جبروت الحب بقلم آية
يوسف سافر تانى يوم وهو سايب قلبه مع ساره فى مصر كان بيتمنى انها تمنعه وتقوله متسافرش لكن مقلتش هى فعلا محبتوش ولا حبته بس لسه معرفتش
اكيد الفراق هيخليها تعرف قيمته بالنسبالها ،تعرف انها بتحبه وبتحب وجوده،قلبها مبقاش يدق ل قاسم بقا بيدق ب اسم واحد بس يوسف
عدت 3 سنين
ويوسف كل يوم شوقه بيزيد ل ساره ، بيتمنى يشوفها ويسمع صوتها وضحكتها نفسه يشوف لمعه عنيها وهى فرحانه،كل يوم يبص على موبيله يتمنى أن ساره تتصل بيه تقوله ارجع وحشتنى لكن انتظاره كان بيطول
كان دايما بيطمن على أخبارها من فرح اللى كانت بتعمله تقرير يومى ب أخبار ساره
وبتمر الأيام وساره وفرح يخلصوا آخر سنه فى الكليه ويتخرجوا بتقدير امتياز
ساره دورت على شغل كتير لحد ما اتقبلت فى شركه وأثبتت شطارتها وبقت من أهم المهندسين فى الشركه
فرح كانت مهتمه بتجهيز الفيلا اللى هتتجوز فيها،والتجهيز للفرح اللى مستنياه بقالها 3سنين
جه يوم الفرح وساره كالعاده كانت مع فرح صحبة عمرها فى أهم يوم فى حياتها ،و خالد وصل عشان ياخد فرح
خالد:انا عملت حسابى وجبتلك شيكولاته كتير عشان متعمليش زى ماعملتى فيا فى الخطوبه
فرح: هههههههههه …. دا انت قلبك اسود اوى لسه فاكر
خالد وفرح نزلوا القاعه فرح كانت حلوه جدا فى الفستان الأبيض ومكياج رقيق كانت طالعه شبه الملكه وخالد فى بدلته وشعره الاسود وعيونه السودا اللى بتلمع من الفرحه كان انيق جداا
كان الفرح ممتع
ساره كانت لابسه فستان وردى قصير ومنفوش من اول الوسط وعامله تسريحه رقيقه وميك اب أرق كانت شبه الأميرات اللى فى الكارتون
بفقراته وساره كانت فرحانه ب فرح وخالد وافتكرت يوم فرحها هى ويوسف واللى عملته فيه وضحكت ونزلت من عينيها دمعه غصب عنها مسحتها وراحت الحمام
قعدت جوه شويه كانت بتعيط وغسلت وشها وظبطت مكياجها وخرجت ولكن تكون الصدفه بخروج ساره وهى مش واخده بالها من اللى حواليها ودخول يوسف بسرعه عشان يروح يشوف ساره
لحد ما ساره خرجت فى حد وهى مش واخده بالها وكانت هتقع لكن هو لحقها بسرعه وشدها
ساره قامت وقفت وهى مبصتش للى خبطت فيه
ساره بعصبيه:مش تاخد بالك
يوسف:انتى هتفضلى دايما تخبطى فيا وتقوليلى خد بالك
ساره بدهشه:يوسف!!! انت رجعت امتا؟!
يوسف:رجعت امبارح عشان أحضر الفرح
ساره بحزن:يعنى هتسافر تانى
يوسف:لا مبقتش قادر ابعد اكتر من كده خلاص هقعد هنا
ساره:اخبارك ايه؟!كنت بتعمل ايه كل السنين ديه؟!
يوسف:يهمك اوى،دا انتى حتى مفكرتيش تتصلى وتسألى عليا ولا كأننا كنا صحاب
ساره:ما انت كمان مكنتش بتتصل
الاتنين قالوا فى صوت واحد
يوسف:فكرتك نسيتينى
ساره:فكرتك نستنى
يوسف:لسه بنفكر زى بعض
ساره:طب مش يلا ندخل الفرح
يوسف:يلا بينا
دخلوا القاعه ويوسف راح بارك ل خالد وفرح
ساره فضلت واقفه مع يوسف لحد ما لقت جت
لارا:سااااره How are you
ساره:تمام الحمد لله
لارا:بقالى كتير مشوفتكيش،عملتى ايه فى المده ديه
ساره:اتخرجت ودلوقتى بشتغل فى شركه………
لارا:مش قصدى شغل،يعنى محبتيش حد كده ولا كده؟!
