سجينة الماضي الجزء الاول
الفصل الاول
عاشت حياتها مقيدة بقيود الماضي وربطت نفسها بسلاسل احزانه فلم تتمتع بحياتها ولم تشعر بحلو ايامها لان مرارة الماضي مازالت عالقة في حلق ذكرياتها فشبح الماضي مازال يطاردها ولم تستطيع التخلص منه فعاشت حياتها سجينة الماضي
……………
في احد مدن الصعيد نجد بيت كبير اقل مايقال عنه انه قصر هو بيت عائلة الجبالي داخل القصر وتحديدا في غرفة الطعام تجلس السيدة فيروز (٥٠سنة مازال واضح عليها جمالها رغم سنوات عمرها ارملة طيبة حنونة لكنها دائما حزينة لسبب مهم)تنتظر نزول ابنائها كي يفطروا معا مثل كل يوم سرحت قليلا في زوجها فهو لم يكن زوجا فقط بل كان أخ وأب لها كان سندها في محنتها لم يمل منها لم يقل حبها في قلبه بل كان يزيد رغم انها لم تحبه من البداية ولم توفيه حقه كان الماضي حاجزا بينها وبينه رغم محاولاته كي تنسى وتبدأ من جديد قالت لنفسها..سامحني يايحيى سامحني اني مقدرتش اوفيك حقك واني ماحبيتكش من اول يوم شوفتك فيه بس انا حبيتك اوي فوق ما تتصور ايوة حبيتك بعد ماضيعت سنين عرفت قيمة حبك ليا كان نفسي اعيش معاك اكتر واعبرلك عن حبي ليك واعوضك عن السنين اللي ضاعت في معاملتي الباردة خالية المشاعر ليه اول ما حبيتك تروح مني ليه اول ماقلبي اتحرر من سجنه تروح وتسبني كان نفسي الثلاث سنين اللي عشناهم واحنا بنحب بعض يكون عشرة عشرين مية ونزلت دموعها وتذكرت سبب هذا كله وقالت..منك لله ياعمر انت السبب انا عمري ماهسامحك فاقت من شرودها على صوت ابنها يوسف(شاب عمره٣٠ سنة عيونه عسلية وشعره اسود جسمه رياضي وطويل ضابط شخصيته قوية حنون جدا على امه واخته ويحب ابنة عمه رودينا )صباح الخير يا ست الكل وقبل رأسها
انتبهت لنفسها ودموعها التي تبلل خديها بلا توقف وحاولت ان تمسحها سريعا وقالت..صباح الخير يا حبيبي
يوسف بحزن على والدته فهي كل يوم على نفس الحال..ياامي بابا اتوفى من عشرين سنة وانتي كل يوم حزنك بيزيد عليه واقترب من كرسي ابيه(على رأس الطاولة)
فيروز..لأ يايوسف كرسي يحيى لأ
جلس مقابل لها وقال..لدرجة دي كنتي بتحبيه حتى كرسيه مش راضية اني اقعد مكانه
فيروز ..مفيش حد يأخد مكانه
يوسف.. انا اسف مش هتتكرر تاني بس في واحد يلاقي مراته بتحبه كدا ويموت ويسبها
ابتسمت فيروز بحزن..يارتني انا اللي موت مش هو
يوسف اراد الكلام لكن قاطعته ندى(فتاة جميلة عمرها ٢٤سنة عيونها عسلية جسمها متناسق محجبة دكتورة تحب ياسين صديق اخوها )بعد الشر عليكي ياماما ليه بتقولي كدا
يوسف..طب قولي صباح الخير الاول
اقتربت من والدتها وقبلتها على وجنتها ..صباح الفل ياست الكل
فيروز..صباح الورد ياحبيبتي
يوسف بمرح..هو انا مليش نفس ولا انا هوا مش شايفني
ندى اقتربت منه وقبلته هو الاخر..هو انا اقدر دا انت الحب كله
جلست بجانب اخيها وبدأوا في تناول فطورهم قاطعهم صوت الخادمة ..ياسين بيه برا وعايز حضرتك يايوسف بيه
اراد يوسف النهوض من مكانه ويذهب له قاطعته فيروز..روحي خليه يتفضل
