ليلى الجزء الثاني
ايهاب:مكنتش متخيل ان العدد ده يحجز اول يوم
خالد:الحمد لله, ده كله شغل ليلى
ايهاب:متشكر يا ليلى
ليلى:ده شغلي انا معملتش حاجه جديده
ايهاب:ايه رأيكوا نروح نسهر في مكان حلو اوي انا عارفه؟
ليلى:مش عارفه , ايه رأيك يا خالد؟
خالد:انا تعبان وعايز انام وانتي لو حابه تسهري روحي
ليلى اتغاظت منه عشان مرضيش يروح معاها واحرجها ادام ايهاب فقررت تغيظه :
ليلى:خلاص اوكيه انا هطلع اجهز وانزل يا ايهاب
ايهاب:نتقابل كمان ساعه هنا
ليلى:اوكيه, عن اذنكوا
وطلعت وسابتهم فايهاب قال لخالد:
ايهاب:انت مش عايز تيجي ليه ده مكان حلو اوي؟
خالد:بجد مش قادر
ايهاب:طيب انا هروح اغير هدومي عن اذنك
خالد:اتفضل
فضل خالد واقف مش عارف يعمل ايه وادايق ان ليلى هتخرج مع ايهاب لوحدهم والمفروض كانت تعتذر مش تروح معاه وبعد كده ندم انه رفض يروح وخصوصا انها سألته قبل ما توافق بس خلاص هيعمل ايه؟؟؟؟؟؟؟
طلع خالد اوضته وفضل يبص من العين السحريه لغاية ما ليلى خرجت من اوضتها وكانت لابسه فستان قصير بينك وكان شكلها زي القمر ونزلت ليلى وفضل خالد يتمشى في الاوضه وفي الآخر قرر ينزل يشرب فنجان قهوه تحت وفضل قاعد لغاية الساعه 12 وليلى لسه مرجعتش وكان هيتجنن من الغيره ومش عارف يطمن عليها ازاي فقرر يطلع اوضته……………
الفصل الحادي والعشرون
في الوقت ده كانت ليلى وايهاب في فندق حبتور قاعدين فيXL ديسكو وهو مكان جميل جدا عالبحر ويعتبر كافيه وهناك القعده كلها عباره عن سراير عالبحر وفي جزء عباره عن اوض مقفوله للي عايز يقعد بعيد عن الناس وهناك قابلو شله من اصحاب ايهاب اللي كان لابس جينز ازرق وعليه قميص ابيض نص كوم وكان شكله وسيم جدا و اصحابه شويه منهم عرب وشويه اجانب بنات وولاد وليلى اندمجت معاهم وهما طلبوا منها تقابلهم تاني قبل ما ترجع مصر وليلى كان اول مره تسهر للوقت ده بس كانت متصله بباباها وواخده منه الاذن وعلى الساعه 12 اتصل بيها وقالها تروح عشان شغلها تاني يوم وففعلا استأذنت من ايهاب عشان يرجعها الفندق وسلمت على اصحابه ومشيوا ووصلها ايهاب لغاية الاسانسير وهو راح يتكلم في الموبايل وطلعت ليلى وهي مبسوطه جدا وكانت الساعه واحده بعد نص الليل واوي ما وصلت عند باب اوضتها ولسه بتدخل المفتاح لقيت صوت وراها:
خالد:ما لسه بدري
