أحزان رهف

الاب بصوت ضعيف مش قادر راسى يا ام رهف وجعانى جدا ومكملش الكلمه الا وغمض عينه وعلى صرخه واحده من الام شعر بها اولادها وسمعوها جريوا بسرعه ودخلوا الاوضه واتصدموا من المنظر اللى شافوه الاب على السرير والام تبكى بحرقه بجواره وفى صوت ضعيف من الام .. الحقينى يا رهف يا بنتى الحقى ابوكى بسرعه جريت رهف على ابوها ومسكت أيده وشعرت بالنبض لكنه كان ضعيف اوى وقالت اطمنى يا ماما هو كويس بس النبض ضعيف اوى اتصل يا عمر بسرعه بعربيه الإسعاف
عمر… حاضر يا رهف حاضر
وبعد أقل من عشر دقائق جت عربيه الإسعاف ونقلت الأب إلى أقرب مستشفى واتجمعوا الاخوه التلاته والام أمام حجرة الكشف وبعد دقائق معدودة خرج الدكتور من حجرة الكشف
الدكتور… فتح الباب جريوا عليه رهف بلهفه خير يا دكتور .
الدكتور .خير انشاء الله بس لازم نحجز الوالد بسرعه فى العنايه المركزه
عمر….. ليه يا دكتور بابا ماله حصله ايه
الدكتور .. للاسف الحاج الضغط عمله جلطه على المخ
الكل فى ذهول من كلام الدكتور
رهف اللى تشوفه حضرتك يا دكتور
وبعد فترة اتنقل الاب لحجرة العنايه المركزه ووضع على الأجهزة وبالخارج يجلس الجميع يدعوا له بالشفاء وأنه يقوم لهم بخير انشاء الله
وعدى عليهم الوقت وجه الليل والاب حالته زى ما هى وبالعكس بدت تتدهور وجه الدكتور ودخله وبدأ يكشف عليه ويشوف الحاله وصلت لايه وبعد دقائق معدودة خرج الطبيب من حجرة العنايه المركزه وبملامح حزينه انا اسف يا جماعه البقاء لله.
بدأت البنات بالصريخ والبكاء على فقدانهم ابوهم وسندهم فى هذه الدنيا والام تبكى بحرقه على شريك عمرها وحبيب حياتها وزوجها وكل ما تملك فى هذه الدنيا
وقام عمر بحضن اخواته البنات رهف ورغد وفضل يبكى بحرقه على فراق ابيه وصاحبه ويحتضن امه ويقبل يديها ورأسها ويمسح دموعها ومر عليهم الوقت كأنهم فى حلم لا يشعرون بشىء
وكان ما يمرون به مجرد مشهد فى فيلم لم يتوقعو حدوثه فى هذا الوقت.
وقام عمر بعمل الاجراءات اللازمه لاكرام والده ودفنه وقام بالاتصال بجميع أقاربه وابلاغهم .
وقاموا بالحضور ودفن الاب فى مقابر العائله
وفى المساء أقاموا له سرادق للعزاء وحضر جميع زملاء الاب فى المصنع وجميع جيرانهم والاقارب وانتهى اليوم على حزن كبير لفقدان عائل هذه الأسرة واساس كيانها وغادر الجميع ولم يتبقى فالبيت غير الحاج احمد اخوا المرحوم الصغير وعم الاولاد واحتضن عمر وقال له
عمر يا ابنى انت دلوقتى راجل البيت ده لازم تحافظ عليه وعلى اخواتك البنات وعلى الحاجه والدتك زى ما كان بابا موجود وزياده انا عارف انك راجل وادها وأدود يا عمر ربنا يعينك يا ابنى