جبروت الحب بقلم آية
الحلقه السابعه
عدت سنه ويوسف وساره وفرح بقوا اصحاب جدا يوسف اتخرج من الكليه وبيدير الشركة بس مفيش مانع انه لسه بيروح عشان يقعد مع فرح وساره ،ساره وفرح نجحوا بتقدير امتياز وراحوا سنه تانيه ،وطبعا اهل ساره كانو مستمرين فى الضغط على ساره انها ترتبط ب اى عريس من اللى كانت بتجبهم جارتهم على امل ان ساره تنسى قاسم
لحد ما جه يوم فرح كانت تعبانه ومنزلتش الكليه وساره راحت لوحدها ودخلت المحاضره، لقت شاب (نادر شاب غنى و مستهتر لسه ناقل من هندسه اسكندريه ل هندسه القاهره سنه تانيه مشهور بمغامراته مع البنات وبغروره الزايد عن الحدود )جه قعد جمبها وبداء يتكلم معاها
نادر:انتى اسمك ساره صح
ساره:افندم؟! وانت يخصك فى ايه اسمى
الشاب:عادى يعنى بنتعرف انا اسمى نادر
ساره:وانا مش عاوزه أتعرف على حد
نادر:مش نادر اللى حد يقوله لأ، فوقى لنفسك ياحلوه
ساره بصتله بغيظ سبته وهى فى قمه غضبها وخرجت وكلمت يوسف فى التليفون وطلبت منه يجى ضرورى وقالها تستناه فى الكافتريا وبعد دقايق قصيره وصل يوسف
يوسف:خير ياساره ايه اللى حصل
ساره:واحد قعد يضيقنى فى المحاضره ف قومت وسبت المدرج واتصلت بيك
يوسف:متضيقيش نفسك بس انا هقوم اجيبلك حاجه تشربيها عشان تهدى
يوسف راح يجيب عصير وساب ساره قاعده لوحدها على التربيزه وفجأه لقت نادر واقف قدمها
نادر:بقا حته بت زيك تنفضلى انا وتسبينى وتمشى
ساره:انت مين اصلا عشان تكلمنى كده
يوسف شافهم من بعيد ف راح جرى عليهم وسمع ساره بتزعق وصوتها عالى
يوسف:فى ايه ياساره بتزعقى ليه
نادر:هو ده حبيب القلب اللى نفضتيلى عشانه
ساره:أخرس يا حيوان
يوسف:امشى من هنا يا عم الامور ولو كلمتها تانى مش هخليك تعرف تتكلم بقيت حياتك
نادر:ما تهدى حبيب القلب ياسوسو وقوليله ان مش نادر اللى يتهدد
يوسف:صدقنى انت لو ممشيتش من هنا مش هيحصلك خير
نادر:هتعمل ايه يعنى اللى عندك اعمله انا ……
ملحقش نادر يكمل كلامه لقى يوسف نزل عليه ضرب لحد ما طحنه وفصل بينهم الأمن واخدهم على مكتب العميد
العميد:ممكن افهم ايه اللى حصل ده
نادر:يا دكتور انا واقف بتكلم معاه لقيته نزل فوقى ضرب
العميد:انا مكنتش اتوقع منك كده يا يوسف
يوسف:كداب يا..
العميد:مش عاوز كلام كتير اللى حصل ده ميتكررش وانا ليا كلام مع د.هشام يا يوسف
خرجوا من اوضه العميد ويوسف كان متعصب جدا ونادر قرر انه هيرد ل يوسف وساره القلم قلمين
ساره:انا اسفه يا يوسف على اللى حصلك كل ده بسببى
يوسف:متعتذريش ياساره انتى مالكيش ذنب هو اللى يستاهل اللى حصله
ساره:طب انت هتعمل ايه دلوقتى
يوسف:هرجع الشركه عشان ورايا شغل
ساره: معلش يايوسف عطلتك معايا
يوسف:بلاش الكلام اللى بيضيقنى ده المهم انتى وراكى هتعملى ايه دلوقتى
ساره:انا هروح انا مش هقدر اقعد واشوف البنى ادم ده تانى
يوسف:خلاص تعالى معايا اوصلك واطلع على الشركه
ساره:لا متتعبش نفسك انا هركب تاكسى من هنا
يوسف:مش فاكره اخر مره قولتى الجمله ديه حصل ايه
ساره:….
