نغم بقلم لبنى دراز الجزء الأول

سامى:: مافيش حل غير اننا نراقب نغم و نعرف جوزها ده يبقى مين بالظبط الاول و بعدين نفكر هنعمل معاهم ايه

وبالفعل قرروا يراقبوا نغم فـ كل مكان لغاية ما يعرفوا كل حاجة

______________________

فـ الحارة نفس الوقت

رجعت نغم مع طارق و حياة ع بيتها فـ الحارة عشان تنقل حاجتها هى و حياة و يروحوا يعيشوا فـ شقة طارق لغاية ما تقرر موضوع الجواز و هما طالعين ع السلم

أم ابراهيم:: قابلتهم ع باب شقتها .. أزيكم يا بنات ايه اللى رجعكم بدرى كدا النهاردة

حياة:: بغيظ و بسرعة .. و انتى مالك يا ولية يا جلدة انتى رجعنا بدرى و لا اتأخرنا كنتى وليّة أمرنا ياختى و أحنا ما نعرفش

نغم:: بنرفزة و بعدين يا حياة انتى مش هتبطلى بقى عمايلك دى .. ولـ أم ابراهيم معلش يا خالتى انتى عارفة حياة ماتزعليش منها

ام ابراهيم:: لـ نغم و النبى يا نغم ما مصبرنى عليها غير انها اختك صحيح البطن قلّابة

حياة:: بغيظ يا ولية انتى كل ما تشوفينا تقولى البطن قلّابة ..البطن قلّابة .. الهى يقلّبوكى فـ خلاط خرسانة مع الرملة و الاسمنت و أبنى عليكى المشروع بتاعى يا بعيدة

طارق:: بضحك .. لـ حياة هو انتى ع طول كدا لسانك فالت ما بيسكتش

حياة:: لا مؤاخذة يا جوز اختى اتفضل أطلع انت و ماتشغلش بالك .. دى عالم ما ينفعش معاهم غير اللسان الفالت و انا لها

أم ابراهيم:: لـ حياة و ده مين ده بقى ان شاء الله اللى هيطلع يا حياة و طالع فين و انتوا بنتين لوحديكم

حياة:: بغيظ .. جرا ايه يا ولية يا حشرية هو انتى مش سامعانى بقول يا جوز أختى اييييه تحبى تشوفى القسيمة ؟؟

نغم:: بهمس لـ نفسها الله يـ ـخـ ـربيتك يا حياة استر يارب

طارق:: سمعها .. ما تخافيش يا نغم و لـ حياة يلا يا مجنونة زمان ماما قلقانة علينا

حياة:: حاضر يا أبيه و لـ ام ابراهيم ما تزغرطى يا ولية يا جلدة انتى و عبى الحارة زغاريط خلى الجيران تعرف .. نغم اتجوزت دكتور كبير فـ الجامعة و هنروح نعيش معاه فـ الفيلا و نسيب حارتكم المعفنة دى و برّقت لـ ام ابراهيم اوى .. بقولك زغرطى يا ولية انتى ما بتزغرطيش ليييه

أم ابراهيم:: بجد يا نغم الف مبروك يا حبيبتى لولولولولولولولولى

حياة:: أيوا كدا ناس ما تجيش غير بالعين الصفرا

طارق:: بضحك .. هى مش كانت حمرا بيتهيألى و لا غيروها ههههههههههههه