جبروت الحب بقلم آية

جبروت الحب
الحلقه العاشره
ساره كلمت فرح حكتلها كل حاجه
فرح:معقول يوسف يعمل كده وبيعمل كده ليه
ساره بعياط:مش عارفه هو بيعمل معايا كده ليه انا ليه بيحصلى كده انا تعبت يارب
فرح:اهدى ياساره وانا هكلم يوسف واخليه يتراجع عن قراره ده
فرح راحت قابلت يوسف عشان تقنعه مينفزش اللى قاله لساره
فرح:ممكن افهم ايه اللى قولته لساره ده
يوسف:هى حكتلك بالسرعه ديه
فرح:متغيرش الموضوع يايوسف ،انت ايه اللى قولته لساره ده وبتهددها كمان مكنتش متوقعه منك كده
يوسف:انا مش هعملها حاجه بالصور انا عاوزها توافق مش اكتر
فرح:هو بالغصب يعنى خلاص هى قالتلك مش موافقه
يوسف:لا هتوافق ولو حتى غصب عنها
فرح:انت بتعمل كده ليه؟وليه هى بالذات
يوسف:مزاجى كده عندك اعتراض
فرح:يوسف…انت بتحب ساره؟
يوسف:انا مش بحبها ولا هحبها
فرح:طب انت بتعمل فيها كده ليه
يوسف:كل اللى عندى انى بساعدها وحتى لوغصب عنها ..وياريت متقوليلهاش حاجه عن قعدتنا ديه،كل اللى تقوليه انى هكون عندهم بكره الساعه7
رجعت فرح وهى مش عارفه تعمل ايه عشان تساعد صاحبتها وقررت تنفذ كلام يوسف ومتحكلهاش حاجه
جه تانى يوم وام ساره بدأت توضب فى البيت عشان زياره يوسف وباباه وطبعا كانت طايره من الفرح ونفسها ساره توافق
ساره قاعده طول النهار فى اوضتها بتعيط ومش عارفه تعمل ايه ترفض وخلاص ولو رفضت يوسف ممكن ينفذ اللى قال عليه ولا توافق وتعمل اللى فى دماغها
عدى النهار بسرعه والساعه جت 7 ويوسف ود.هشام وصلوا بيت ساره وقعدوا وبعد الترحيب طبعا بدائوا يتكلموا فى موضوع يوسف وساره
د.هشام:احنا جايين طالبين ايد الانسه ساره ل ابنى يوسف
محمد: والله يا دكتور اللى اعرفه عن يوسف انه شاب محترم و كان دايما بيقف جنب ساره بنتى فى الكليه بس ادينى يومين افكر
يوسف:وايه اللى يخلينا نستنا يومين،ماخير البر عاجله وانا أقدامكم وتعرفونى كويس وسمعتنا معروفه وساره كمان تعرفنى كويس وموافقه نستنى ليه بقا
محمد:صحيح ياساره انتى موافقه
ساره:ايوا يابابا
يوسف:يبقا نقرا الفاتحه دلوقتى والخطوبه الاسبوع الجاى
محمد:ومستعجل كده ليه يابنى
د.هشام:الموضوع مش محتاج تأجيل احنا نجوزهم بسرعه ونخلص منهم بقا ولا ايه يا استاذ محمد هههه
محمد:عندك حق يا دكتور ههههههههه
يوسف:خلاص الخطوبه الاسبوع الجاى والفرح الاسبوع اللى بعده
محمد: بس كده بسرعه اوى يابنى احنا لسه محتاجين نشترى حاجات
يوسف:الشقة وجاهزه ومش محتاجه حاجه وانا مش محتاج منكم غير عروستى مش انتى موافقه بردوا ياساره
محمد:انتى موافقه على اللى بيقولوه ده يابنتى
ساره:اه يابابا موافقه
د.هشام:مادام هما موافقين يبقا ربنا يهنيهم
محمد:يبقا الخطوبه الاسبوع الجاى والفرح الاسبوع اللى بعده
عدى ساعتين وهما قاعدين يتفقوا على التفاصيل وساره قاعده حزينه ومش مهتمه بأى حاجه بيقولوها،خلصوا ود.هشام ويوسف مشيوا وساره دخلت على اوضتها وفضلت تعيط ولما هديت
اتصلت بفرح وحكتلها كل اللى حصل
فرح:انتى لو رفضتى مكنش هيعملك حاجه بالصور هو كان بيخوفك مش اكتر
ساره:انا عارفه انه مش هيعمل حاجه بس والله ل هخليه يندم على الساعه اللى خد فيها القرار ده
فرح:شكلك ناويه على الشر
ساره:هو اللى بدء والبادى أظلم
مر اسبوع وكل واحد بيمارس حياته الطبيعيه ما عدا ساره اللى قاعده على طول فى اوضتها ومش بتاكل لحد ما بان على وشها التعب،وجه يوم الخطوبه وساره وشها مطفي من الحزن، فرح عدت على ساره تاخدها البيوتى سنتر وطبعا ساره كانت رافضه تروح بس بعد اصرار مامتها وافقت وراحت مع فرح،قضوا يومهم فى البيوتى سنتر بين الماسكات والميكب والحاجات ديه ،
