نغم بقلم لبنى دراز الجزء الأخير
نهى:: برفعة حاجب .. ده ايه أصله ده أنا مش فاهمة
معتز:: بعاكسك يا نهى عادى ايه الجديد يعنى
نهى:: بغيظ .. الجديد انى مش فاهمة ايه عسل منتهى ده
معتز:: و هو سايبها و داخل مكتب نغم و بلا مبالاة .. عادى يا نهى يعنى عسل صلاحيته منتهية ما تصدعيناش بقى
نهى:: بغيظ .. مااااشى يا معتز و الله لا أشتكيك لـ باشمهندس أحمد و باشمهندسة نغم بس
معتز:: بعد ما دخل المكتب و الله ما بتفرق يا نونو أشتكينى ياكش تشتكينى فـ هيئة الأمم المتحدة بذات نفسيها انا عيد ميلادى النهاردة و ماحدش هيقدر يزعلنى و معايا نونتى
نغم::بأبتسامة .. تعالى يا مصيبة انت مالك بيها عملتلها ايه
معتز:: الله هو انا كلمتها .. أنتى شوفتينى كلمتها .. شالله تنطس فـ نواضرها لو كنت كلمتها
نغم:: بضحك .. بس بس خلاص أسكت انا غلطانة انى سألتك
معتز:: بصى بقى و من الأخر كدا انا جاى أخد الهدية .. ها جبتيلى هدية ايه بقى يا نونا و لا نسيتينى ؟
نغم:: بأبتسامة حزينة .. أنا عمري نسيتكم يا ميزو
معتز:: اممممم طالما جمعتى كدا تبقى بداية غير مبشرة بالمرة
نغم:: و بعدين معاك عامل صداع ليه .. عايز ايه انا مش فاضيالك
معتز:: امممممم ده سؤال وجيييه .. عايز ايه يا واد يا ميزو عايز ايه يا واد يا باشمهندس ميزو .. اه عايز القمر يتعطف و يتكرم و ينزل من ع عرشه و يشرفنى فـ حفلة عيد ميلادى المتواضعة دى قولتى ايه
نغم:: قولت لأ
معتز:: بتذمر .. لأ ليه بقى
نغم:: لأ و خلاص .. لأ من غير سبب
معتز:: أنتى مش بتحبينى يا نغم ع فكرة و انا زعلان منك
نغم:: قامت من ورا مكتبها و قربت من معتز .. بذمتك فى أم تكره أبنها يا ميزو ؟
معتز:: بيهز دماغه .. تؤتؤ
نغم:: انت عارف كويس أنا بحبك قد ايه .. و بحزن بس أنت عارف برضوا يا حبيبى اليوم ده بيبقى صعب عليا ازاى
معتز:: عارف يا حبيبتى بس تعالى النهاردة بس عشان خاطرى .. أصحابى عايزين يتعرفوا عليكى
نغم:: عشان خاطرى انت يا ميزو .. أنا عايزاك تكون مبسوط و فرحان مع أصحابك و أبقى أتعرف عليهم مرة تانية
معتز:: بس انا هكون مبسوط أكتر بوجودك
نغم:: أمشى يا ميزو يلا روح حضر نفسك لـ حفلتك و سيبنى أخلص شغلى ما تصدعنيش و فتحت درج مكتبها و قدمتله ظرف .. أتفضل يا حبيبى كل سنة و انت طيب و عقبال 100 سنة
معتز:: باسها فـ خدها و انتى طيبة يا قلب حبيبك بس فيه ايه الظرف ده بقى
