نفوس قاسية الجزء الرابع

حدق بها حمدي وقال:
– هدى أنتِ متأكدة من قرار الطلاق اللي مصممة عليه دا واعية إن لما تطلقي من محمود هتبقى دي المرة التانية ليكِ.

تنهدت هدى بحزن وقالت:
– مش مهم تانية ولا تالتة لأني خلاص قررت أعيش لابني وبس هو دا اللي أبقى لي في الدنيا، ياسين ابني هو اللي هيكون سندي بعد ربنا اللي مش هشحت منه الحب ولا هيحبني على أني واحدة تانية، أرجوك يا خالو بلاش نفتح الموضوع دا تاني محمود خلاص كان صفحة ف حياتي واتقطعت.

————–

ولج آدم إلى مكتبه وسهر تتأبط ذراعه وقد زينت وجهها ابتسامة هادئة، فشاهد آدم هاني وهو يحدق بوجه منال بهيام ولم ينتبه لهما، فوقف يراقبهما هو وسهر فابتعدت سهر عن آدم ووقفت بينهما وقالت:
– ها يا تري وصلتم لحد فين؟ وبقى معاكم كام ولد لحد دلوقتي؟

ارتبكت منال وحملقت بوجه آدم بخجل ووقفت سريعًا وقالت بارتباك واضح:
– الدكتور هاني منتظر حضرتك من بدري.

عبس هاني حين سمعها تتحدث عنه كأنه غريب عنها فقال موجها حديثه إليها بحدة:
– أنا جوزك يا منال وبعدين آدم عارف هو سهر أننا كتابين كتابنا يعني مافيش داعي تقولي دكتور دي بعدين أنا وآدم صحاب.

أحست منال بالحرج من تأنيب هاني لها في وجود آدم وسهر فأطرقت بوجهها أرضًا، ولاحظتها سهر فأشارت إلى آدم الذي سارع باصطحاب هاني معه إلى الداخل، اقتربت سهر من منال ومدت يدها ترفع وجهها فرأت الدموع تترقرق بعينيها فقالت معتذرة:
– معلش يا منال متزعليش من هاني هو كده طول عمره مدب وبيحدف الكلام من غير ما يلاحظ رايح فين خلاص، حقك عليا أنا دلوقتي هدخل اقرصلك ودنه واخليه يجي لحد عندك يعتــ.

اوقفها هاني عن إكمال حديثها بوقوفه أمام منال فانسحبت سهر من بينهما، فأحاط هاني كتف منال وقال:
– أنا آسف انفعلت عليكِ غصب عني أصل بصراحة اتغظت لما قولتي دكتور بس أنتِ معاكِ حق دا مكان شغل ولازم تبقي مصحصه.

رسمت منال ابتسامة على وجهها ولكنه أحس أنها مازلت متأثرة بسببه، فمال على أذنها وهمس بحب:
– ما تيجي معايا أصالحك براحتي بدل ما حد تاني يدخل علينا و.

قطع على هاني حديثه صوت مازن يقول بمرح:
– والله ما انتو متحركين أنا اللي شكلي جيت فوقت مش مناسب.

ابتعدت منال عن هاني بحرج ونظرت له عابسة وقالت بهمس حتى لا يسمعها مازن:
– عجبك كده الإحراج اللي احنا فيه اتفضل بقى شوف أنت رايح فين وسبني أشوف شغلي.