كذب المنجمون فاطيما يوسف

وقف علي قدامها وقال لها بندم لما شاف حالتها المتدهوره :

_حقك على عيني يا نور عيني بس كنت تايه محتار وضايع ما تزعليش مني انا رجعت لك علشان عرفت اني ما اقدرش استغنى عنك ولا اقدر اعيش من غيرك .

دقات قلبها مش مبطله من كتر المفاجأه كانت خلاص أهلت نفسها انها هتبقى وحيده وانها مش هتعيش معاه تاني وانها تكتم حبه في قلبها لحد ما تقابل وجه رب كريم ،

لكن في حاجز كبير هيمنعهم للرجوع وقالت له وهي بتبكي:

_مش هينفع ارجع لك ولا ينفع نعيش مع بعض تاني ياعلي ،

استغرب عليه جدا من رفضها ليه اللي ما كانش متوقعه ابدا وسألها بوجع:

_ ليه يازينب ؟

_علشان في بينا حاجه كبيره قوي يمكن بالنسبه لي انا لكن بالنسبه لك لا تعني لك شيء هي اللي هتمنعني ان انا نرجع لبعض ؟

قالت كلامها وهي بتديله ضهرها ،
مستوعبش كلامها وقف ورا ضهرها ولف وشها ليه ومسك ايديها الاتنين وقال لها وهو بيبص جوه عيونها باشتياق:
_ مفيش في الدنيا حاجة تقدر تبعدني عنك ،
لا الناس ولا إنتي حتي تقدري تحرميني منك .

قالت له بوجع :
_ في ياعلي فيه !
ابويا اللي هفضل ادعي له بالرحمه واصلي له واستغفر له وأتصدق عنه ،

ونزلت ايديها من ايديها وكملت وهي بتمسح دموع عينيها وبتدي له ضهرها تاني :

_هتقدر تستحمل كده يا علي؟
هتقدر تقول لي دلوقتي انك سامحته على الذنب الكبير اللي عمله؟

لحد كلمه السماح اللي قالتها وعلي اتزلزل من جواه علشان هو مش هيقدر يسامح ،

وبعد دقايق من التفكير افتكر كلام صاحبه اللي قاله له ان ربنا بيغفر الذنوب جميعا،
وان ده جد أولاده واللي كانوا بيحبوه جدا،

وافتكر كمان صاحبه لما قال له افتكر له مواقف حلوه كتير مع ولادك لما كانوا بيتعبوا وبيجري بيهم،

افتكر له وهو كان قاعد بيعلمهم الصلاه في عز شغلك،
افتكر له بيته اللي فتحه لك وقلبه اللي عمره ما مبين لك كره دايما،

افتكر ان اللي عمله رغم انه غلط وغلط كبير الا انه محبه لبنته الوحيده وربنا جزاه ،

وكانت لسه هتتكلم لفلها وراح وقف قدامها ومسكها من راسها وباسهم بكل حب وتقدير واتكلم :

_سامحته يا اغلى حاجه عندي في الدنيا،

مش بس كده ده انا هصلي معاكي وادعي ربنا بالمغفره ليه معاكي وهتصدق معاكي ،

كفايه انه السبب في وجودك في حياتي كفايه انه اداني ست وحبيبه وام وزوجه عظيمه الناس بتحسدني عليها ،