ذهبت الخادمة وبعد ثواني دخل ياسين(شاب عمره ٣٠سنة صديق يوسف المقرب من ايام الجامعة ضابط عيونه رمادي شعره بني جسمه رياضي وطويل ويحب ندى )
ياسين..صباح الخير
فيروز..صباح الخير ليه مادخلتش على طول هو انت غريب
ياسين..لا ابدا ياماما بس قولت استأذن الاول
يوسف..ماتنشف ياض ايه ماما دي ماتقول امي
ياسين..وانت مالك انا بحب ادلع عليها وكلمة تانية هقول لها مامي
يوسف بضحك..مامي ياابن ال……قاطعته فيروز..يوسف
يوسف..انا كنت هقول ياأبن الذوات انتو فاهمتوني غلط ونظر ل ياسين الذي مازال واقف في مكانه ..اقعد ياخويا
جلس ياسين مقابل ل ندى وبجانب فيروز
فيروز..ندى قدمي ل ياسين طبق وصبي له الشاي
وقفت ندى عن مكانها وفعلت كما طلبت امها وهي تصب الشاي
همس لها ياسين بحب..وحشتيني اوي
ارتعشت يد ندى وخبطت الفنجان فوقع على بنطلون ياسين الذي قال..اه
ضحك يوسف..هو انتي مش بتعرفي تعملي حاجة اديكي ضيعتي مستقبل الواد اهو
خجلت ندى وقالت بدموع ..انا اسفة اوي والله مش قصدي
ياسين بحب..ولايهمك ما حصلش حاجة
هي تعرف انه يحب ندى وهي ايضا تحبه وهو انسان محترم لا يتعدى حدوده ويخاف على ندى اكثر منهم وهي تعتبره مثل يوسف مالت على اذنه تهمس له ..عشان تحرم تكلمها وهي ماسكة حاجة سخونة
ياسين بصوت واطي..هو القمر سمعني
فيروز..ايوة ياعسل لم نفسك شوية عشان باين اوي عليك كلم يوسف وانجز
ياسين..والله كل مااجي اكلمه الاقيه شبه التور كدا ويقولي مالك ياض في ايه اخاف منه واسكت ما تكلميه انتي عشان خاطري
فيروز..ماينفعش عشان انت صاحبه واخوه لازم تيجي منك عشان يحس انه اقرب واحد ليك وكمان عشان ميفكرش انكم عملتو حاجة من وراه صح
ياسين..صح عندك حق هكلمه انهاردة واحنا راحين القسم
يوسف..في ايه يابني ماسك ودن امي ونازل رغي بتقول لها ايه
ياسين..وانت مالك اكيد مش بفتن عليك
فيروز بضحك..تفتن على ايه يا ياسين انطق
يوسف..في ايه يا امي انتي هتصدقي الواد دا دا انا هقوم اعلقك
ياسين..متقدرش انا في حماية ماما
يوسف..حماية ماما طب قوم ياحنين نمشي هنتأخر وقام وسبقه وخرج من غرفة الطعام الى الصالة
قام ياسين ونظر ل فيروز..انا لو اختفيت اعرفي ان يوسف قتلني
فيروز..ياواد انشف ماأنت بسم الله ماشاء الله طول وعرض زيه بتخاف منه ليه
ياسين..ابنك ايده تقيلة اوي دا معلم علينا كلنا
نظر ل ندى التي تجلس بخجل من فعلتها وتنظر ارضا وقال..انا ماشي
لم ترد عليه
فيروز..ماتردي عليه خليه يمشي لحسن يوسف يجي يضربه
ندى بصوت واطي ناعم..مع السلامة
تاه ياسين في عيونها وصوتها ولم يتحرك من مكانه وندى تاهت في عيونه التي يملاءها الحب
كانت فيروز تتابع فيهم وهي سعيدة جدا من اجل ابنتها لانها تحب رجل يحبها وتريد ان تتوج هذا الحب بالزواج
فاقوا جميعا من شرودهم على صوت يوسف..انت يازفت
انتفضوا جميعا وتحرك ياسين..يالا سلام
فيروز بضحك..اخوكي مربيله الرعب بس كدا بردو تكبي الشاي على الراجل
ندي..والله ياماما مش قصدي هو لما اتكلم خوفت يوسف يسمعه وبعدين هو قليل الادب بيقولي وحشتيني يستاهل
فيروز..كويس ان يوسف ماخدش باله والا كان كب الشاي على دماغك انتي وهو