يوسف:يلا بينا يا ساره ربنا يهديكى وبعدين اعتبرينى سواق تاكسى عشان مش مستعد اتخانق مع حد تانى
ساره:خلاص ماشى بس بشرط
يوسف:كمان هتتشرطى،ماشى قولى ياستى
ساره:هتاخد الاجره ههههههههه
يوسف:لا دا انتى صدقتى نفسك بجد ومتخيلانى سواق تاكسى
ساره:خلاص ياعم بهزر معاك
ركبت ساره مع يوسف ووصلها لحد البيت واول ما دخلت الشقه راحت على اوضتها وكلمت فرح فى التليفون وحكت لها اللى حصل
فرح:كل ده حصل عشان مجاش يوم واحد بس امال لو غبت اسبوع هتعملوا ايه من غيرى
ساره:ماشى ياست المهمه بكره هتيجى اكيد عشان انا مش هروح لوحدى
فرح:ان شاء الله
جه باليل ويوسف رجع من الشركه ولقى باباه مستنيه فى البيت
د.هشام:حمد الله على السلامه يايوسف بيه
يوسف:الله يسلمك .. مالك يا بابا فيك حاجه
د.هشام:ممكن افهم ايه اللى حصل النهارده فى الكليه واتخنقت ليه
يوسف:سوء تفاهم بسيط وراح لحاله
د.هشام:سوء تفاهم يخليك تمسك زميلك تضربه !وانت من امتى بتتخانق مع حد؟طول عمرك عاقل وبتتحكم فى أعصابك ايه السبب اللى خلاك متعرفش تسيطر على أعصابك
يوسف:متشغلش بالك يابابا مشكله بسيطه واتحلت خلاص
وجه تانى يوم وراحت ساره الكليه وقابلت فرح ودخلوا المدرج وهى بتتمنى انها متشوفش اللى اسمه نادر ده بس مش كل حاجه بنتمناها بتحصل ،بعد ما دخلوا قاعدوا لقوا نادر وقف جنب ساره وكلمها بهدوء
نادر :صدقينى ياساره لو معتذرتليش انتى والواد بتاعك قدام الناس كلها هخليكى تندمى
ساره:اعتذر لمين؟ليك انت! دا مستحيييل انت ليك عين تتكلم اصلا
نادر:والله ل اخليكى تندمى ياساره
ساره:أطول ما فى خيلك اركبه
نادر:ماشى ياساره بس افتكرى انى حذرتك
عدى اسبوع على الموقف ده ،ساره داخله الكليه وشايفه الطلبه كلها بتبص عليها وبتتكلم واللى يبص عليها ويضحك وهى مستغربه من كل اللى بيحصل لحد ما وصلت للمكان اللى واقف فيه يوسف وفرح وكانوا واقفين بيبصوا فى الموبيل ومتنحين
ساره:فيه ايه ياجماعه انتو واقفين كدا ليه وبتتفرجوا على ايه ورونى
فرح:لا مفيش حاجه ياساره دا صوره كنت باخد رأيي يوسف فيها
ساره:صوره؟! ومالك متوتره كدا ليه؟! طب ورينى الصوره وانا اقولك
فرح:لا خلاص مسحتها عشان وحشه
ساره:ورينى الصوره يا فرح بدل ما أشوفها غصب عنك
فرح:قولتلك مسحتها ياسا…
مكملتش كلامها وكانت ساره شدت منها الموبيل وشافت اللى عليه
وفجأة وقعت على الارض مغمى عليها حاولوا يفوقوها بس مبتفوقش شالها يوسف ووداها العربيه مع فرح وطلعوا على المستشفى
