أحزان رهف
وعدى كذا يوم وبدا حسام ينزل الشركه تانى مع باباه علشان كانت الطلبيه اللى كانوا طلبوها من فترة قربت تيجى من برة
الحلقه 18
روايه احزان رهف
بقلم ✍✍ سحر فرج
وفى مكتب صفوان… طلب صفوان من مدير مكتبه أنه يطلب البشمهندس حسام فى مكتبه فورا.
حسام دخل لباباه المكتب وقاله خير يا حاج فى ايه ؟؟
الاب.. الطلبيه هاتوصل بكرة الفجر يا حسام وعاوزك تجهز نفسك يا ابنى علشان تروح تستلمها بنفسك انت عارف الطلبيه دى مهمه اد ايه ولو كنت قادر كنت جيت معاك.
حسام .. انا تحت امرك يا حاج انشاء الله هاروح واستلمها انا بنفسى ولا تشغل بالك وعلى الصبح اكون وصلت بأذن الله.
الاب…. ربنا يخليك يا حسام يا ابنى ريحتنى ده انا كنت شايل هم الطلبيه دى اوى مش عارف ليه.
حسام…. انت تؤمر يا حاج وانا انفذ .
الاب… يالا خد بعضك وارجع على الفيلا وجهز نفسك للسفر .
حسام … ماشى يا بابا مش عاوز حاجه منى تانى قبل ما انزل.
الاب … عاوز سلامتك يا ابنى ربنا يرضى عليك.
ومشى حسام ونزل من الشركه وركب عربيته وراح على محل ورد كبير ونقى بوكيه ورد خده لرهف وهو مروح.
ووصل الفيلا وخد البوكيه فى أيده واول ما دخل لقى رهف قاعده على الكنبه فى الريسبشن بتتفرج على فيلم ابيض واسود فمشى براحه وجه من ضهرها وحط أيده على عيونها فحست رهف بايده ولفت وشها لقت حسام فلف نفسه ليها واداها بوكيه الورد وباسها وقالها وحشتينى يا حبيبتى اوى اوى اوى.
الام…. احم. احم نحن هنا يا عم حسام مفيش وحشتينى يا ماما.
حسام راح لمامته وباسها وباس ايديها وقالها انت الخير والبركه يا حبيبتى وراحت رهف وحضنت حماتها وقالت لها انتى الخير والبركه يا ست
الكل.
الام…. خدتهم هما الاتنين فى حضنها وقالت لهم ربنا يخليكم لبعض يا حبايب قلبي.
حسام .. انا هاطلع اجهز نفسى علشان انا مسافر على الساعه واحده باليل علشان استلم الطلبيه للشركه
الام… تروح وتيجى بالسلامه يا ابنى.
رهف … تروح وتيجى بالسلامه انشاء الله يا حبيبى.
وطلعوا وجهزوا شنطه السفر اللى هايخدها معاه حسام ونام شويه وصحى على العشاء واتجمعوا كلهم على السفرة الاب والام وحسام وشريف ورهف.
وفضلوا يتكلموا وبيضحكوا واصتادوا شريف فى الكلام علشان يبدأ يدور على عروسه علشان يفرحوا بيه هو كمان وخلصوا العشاء وطلعوا على فوق وبعد فترة بدأ حسام يلبس هدومه علشان الساعه قربت على واحده ومسك رهف وقربها منه وحضنها وقالها هاتوحشينى اوى اوى يا حبيبتى.
رهف … وانت كمان يا قلبى هاتوحشنى اوى
ضمها حسام ليه اوى وباسها وخد الچاكيت بتاعه ولبسه ونزلوا على تحت وسلم على امه وعلى ابوه .وللاسف شريف كان راح على مأموريه ومشى بعد العشاء على طول وسلم عليهم حسام وخد بعضه وركب عربيته ومشى وطلعت رهف على اوضتها. وطلع الاب والام هما كمان على اوضتهم وناموا.
وبدأ يطلع النهار وفعلا كان وصل حسام على المينا واستلم الطلبيه وخلى الموظف بتاع الشركه يركب مع العربيات بتاعه البضاعه .
وركب حسام عربيته وبدأ يمشى بيها وكان فى شبورة كبيرة اوى خلت الرؤيه منعدمه وفى ثوانى كانت العربيه انقلبت بيه وانقلبت كذا عربيه كمان وكانت حادثه كبيرة جدا .
وفى الفيلا صحى الاب على صوت جرس التليفون وقام بالرد على المتصل.
وقال الو…..
المتصل … حضرتك صفوان والد حسام
الاب … بدأت ضربات قلبه تزيد ورد وقال ايوا يا ابنى خير فى ايه ؟؟؟
المتصل… ابن حضرتك عمل حادثه كبيرة وحالته خطيرة وراح على المستشفى.
الاب رمى التليفون وجرى على اوضه شريف اللى لقاه لسه خارج من الحمام وكان بيلبس هدومه علشان يروح على شغله .
الاب… الحقنى يا شريف الحقنى يا ابنى.
شريف….. بخضه من منظر ابوه خير يا بابا فيه ايه.؟؟؟؟
الاب .. .. اخوك حسام عمل حادثه والعربيه انقلبت بيه وراح على المستشفى وحالته خطيرة.
شريف… بزهول من الخبر اللى سمعه ومكنش مصدق قاله اهدى يا بابا خير انشاء الله
وكل ده وكان بابا الاوضه مفتوح وسمعت رهف كل اللى حصل أن حسام عمل حادثه كبيرة وجريت على حماها وهى بتعيط على الخبر اللى هى سمعته ده وحضنها الاب وقالها اهدى يا بنتى خير انشاء الله.
وراح الاب وبلغ الام اللى اتصدمت من الخبر الوحش ده وأنها ممكن تفقد ابنها حبيبها وغيروا هدومهم وفى ثوانى كانوا خدوا بعضهم ونزلوا وركبوا عربياتهم وراحوا على المستشفى اللى بلغوهم بيها.