ندى..انا مش عارفة هو ليه بيخاف كدا من يوسف مايكلمه
فيروز..ياسين مش خايف منه بالمعنى اللي انتي فاهماه هو خايف ان يوسف يفهمه غلط(نظرت لها ندى بعدم فهم )يعني هو خايف ان يوسف يقول انه دخل بيته وبص لأخته وخان ثقته فاهمتي
ندى..ايوة ياماما بس انا من اول ماحسيت بشعور غريب ناحيته واول ماكلمني انا قولت ليكي على طول
فيروز..انا عارفة ياحبيبتي وكمان هو كلمني قبل مايكلمك وانا اللي قولت له يسألك ويقولك بس بردو لازم يكلم يوسف لانه المفروض هو اقرب واحد ليه وكمان هو في مقام ابوكي صح
ندى..صح ياماما عندك حق اقوم اروح المستشفى لحسن تأخرت يالا سلام ياقمر
فيروز..مع السلامة خلي بالك من نفسك وسوقي بشويش
ندى..حاضر ياماما وذهبت
…………..
في السيارة
يوسف بمرح..انت ركبت معايا ليه وخليت عربيتك قدام بيتنا اوعى تكون طمعان تتغدي معنا
ياسين مش عارف يبدأ الموضوع مع يوسف ويرتب الكلام في رأسه
يوسف..مالك يابني في ايه سرحان في ايه
ياسين..اصل بصراحة عايزك في موضوع مهم ومش عارف ابدأ منين
نظر له يوسف نظرة خاطفة فهو يقود السيارة وقال..موضوع ايه ابدأ من اي حتة مالك شكلك مش على بعضك في ايه انطق
ياسين..انا بصراحة عايز…..
قاطعه صوت هاتفه نظر فيه كان رقم والده
رد ياسين..السلام عليكم
والده..وعليكم السلام هو لازم انا اللي اكلمك و اسأل عليك
ياسين..لا ابدا يابابا معلش انا اسف بس مشغول شوية حضرتك عامل ايه
والده..كويس الحمد لله انت عامل ايه في الصعيد
ياسين..كويس الحمد لله
والده..طب ماتريح قلبي وانقلك اسكندرية مش احسن ليك
ياسين..لأ مش احسن انا مرتاح هنا مش عايز اتنقل
والده..اللي يعجبك انت حر طب اجازتك امتى
ياسين..الاسبوع اللي جاي عندي اجازة يومين
والده..يعني هتيجي تقعد اليومين دول معايا
ياسين بضيق..ان شاء الله
والده بيأس وحزن فهو يعلم ان ابنه بعيد عنه ليس بالمسافة ولكن بالمشاعر فهو يشعر ان ابنه لايحبه تنهد وقال..طب يابني اشوفك بخير مع السلامة
ياسين..مع السلامة اغلق الهاتف وسرح قليلا
شعر يوسف بالحزن على صديقه..انت مش هتنسى بقى وتعامل ابوك كويس
نظر له ياسين بحزن ..انسى ايه عايزني انسى انه كان بيعامل امي وحش وكل همه شغله حتى لما مرضت مكنش بيسأل عنها وجدتي ام ابويا سابت بيتها وجت قعدت معنا عشان تراعي امي وهو ولا هنا وجدي ابو امي هو اللي كان بيأخدها لدكاترة ويحضر معها جلسات الكيماوي هو وجدتي حتى مكنش يهون عليه يطلع لاوضتها يطمن عليها لما ساءت حالتها وماتت في اسرع وقت من المتوقع لها وحتى بعد ماماتت ما حاولش يعوضني عن غيابها ويقرب مني وانا طفل عمري عشر سنين وانت بنفسك شوفت ايام الجامعة اد ايه هو كان بعيد عني دلوقتي افتكرني وعايزني جانبه انا عمري ماهنسى دموع امي كل يوم وهي عارفة انه بيحب واحدة تانية ولاهنسى كلامها مع جدتي فاطمة لماهو بيحبها ليه اتجوزني وعذبني بحبه انا كنت وقتها طفل مش فاهم معنى كلامها بس شايف دموعها وانها بسببه لكن لما كبرت فهمت معنى كل كلمة انا ساعات بحس انه اتجوزها عشان……..