ساره:انا مبفكرش فى الموضوع ده
لارا:مش تباركيلنا انا ويوسف اتخطبنا
ساره:الف مبروك
لارا:الله يبارك فيكى عقبالك
ساره:طب هستاذن انا بقا
يوسف:خليكى شويه
ساره:كفايه كده اسيبك مع خطيبتك بقا
خلص الفرح اللى كانت ساره دخلاه وهى فى قمه سعادتها وخارجه منه وهى فى قمه تعاستها
فرح وخالد سفروا يقضوا شهر العسل
وساره كانت قاعده فى البيت طول ما فرح كانت مسافره وكانت واخده اجازه من الشغل
لما فرح رجعت وعرفت الحاله اللى ساره فيها وأنها مبتخرجش ولا بتروح الشغل من بعد الفرح قررت تروحلها
فرح:مالك ياساره
ساره:مفيش يافرح انا كويسه
فرح:احكيلى اللى مضايقك يا حبيبتى احنا طول عمرنا اخوات وبنحكى كل حاجه ل بعض
ساره بعياط:يوسف رجع يافرح
فرح:ودا سبب يخليكى تزعلى
ساره:انا فرحت اوى لما شوفته كان وحشنى اوى يافرح انا كل يوم كنت بمسك التليفون عشان اتصل بيه وبتراجع فى آخر لحظه
فرح:وايه اللى بيخليكى تتراجعى
ساره:عشان معلقوش بيا اكتر من كده يوسف يستحق واحده احسن منى واحده تحبه بكل قلبها مش واحده حول قلبها حرب بين قاسم ويوسف،واحده تعيشه فى سعاده مش التعاسه اللى كان عايش فيها معايا،انا طلبت منه الطلاق عشان كده عاوزه اشوفه سعيد مع واحده بتحبه وهو بيحبها
فرح:بس يوسف كان بيحبك ياساره
ساره:كان يافرح كان، خلاص هو دلوقتى خطب لارا وهيتجوزوا قريب وهيكون سعيد فى حياته
فرح:وايه اللى خلاكى متأكده أنه هيكون سعيد؟
ساره:عشان لارا بتحبه وهتخليه يعيش فى السعاده اللى انا مقدرتش اعيشه فيها
فرح:بس انتى بتحبيه ياساره
ساره:بس مش هقدر اسعده
فرح:انتى كده هتظلمى نفسك
ساره:انا خلاص هبص قدامى واشوف مستقبلى وهنزل شغلى من بكره عشان مفمرش فيه،واوعدينى يافرح يوسف ميعرفش ب حاجه
فرح: وعد
ساره هتستسلم من اول حاجه واجهت حبها وهتسيبه وهتبص لمستقبلها
ساره راحت تانى يوم الشغل واستلمت مشروع كبير وفيه شركتين كمان مشاركين فى المشروع ده
الشركه عملت اجتماع عشان المهندسين اللى هيشرفوا على المشروع يتناقشوا مع بعض واللى كانت ساره واحده منهم
ساره دخلت الاجتماع واتفجائت بوجود نادر
نادر:ساره؟!انتى بتشتغلى هنا؟!
ساره:اه ، انا بتعمل ايه هنا؟
نادر:انا شركتى داخله شريكه فى مشروع وانا اللى هشرف عليه بنفسى
ساره:وأنا كمان هشرف على نفس المشروع
نادر:اتبسطى ياستى هنبقا زملاء عمل
ساره:هههههههههههههه
وفجأه لقوا يوسف داخل والشرار هينط من عنيه
مدير الشركه:احب اعرفكم بالشريك الثالث فى المشروع اللى هتشرفوا عليه
قعدوا يتناقشوا فى المشروع ويوسف بيحاول على قد ما يقدر يتصرف على طبيعته لحد ما خلص الاجتماع وخرجوا
يوسف:ساره استنى عندك
ساره:نعم يايوسف محتاج حاجه
يوسف:انتى كنتى واقفه مع نادر ليه؟
ساره:اظن ان ديه حاجه متخصكش
يوسف بعصبيه:بقولك كنتى واقفه معاه ليه؟
ساره:انا مالكش حق تسألني وانا مش هقولك
يوسف:اعتبرى ده تحذير منى يا ساره،لو شوفتك بتكلميه تانى مش هيحصل طيب
ساره:انت بتكلمنى كده ليه ، ألزم حدودك لوسمحت
ساره سابت يوسف ومشيت ونور الغيره مولعه فى قلبه
