الشيطان وقع اسيرها الجزء الأخير

♡♡♡♡♡♡♡♡♡♡♡♡
-انا حاولت كتير اعوضك عن اللي عمله أبوكي فيكي…حاولت كتير اكفر عن غلطي في حقك لما سمحت ليه يأذيكي …حاولت كتير اخليكي إنسانة كويسة …واحدة محترمة وبنت ناس …حاولت كتير عشان متبقيش رخيصة زي ابوكي وللاسف الرخص بيجري في دمكم انتوا الاتنين …جوزتك لواحد البنات كلها بتتمني نظرة من عينيه …مهندس ومحترم وكان بيحترمك وربنا رزقك ببنت زي السكر ولكن رغم ده مشكرتيش ربك على نعمه وصممتي على جنانك وهوسك
كانت والدة جوري تتكلم وهي جالسة بجوار باب الغرفة التي حبست به جوري …كان قلبها يحترق …شعرت أن كل ما فعلته قد انهدم …ابنتها دمرت كل شئ …لقد ظنت أنها سوف تحاول ملاحقة ياسين كي يعود إليها …لم يخطر حتي في أحلامها أنها سوف تستخدم السحر لتجعل ياسين يعود إليها …كيف اصبحت ابنتها بهذا الاختلال كيف؟!
كانت العديد من الأفكار تدوي في رأسها…العديد من الاسئلة التي ليست لها أي إجابة ..
من الناحية الآخرى كانت جوري تجلس على الأرض والدموع تنفجر من عينيها وتقول :
-انا اسفة يا ماما …اسفة على كل اللي عملته …سامحيني ارجوكِ …أنا بس حبيت ياسين وكان نفسي يرجعلي لكن هو دايما كان بيصدني …بيعاملني كأني رخيصة ومليش لأزمة…قولتله كتير اني هتغير بس يرجع بس هو رفض وانا بحبه يا ماما …بحبه اووي …أنتِ فاكرة اني عايزة ارجعله عشان شايفاه سعيد مع مراته …بس لا أنا والله بحبه …بحبه اووي وعايزة اعيش معاه هو وبنتي …أنا عايزة اتغير يا ماما …مش عايزة أبقى وحشة ولا عايزة اكون زي بابا…أنا عايزة اكون إنسانة كويسة …زوجة كويسة لياسين وأم كويسة لبنتي…أنا اذيت ياسمين اووي يا ماما …اذيتها زي ما بابا آذاني وندمانة على اللي عملته وعايزة ابدأ من جديد يا ماما …عايزة اكون إنسانة كويسة …ساعديني ابقا.انسانة كويسة يا ماما
هزت والدتها رأسها وقالت بنبرة مخنوقة :
-لا يا جوري أنتِ عمرك ما هتتغيري …هتفضلي كده دايما زي ابوكي بالضبط …عمرك ما هتتغيري …هو زيك وعدني كتير أنه يتغير بس متغيرش …وأنتِ هتبقي زيه كده …هتوعديني مليون مرة انك هتتغيري بس أنتِ عمرك ما هتتغيري يا جوري هتفضلي كده دايما …دايما إنسانة حقودة عايزة تدمري حياة الناس اللي حواليكي ..ياسين كان جوزك …كان ملكك وبين ايديكي أنتِ اللي ضيعتيه من ايديكِ ….الراجل عانى معاكي وعمل المستحيل عشان يساعدك …بس أنتِ كنتِ مصرة تبقي وحشة مصرة تهدي كل حاجة …لحد ما كل حاجة تتهد على دماغك …سحر …بتلجأي للسحر وتكفري…وبتبيعي جسمك …تخلي واحد رخيص يلمسك ويوصلك …يا خسارة تربيتي فيكي …يا خسارة …مكنتش اتوقع انك تطلعي بالرخص ده …بس انا اللي غلطانة …أنا يا جوري كان مفروض أجيبك من شعرك واوديكي دكتور نفسي يعالج جنانك ده …بس انا دلوقتي اللي هعالجك بنفسي يا جوري …انتِ هتتحبسي هنا …مش هتشوفي الشارع ابدا ….أنا مش هطلعك من هنا ابدا ….مفيش حرية ليكي تاني وبعدها بعد ما تتأدبي تروحي معايا للدكتور النفسي يصلح الكلاكيع اللي جواكي اللي بسبب ابوكي دي
احمر عيني جوري من فرط الانفعال وصرخت :
-الكلاكيع دي أنتِ اللي عملتيها فيا مش بابا أبداً ….صحيح آذاني كتير بس أنتِ اذيتيني اكتر منه …أنتِ اللي كل ما اعمل حاجة غلط مهما كانت صغيرة تفكريني بيه وتقولي اني هطلع زيه ….زرعتي الفكرة دي في راسي …فهمتيني أن عمري ما هبقى سوية بسببه …أنتِ السبب يا ماما أنتِ السبب …أنتِ اللي دايما بتفكريني بيه …دايما بتقوليلي اني شبهه …محاولتيش حتى تخليني أنساه …دايما حاطاه بيننا …
-انا …أنا حاولت كتير اني اعالجك من جنانك زي ابوكي ..