يوسف جه عشان ياخد ساره وكان معاه فادى(اخو فرح)،اول ماشاف ساره وقف مصدوم من شكلها كانت جميله جدا بالرغم من تعبها كانت اول مره يوسف يشوفها لبسه فستان وشعرها الطويل مفرود على ضهرها
فادى:ايه يابنى واقف كده ليه ما تروح تجيب خطيبتك خلينا نمشى ولا هنبات هنا
يوسف:هه…حاضر
راح يوسف ياخد ساره وفتحلها الباب اللى وره ودخلها ولف قعد جنبها وفرح ركبت قدام جنب فادى،ركبوا كلهم وراحوا على القاعه،دخلت ساره وهى بتحاول على قد ما تقدر انها تدارى حزنها وقعدوا وبدأت المباركات،وجه الوقت اللى هيلبسوا فيه الشبكه
يوسف:اقلعى الخاتم ده عشان البسك الدبله
ساره:لا انا مش هقلعه حطها فى الصابع التانى ولا فى اى داهيه اقولك البسها انت
يوسف:هحطها فى الصابع التانى ، بس افردى وشك بدل ما حد ياخد باله
ساره:وانت مالك
يوسف:بس انا مره اعرف انك حلوه فى الفساتين امال قرفانا ليه بالجينز ولبس الولاد ده
ساره:شكلك بتحب كلمه انت مالك
لبسوا الشبكه وفادى جه شد يوسف عشان يرقص وساره فضلت قاعده وجنبها فرح،يوسف كان طول الخطوبه عينيه على ساره،لحد ما شاف الشاب بتاع اسكندريه رايح فى طريقه للكوشه
يوسف فى سره:هى كمان عازمه حبيب القلب على الخطوبه
جرى يوسف لحد ما وصل عند الكوشه
خالد:الف مبروك ياعروسه
ساره:الله يبارك فيك
يوسف:انا جيت فى وقت غلط ولا ايه
خالد:الف مبروك ياعريس عاوزك تحط ساره فى عنيك
يوسف:متقلقش انا حططها فى عنيه مش كده ياسرسور
ساره بتعب:مبحبش سرسور ديه
يوسف:معرفتنيش على الكابتن
ساره و (التعب جاب آخره معاها):دا خالد ابن خالى….
مكملتش كلامها واغمى عليها،خالد لحقها وشالها وحاولوا يفوقوها ولما مفقتش راحوا بيها المستشفى
ام ساره:ربنا يقومك بالسلامه يابنتى
خالد:ماتقلقيش ياعمتى هتقوم بالسلامه ان شاء الله
يوسف كان واقف متابع الموقف بصمت وعقله عمال يدور ويفكر ويقول لنفسه”ياترى خالد بيحب ساره؟وساره هى كمان بتحبه ولا هى محبتش غير قاسم؟بس لو مبتحبوش ازاى تحضنه وتقله ياحبيبى حتى لو ابن خالها ساره دايما بتحط حدود مع اللى قدامها، اه بتحبه وهو كمان الخضه بتاعته ديه وقلقه عليها وشايلها ورايح وجاى بيها اكيد بيحبها”
فاق على صوت الدكتور وهو بيقول”فاقت الحمد لله هى مكانش بقالها فتره وده سببلها هبوط”
خالد:طب هى بقت كويسه
الدكتور:اه الحمد لله بس ياريت متتعرضش لضغط عصبى
الدكتور مشى وام ساره كانت قاعده بتعيط
ام ساره : ياعينى عليكى يابنتى يوم ما تيجى تفرحى متلحقيش تتهنى
خالد:اهدى ياعمتى ساره كويسه متقلقيش عليها تعالى يلا ندخل نشوفها
ام ساره:نادى على يوسف يدخل معانا يابنى
خالد:يوسف… يلا عشان ندخل لساره
يوسف:هه…حاضر
دخلوا كلهم عند ساره وكانت نايمه على السرير وفى ايديها محلول وأول ما شافت يوسف قعدت تعيط واترمت فى حضن مامتها ، صعبت على يوسف وهو شايفها فى الحاله ديه وكان حاسس انه ظلمها بالقرار ده بس بسرعه اختفى احساسه بالندم اول ماسمع خالد
خالد:اهدى ياحبيبتى مفيش حاجه حصلت لكل ده
ساره:انا عاوزه اروح بيتنا
ام ساره:ماشى ياحبيبتى ابوكى بيدفع فلوس المستشفى وهيجى ياخدنا وانت يا يوسف يابنى تقدر تروح انت تعبت معانا النهارده ابو ساره هيوصلنا بعربيته
يوسف:ولا تعبت ولا حاجه انا هستنى معاكم لحد ما تروحوا
يوسف استنى لحد ما جه ابو ساره وركبوا معاه وروحوا وركب وروح
عدى اسبوع وساره حابسه نفسها فى اوضتها ومبتخرجش ،ويوسف مبيتكلمش مع حد ومش عارف اللى بيعمله مع ساره ده صح ولا غلط