5 علب

نغم:: بتوتر و باين ع وشها الصدمة من شكل الـ 5 أطقم .. أ أ أنا ؟!

طارق:: بأبتسامة صافية .. أيوا انتى يا نغم بيتهيألى مافيش حد تانى معانا

نغم:: ع نفس وضعها و بتهز دماغها لأ لأ مش عايزة حاجة شكرا

طارق:: نغم عشان خاطرى ما تتعبنيش معاكى و أختارى طقم يلا

نغم:: بخوف .. لأ مش عايزة .. انا مش عايزة

أشرف:: لـ طارق واضح ان الهانم مش عاجباها الحاجة يا دكتور و محرجة تقول

طارق:: خلاص يا اشرف لو عندك حاجة تانى هاتها

نغم:: بسرعة لأ ما تجيبش حاجة لو سمحت

أشرف:: أمرك يا هانم

طارق:: بقلق من حالة الصدمة اللى فيها نغم .. مالك يا نغم فيكى ايه طمنينى

نغم:: مافيش

طارق:: طيب يلا أختارى طقم من دول و لا اختارلك أنا

نغم:: انت ليه مصمم ع السوليتير ده .. ده شكله غالى أوى

طارق:: طيب لو مش عايزة السوليتير أختارى انتى حاجة ع زوقك

نغم:: بموافقة .. حاضر و لفت فـ المحل و شافت سلسلة دهب رقيقة مكتوب اسمها ع شكل قلب و قالت لـ أشرف عايزة دى لو سمحت