صرخت والدتها وهي تضرب الباب بقوة لتصرخ جوري بقوتها وقد شعرت بأن جوفها يحترق .. :
-انا مكنتش عايزة دكتور …أنا كنت عايزاكي تحبيني …
-انا مكنتش بحبك يا جوري …بعد اللي عملته ده كله طلعت مبحبكيش ؟!
بكت جوري وقالت:
-لا محبتنيش…دايما بتفكريني بيه …حاطاه بيننا وبتقارنيه بيا انا ..أنا ذنبي ايه اتحمل ده كله ولا عشان أنا بنته ….ليه تحمليني نتيجة غلطتك انتِ انتِ اللي اختارتيه مش أنا …مش أنا خالص …
-بس …بس اخرسي….متبرريش فشلك وجنانك …أنا مش مسئولة على حاجة …انتِ السبب يا جوري …انتِ السبب …و…
فجأة توقفت عن الكلام وهي تسمع صرخة جوري والزجاج.ينكسر …
-جوري !!!
قالتها هي برعب ثم نهضت وفتحت الباب بسرعة لتصرخ وجوري تضربها بالمقعد الخشبي على وجهها…
وقعت والدتها أرضا وهي غارقة في دماءها لتهرب هي متجهة الى المكان الذي برأسها!!!
……..
كان جالس على الأريكة وهو يضمها إليه ويقبل رأسها …
-ايه رأيك نجيب ياسمين بكرة من عند حماتي …اصلها وحشتني أووي …
قالتها ورد وهي تنام على صدره وتنظر للتلفاز…
-ماشي نجيبها يا حبيبي …
-بحبك وانت رايق كده …
ضحك ياسين وقال:
-محسساني اني أربعة وعشرين ساعة مجنون …
ضحكت هي وقالت:
-لا العفو يا أخويا …انت سيد العاقلين …
نظر إليها ورفع وجهها وقال :
-أنا مجنون بيكي وبس …
ثم اقترب ليقبلها ولكن رنين جرس المنزل اوقفه …
ابتعد عنها بضيق وقال:
-مين الغلس ده بس ؟!
نهض وفتح الباب ليتراجع قليلا وهو يرى جوري هي ترتعش وكفها مخضب بالدماء :
-انا قتلت ماما …قتلت ماما يا ياسين !!
قالتها وهي تضحك بجنون!!
♡♡♡♡♡♡♡♡♡♡♡♡
في المساء …
في عيادة الطبيب النفسي….
كان جالس وهو يشعر بالضياع…..عينيه.لامعة بالدموع بينما يقول :
-حضنتها يا دكتور …قولتلها اني آسف بس هي مشيت وسابتني …قلبي اتكسر وانا شايف بنتي بتبعد عني بالشكل ده …بس قلبي واجعني اكتر وانا عارف ومتأكد اني أنا السبب في كل ده …أنا اللي بعدتها عني بالشكل ده …أنا السبب في كل ده يا دكتور …أنا السبب …
-طيب حابب تتكلم عن السبب الاساسي اللي خلاك تعامل بنتك بالشكل ده ؟!مستعد تتكلم عن الموضوع ؟!
