ليلى الجزء الثاني
خالد:عاجبك كده؟
ليلى:هو ايه اللي عاجبني؟
خالد:الشاب اللي طلبك للرقص؟
ليلى:طيب وايه ذنبي انا ده اجنبي ومعرفوش
خالد:بصراحه لبسك ملفت اوي
ليلى:على فكره لبسي ده بلبسه ادام بابا وماما عادي
خالد:بس انتي هنا لوحدك من غيرهم
ليلى بصت في عينيه وقالت:انت معايا
خالد وشه احمر وسكت معرفش يقولها ايه بس حس انه فرحان ان ليلى بتعتبره امان معاها………………..
فات اليومين اللي بعد كده في المعرض وكتر عدد الناس اللي بتحجز وكان يوم الخميس هو يوم الحفله وبالليل السفر للقاهره وطبعا ليلى مكنتش عارفه ان هيكون في حفله فقررت تنزل تشتري فستان سواريه فنزلت يوم الاربع بالليل من غير ما تقول لخالد وركبت تاكسي وراحت مول الامارات ودخلت كام محل للفساتين السواريه وعجبها كذا فستان بس البياعه قالتلها ان الفستان الفوشيا احلى واحد وكان فستان قصير ونازل على ضيق وليه فتحه من ورا وصدره مفتوح على شكل قلب وكل الصدر عليه خرز على شكل لؤلؤ ابيض صغير
واشترت شوز فوشيا شنطه صغيره فوشيا فيها خطوط بيضا وخرجت من المحل ركبت تاكسي ورجعت الفندق واول ما دخلت اوضتها رن تليفون الاوضه فجريت ترد:
خالد:الو
ليلى:الو يا خالد
خالد:كنتي فين؟
ليلى:كنت بشتري حاجه
خالد:خرجتي مع ايهاب مش كده؟
ليلى:لا يا خالد انا كنت لوحدي
خالد:انتي بتخبي عليه ليه؟
ليلى:انا مش بكذب يا خالد
خالد:انا آسف اصلي ملقيتوش في اوضته
ليلى: يمكن راح يقابل اصحابه
خالد:طيب انتي هتعملي ايه دلوقتي؟
ليلى:انا هنام
خالد:بدري كده؟
ليلى:ايوه يا خالد تصبح على خير
خالد وهو حاسس بالذنب : وانتي من اهله
وفضل خالد زعلان من نفسه وهو قاعد رن تليفون اوضته فرد بسرعه يمكن ليلى:
خالد بلهفه:الو
ساره:الو حذر فزر انا مين؟
خالد وهو مش طايق نفسه:اهلا يا ساره جيتي امتى؟
ساره:لسه ايهاب جايبنا من المطار دلوقتي
خالد:طيب حمد لله على السلامه, باباكي فين؟
ساره:بابا تحت بياخد قهوه مع ايهاب
خالد:طيب انا نازل تحت
ساره: هغير واحصلك
خالد:اوكيه سلام
ساره :باى
الفصل الثالث والعشرون
يوم الحفله نزلت ليلى عشان تعمل شعرها في الصالون الموجود في الفندق وبعد ما خلصت شعرها طلعت اوضتها عشان تلبس وهي في الاسانسير قابلت ساره:
ساره:مش انت الموظفه الجديده عند بابي في الشركه؟
ليلى:ايوه انا
ساره:انتي عامله شعرك كده ليه؟
