طفلة صعيدي الجزء الثاني

_مش هتجوليلي بجي ايه اللي مزعلك ومضايجك اكده لدرچه انه خلاكي تبكي
_ اني مضايجة؟! لاه ابدا، كل حاچه زين متجلجش عليا
_ مش مضايجة؟ طب جوليلي بجي ليه كنتي تبكي مادام انتِ مش مضايجة
قالت بتوتر وهي بتفكر بحاجه تقولها: ها؟ اني مكنتش ببكي كانت في حاچه دخلت في عيني
ضحك حمزة علي كلامها وشاورلها علي الاكل: طب يلا يا ستي كلي، وهحاول اني اصدجك مع اني عارف انك مخبية حاچه ومش موافجه تجوليها
ابتسمتله بتول وبدإت تاكل، كانت مركزة وهي بتاكل في ملامحه وفي طريقته الحلوة معاها
♡
وعند فريده اللي كانت قاعده في اوضتها علي سريرها وبتكلم احمد في التليفون
احمد: هجدر اشوفك يا فريدة النهاردة؟ رايدك تطلعيلي انا واجف چار الفيلا
فريده قفلت المكالمة وطلعت من الفيلا وشافته واقف جمب الفيلا مستنيها، فقربت منه

احمد…. طب انتِ مضايجة مني اكده ليه ومبترديش عليا
_ لسة جايلي انك كنت بتكلم بتول ومش رايدني اضايجك، ديه انت مستفز جوي
_ ما اني جولتلك كان جبل اكده واني دلوج جطعت وياها من بدري
فريده…. بصتله بشك فطلع من جيبه الشيكولاتة اللي بتحبها ومعاها وردة
احمد…. چبتلك وردة يا احلي وردة في حياتي
ابتسمتله وكانت لسه هتاخدهم منه رن موبايله، بص علي الاسم واتوتر فشدت منه فريدة الموبايل بشك
_مين اللي بيكلمك ديه يا احمد
_ديه مازن صاحبي، هاتي الموبايل يا فريدة متبجيش برده اكده
_ مازن صاحبك؟ طب ليه اكده خايف ومتوتر وبعدين ليه حاطط جلب في الاسم بتحب صاحبك للدرچه ديه
احمد معرفش يقولها ايه وكان خايف احسن تعرف انه بيكلم بنات غيرها، ففتحت المكالمة وردت

فريدة: الو مين معايا ليه مبتردش
فريده مسمعتش رد فشد منها احمد الموبايل وبصلها بضيق: جولتلك مازن صاحبي ليه اكده رديتي؟! انتِ بتشكي فيا يا فريدة
بصتله بندم وهيام: لاه اني اكيد مبشكش فيك اني بس بغير عليك والله، انت ليا مش هجدر اشوف حد تاني بيكلمك غيري
_ مستحيل اكلم حد غيرك انتِ روحي يا فريدة وجلبي وكل حياتي، ومستني اليوم اللي اتچوزك فيه ويتجفل علينا باب واحد
فريده بصت للارض بخجل من كلامه وصدقته، وفضلوا يتكلموا شوية في الوقت اللي وصلت فيه حمزة وبتول بص حمزة لاحمد بحاجب مرفوع وقرب منه
حمزة… بتعمل ايه اهنيه، وواجف چار فريده ليه انتوا بينكوا حاچه؟!
اتوترت فريدة من كلام حمزة وهزت راسها بالنفي
فريده… انطجي يا فريدة الراچل ديه بيعمل ايه اهنه بينكوا ايه؟!