نظر كريم الى الطبيب وهو يزدرد ريقه بصعوبة ولكنه قال :
-ايوة يا دكتور مستعد أنا عايز اتكلم عن الموضوع …
ابتسم الطبيب وقال:
-جميل اتكلم يا كريم .
نظر كريم إلى الطبيب وداخله يرتعش بشدة …
-مراتي خانتني ….خانتني …
قالها بصعوبة شديدة كأنه يلفظ أنفاسه الآخيرة ثم نظر إلى الطبيب ليرى رد فعله ولكن ملامح الطبيب كانت غير مقرؤه فقط ينظر إليه ويحثه على أن يكمل كلامه …
فرك كريم كفيه ببعض والتوتر ارتفع داخله …شعر أن دقات قلبه تتسارع ….والألم يعصف به من الداخل …أنه من المؤلم أن يتذكر ما حدث مجددا …مؤلم جدا أن يعيش نفس الشعور!!
تنهد بقوة وهو يكمل :
-كانت بتجيبهم البيت عندي وانا كنت زي العبيط مش عارف اي حاجة …كانت بتستغفلني …كنت بثق فيها اكتر من نفسي …وبحبها اكتر من نفسي …عشان كده كانت صدمتي كبيرة لما اكتشفت خيانتها …
صمت قليلا وقد مسح الدموع التي انسابت من عينيه وأكمل بإختناق :
-في يوم رجعت البيت وعرفت أن بنتي عند الجيران ومراتي قالت إنها رايحة مشوار كنت مش فاهم حاجة وحاولت اتصل بيها بس تليفونها كان مقفول وبعدين قريت رسالة منها بتقول انها مبقتش تحبني وانها عايزة تتطلق ..مكنتش فاهم اي حاجة ..وليه هي عملت كده ..اتصلت بأهلها اللي برضه مكانوش فاهمين اي حاجة
قعدت يومين وانا مصدوم ومنهار …بدور عليها زي المجنون وانا نفسي اسألها هي ليه عملت كده ليه ؟!كنت مصدوم ومش فاهم اي حاجة …أنا وهي كنا مبسوطين اووي مع بعض …محرمتهاش من حاجة ولا خنقتها بزيادة ومعانا بنت زي القمر. ..حياتنا كانت حلوة اووي وفكرت أنا عملت ايه عشان تقول كده او تهرب مني …لحد ما في يوم جالي اتصال من الشرطة أنهم لقيوا مراتي …وأنها ماتت في حادثة . .لسه فاكر اليوم ده …اليوم ده كان أسوأ يوم في حياتي يا دكتور…حسيت الأرض بتتهز تحتي …اتصدمت وقلبي وقع في رجلي من الخوف. ..بس الصدمة الأكبر لما اكتشفت انها لما ماتت في حادثة كانت في عربية عشيقها وكانوا هربانين مع بعض …عرفت ده من موبايلها والرسايل اللي قريتها ما بينهم …أنا يا دكتور لسه محتفظ بالموبايل ده عشان كل أما افتكر اني كنت بحبها اشوف الرسايل وافتكر أنها خانتني مع كلب ميسواش …كنت بقسي قلبي عشان متوحشنيش …كنت بعلم نفسي اكرهها زي ما حبيتها …لدرجة …لدرجة اني كرهت بنتي بسببها …
دموعه انفجرت من عينيه وهو يكمل بإختناق :
-الكل بيقول أن نسرين شبهي …بس انا طول عمري بشوفها شبهها هي …نفس النظرات …نفس الحركات ونفس الجمال والرقة …عشان كده بعدت عن نسرين …أنا عاقبت بنتي عشان مقدرتش اعاقب الخاينة على خيانتها …أنا بشع يا دكتور ….أنا مش اب كويس….
ثم أنفجر بالبكاء …كان يبكي بمرارة وهو يتذكر كيف أنه أذى ابنته …كيف ابعدها عنه …
-انا عايز بنتي ترجع تحبني يا دكتور …عايزها تشوفني أمانها من جديد …مش عايز اشوف الكره في عينيها تاني عشان ده بيعذبني …ممكن ده يحصل ولا افقد الأمل خلاص !