لم يكمل جملته فهو خجل من قول ان والده تزوج امه من اجل المال فهي كانت غنية ووالدها رجل اعمال كبير لكن والده كانت حالته عادية جدا وجدته كانت تعيش في منطقة شعبية ورجعت لبيتها بعد وفاة والدته ولم تريد البقاء وكانت دائما تنظر له نظرة تحمل الكثير من معاني الحزن وخيبة الامل وقال لنفسه..ياترى عمل ايه معها حتى امه كان في حاجز بينهم فاق من شروده على صوت يوسف..ايه ياعم سرحت في ايه
ياسين بصوت مخنوق حزين..ابدا مفيش
يوسف اراد تغير الموضوع..صحيح ماقولتش كنت عايزني في ايه وليه ركبت معايا
تذكر ياسين ماكان يود قوله ل يوسف تنهد بهدوء..انا عايز اكلمك في موضوع مهم بس فكر الاول قبل ما ترد عليا واوعى تفهمني غلط
رفع يوسف حاجبه..افهمك غلط في ايه ياض غلط ايه يخرب بيتك
ياسين..انت فهمت ايه يامتخلف اتعدل بدل مااعدلك ياض
يوسف بضحك..ايوة كدا اتكلم عدل بدل سهوكة البنات دي فينك ياامي تشوفي البيئة اللي عايزاني اتكلم زيه
ياسين..لأ انا هقول لمامي انك بتأثر عليا وهتخليني زيك بيئة
يوسف..وحياة امك بأنا بأثر عليك ماشي كنت عايزني في ايه
ياسين..بصراحة كدا ومن غير مقدمات انا عايز اتقدم ل ندى واتجوزها ولما قولت اوعى تفهمني غلط كان قصدي انك متفكرش انك دخلتني بيتك وانا خونت ثقتك وبصيت لأختك لكن والله انا بحبها انت اخويا اللي مليش غيره انتو فعلا اهلي ووالدتك بحس انها امي بحنيتها عليا والله يايوسف انا عمري مابصيت لها بصة وحشة وانت فاهم معنى كلامي انا شايفها حبيبتي ومراتي وام عيالي وانا مش مكسوف اني اقولك كدا لانك صاحبي واخويا واكتر واحد قريب مني وبردو لو انت مش موافق دا مش هيغير حاجة بينا وهتفضل اخويا وماما فيروز هتفضل امي ولو بعد كدا منعتني ادخل بيتك ف انا هحترم رأيك بس دا مش معناه اني هتخلى عن حبي لها لأ هطلبها منك مرة واتنين وتلاتة وعشرة وهفضل وراك لحد ما توافق هاا قولت ايه
اوقف يوسف السيارة فجأة والتفت ونظر له ولم يرد….
…………
