طفلة صعيدي الجزء الثاني
_ متجلجيش يابتول ولدنا هيرچع، وعد مني هرچعه وهرچعه زين وبخير ومفيش اي حد هيلمس شعره منيه
بتول هزت راسها وحمزة قرب منها وضمها لحضنه وبعد شوية نزلوا لما عرفوا ان سيف وصل، وقعدوا الجميع مع سيف
سيف: جبل ما اچيلك شوفت كاميرات المراجبة وفعلا في راچل أخده من غير مامرتك تشوفه بس مجدرتش اتوصل لاي معلومات عنيه لأنه كان حاطط حاچه علي وشه
سيف قال كلامه واصر حمزة عليه انه يوريله الفيديو، فتح سيف موبايله وورالهم فيديو كاميرة المراقبة، حمزة جز علي سنانه بخوف لما شاف بتول سايبه ايد يوسف وواقف جمبها، بصت بتول لحمزة بدموع ،مينكرش انه كان متعصب من بتول لكنه اتماسك ومبينش غضبه واتكلم وقال لسيف بصوت مهزوز
_والعمل ياسيف، هنعمل ايه هنلاجيه كيف دلوك
كان لسه سيف هيتكلم لكنه بص لفريده لما نزلت من علي السلم وقعدت جمبهم بصلها باعجاب وسرح في ملامحها،لاحظت فاتن نظراته وفرحت و نفخ حمزة بضيق لما لاحظ عيونه متعلقه علي فريده وناسي شغله وقاله
حمزة.. سيف ركز ويايا دلوك ولدي مخطوف ساعدني نلاجيه
_ دلوك اكيد الخاطف هيتصل عليك هيطلب فيدية يمكن يكون سبب الخطف هو الفلوس، اللي نجدر نعمله دلوك هو اننا ننتظر اي مكالمة ونحدد موجعها
فضل سيف يتكلم مع حمزة بخصوص يوسف، وطلع محمد اوضته فطلعت وراه فاتن وبصتله بحاجب مرفوع
فاتن… متي بجي يا محمد ناوي تتصل علي حمزة وتطلب منيه فدية، ديه فرصه كبيرة جوي وجدرت تلعبها صوح
……………
كان قاعد يوسف علي كرسي ومربوط ومحطوط علي بؤه لزق كان بيعيط بخوف، وكان قاعد قدامه راجل ،اللي طلع من جيبه موبايله وصوره صورة وبعدين ابتسمله بمكر وحط رجل علي رجل
_ متبكيش يا يوسف اني مش هأذيك كلها كام يوم وهنرچعك لابوك وامك بس اللي أمرنا نخطفك ليه حساب وياهم هيخلصه لاول
وقرب منه وشال اللزق من علي بؤ يوسف فاتكلم يوسف بنبرة خوف
_اني هجول لابوي ولامي عليك، وابوي هينجذني، وجريب هياخدني من عنديك
ضحك الراجل باستهزاء علي كلامه وقرب منه الاكل
_ انت شچاع يا يوسف طب كل چبتلك الوكل، علشان متجولش لابوك اني مچوعك كمان، ديه عيبه في حجي اكون خطفك ومچوعك كمان
وفك ايده وقاله بنبرة تحذيرية: اني فكيتك علشان تاكل عارف لو فكرت تعمل اي حاچه؟! حسابك هيبجي عسير، اني هبجي برا
قال كلامه وسابه وخرج وقفل عليه الباب بالمفتاح ورجع يوسف تاني يعيط، وفضل يبص علي المكان اللي هو فيه بخوف
……………
_ العمل ياحمزة هنعمل ايه اني خايفة جوي علي يوسف
حمزة بصلها بخوف وقلة حيلة لكنه بالرغم من كده حاول يخفي خوفه ويطمنها ونسي غضبه منها لما شاف حزنها الكبير علي ابنه