تنهد الطبيب وهو ينظر إليه وقال:
-مفيش حاجة مستحيل …بس أنت مستعد تعمل ايه عشان تخليها تثق فيك تاني ده اللي هيحدد …بس المهم متبقاش شايفها زي مراتك …تكون شايفها كبنتك…بنتك اللي ملهاش أي ذنب …مشكلتك يا كريم هي الغضب …أنت غضبان عشان مقدرتش تعاتب مراتك او تعاقبها فشوفت أنك تعمل كده مع النسخة الأصغر منها وهي بنتك ورغم أنك اتجوزت اخت مراتك الا أنك فضيت غضبك على بنتك …
قاطعه كريم وقال:
-نهى مختلفة عنها خالص …مكانتش شبهها …كأنهم مش أخوات …
هز الطبيب رأسه وقال:
-فهمت ….أنت لسه عايش في الماضي يا كريم …مش سامح لنفسك أنك تنسى وتتعافى واعتقد دي مشكلتك وده اللي هنحاول نحله سوا …كل حاجة هتكون بخير متقلقش .
♡♡♡♡♡♡♡♡♡♡♡♡♡♡♡
في اليوم التالي ….
فتحت جواهر عينيها لتجد عبير نائمة بجوارها …عبير منذ أتت وهي لا تتركها ابدا مهما حاولت جواهر معها لكي تذهب … ولكنها عنيدة …حتى عدي لا يتركها الا فقط عندما يذهب لعمله….
نهضت جواهر وخرجت من الغرفة وهي تتجه الى الأريكة التي اعتادت ان تجلس عليها والدتها …وقالت:
-ليه ميكونش ده حلم …ليه ميكونش كابوس …أنا محتاجلك يا ماما….
-وأنا دايما معاكي يا جوهرتي .
نظرت جواهر بجانبها لتجد والدتها تجلس بجانبها ….
-ماما ..
قالتها والدموع تطفر من عينيها ثم أكملت :
-ماما أنا مش قادرة اعيش من غيرك …تعالي خديني …
ابتسمت سوسن وقالت:
-هتقدري وهيخف الألم اللي في قلبك يا جواهر وهتفرحي …
هزت جواهر رأسها وقالت:
-الحياة مبقتش ليها قيمة من بعدك…اكتشفت اني مش قادرة اعيش …مفيش حاجة مفرحاني ولا حد قادر يملى مكانك يا امي …عبير مش سايباني ورغم كده حاسة اني وحيدة بقول ياريت اموت وارتاح عشان اشوفك …نفسي اروحلك يا ماما …نفسي حتى احضنك او ابوسك ….
اقتربت سوسن من ابنتها لتغمض جواهر عينيها وهي تشعر بقبلة والدتها الحنونة على جبينها …ثم فتحت عينيها لتجد والدتها اختفت …نظرت حولها بجنون…هل كانت تتخيلها معقول ؟!!
رنين الجرس جعلها تنتفض من مكانها نهضت وذهبت لتفتح الباب ….نظرت من العين السحرية لتجده والدها …فتحت الباب بسرعة بلهفة واندفعت بين احضانه تبكي بعنف ….
ربت عامر على ضهرها برفق وقال:
-شدي حيلك يا بنتي …شدي حيلك …
-انا بقيت لوحدي …ماما سابتني ومشيت ….
ابتعد عامر عنها وأمسك كفها وقال:
-اهدي يا بنتي …خليني بس ادخل عشان هقولك كلمتين وأمشي…
نظرت إليه بدهشة ومسحت دموعها بينما يدخل المنزل ويجلس على الأريكة …ذهبت هي وجلست بجواره وقالت:
-تمشي…تمشي ليه..خليك معايا شوية …أنا ..أنا …
-جواهر اسمعيني وبس ومن غير ما تقاطعيني …ربنا يعلم ان اللي هقوله ده صعب عليا قد ما هيبقى صعب عليكي ….
-انت بتقول ايه يا بابا ؟
قالتها ببلاهة وهي لا تفهم شئ …تنهد عامر وهو يتذكر وعده لسوسن ثم نظر الى جواهر وقال:
-أنا مش أبوكي الحقيقي يا جواهر!!