الجزء الثاني بقلم ندى الزايد

زين وعلي وليلي بصو لبعض واتنهدو

بارتياح أو يمكن دا طمنهم انهم كانو قلقانين زيادة عن اللزوم نغم حست بالتوتر فحبت تهدي الدنيا فغيرت الموضوع

.. محدش ناوي يطمن علي زين الراجل الغلبان اللي فضل سهران هنا طول الليل ومرضيش يروح أبدا

قالت اخر كلمه وهي بتغمز لاختها بصت غنوة لزين وكأنها بتشكره بعنيها وكل االي شاغلها ليه بيعمل كل دا عشانها معقول حبها في الفترة البسيطة دي! …..

سابهم زين لوحدهم وخرج يطمن من الدكتور علي حالتها اللي قاله انها تقدر تخرج معاهم بس بعد ما يعملو شويه اشعة وتحاليل يطمنو بيهم ولازملها راحة تامة ومش أقل من شهر عشان تقدر تفك الجبس وترجع تتحرك تاني …..

زين طلب كرسي مخصوص ليها واستنو معاها لحد ما اطمنو عليها واتاكدو انها كويسة وخدوها معاهم وقرروا يرجعو البيت وقتها الكل كان في استقبالهم جدها

.. حمد الله علي السلامة يا بنتي انخلع جلبي عليكي

.. معلش ياجدو حقك عليا أنا كويسة اطمن

.. نورتي البيت يا نور عيني علي عيني والله يا بنتي اني مجتلكيش كنت هتجنن واشوفك واطمن

الكل سلم علي غنوة واطمن عليها تحت نظرات صفاء اللي كلها حقد وشماته قربت وهي راسمه ابتسامه علي وشها

.. حمد الله علي السلامة يا مرات ولدي ابجي خلي بالك مش كل مرة هتعدي علي خير يا بنتي

الكل كان بيبص لبعضه بسبب حنيتها المفاجأة وغنوة شدت نغم عليها وسألتها بهمس

.. هي دي مرات عمك ولا أنا الخبطة أثرت عليا ولا ايه

.. والله باينها هي ولا بدلوها ولا ايه

.. كيفك يا ولدي اتوحشتك من امبارح وانت غايب عني

نزل زين ايدها بهدوء من غير ما يبصلها

.. كويس يا اما الحمد لله مروة جهزتي الوكل اللي جلتلك عليه لغنوة

.. أيوة يا خوي وعملته بيدي كيف ما طلبت تمام يارب وكلي يعجب غنوة بس

ابتسمتلها غنوة بحب ..وقاطعتهم صفاء

.. ما لازم يعجبها دا انا بنتي أشطر واحدة في الدنيا مش خايبة زي باجي البنات

مع اخر جملة كانت بتبص لليلي بابتسامة سخرية وساعتها همست غنوة لنفسها

.. لا طلعت هي متبدلتش ولا حاجة

سمعتها نغم وحاولت تداري ضحكها وهي بتقول

.. يا بابا هنطلع غنوة السلالم دي كلها ازاي