ليلى الجزء الثاني
ليلى فضلت قاعده في اوضتها مستنيه تليفون باباها يرن عشان خالد يتصل بيه زي ما قالها وفضلت مستنيه لغاية الساعه 9 بالليل ما اتصلش فقلقت عليه اوي بس طبعا مرضيتش تتصل بس عرفتش تنام طول الليل…………………….
الفصل السابع والعشرون
الصبح في الشركه وصلت ليلى وهي شكلها مرهق عشان مانامتش كويس ودخلت على مكتب مروه :
مروه:ايه ده مالك؟ عملتي ايه امبارح؟
ليلى:معملتش حاجه
مروه:ازاي؟
ليلى:متصلش
مروه:معقوله !!!!!! اكيد في حاجه عطلته
ليلى:ما ده اللي قالقني يا ترى ايه اللي عطله
مروه:ده حتى اتأخر انهارده
ليلى:لسه ما جاش؟
مروه:لسه
ليلى:اتصلي بيه
مروه:كلمته عالموبايل لقيته مقفول
ليلى:طب اتصلي فالبيت
مروه:هستنى كمان نص ساعه واطلبه فالبيت
وهما قاعدين يتكلموا دخلت ساره وهي لابسه جينز ضيق وبادي حمالات وشكلها فرحان اوي:
ساره:صباح الخير يا مروه
مروه:صباح الخير
ساره:اخبارك ايه؟
مروه:تمام, مش هتسلمي على ليلى؟
ساره:ايه ده مخدتش بالي , ازيك
ليلى:الحمد لله, عن اذنكوا
ساره:لا استني رايحه فين؟
ليلى:خير؟
ساره:مباركتوش لخالد؟
مروه:ليه ؟
ساره:هو المفروض تباركوله مرتين مره عشان اترقى بقى مدير لكل الفروع والتانيه………….( وهي بتبص لليلى)عشان خطبني
مروه:خطبك؟ امتى ده؟
ساره:ايه مش مصدقاني ولا ايه؟
مروه:مش قصدي بس حصل كل ده امتى؟
ساره بصت لليلى:مش هتقوليلي مبروك
ليلى مكنتش سامعه حاجه والدنيا لفت بيها وودانها كان فيها صفاره ومحستش بحاجه بعد كده…………………
فاقت ليلى لقيت نفسها مروه بتحاول تكلمها:
ليلى:انا فين؟
مروه:انتي فمكتبي, مالك ايه اللي حصل؟
ليلى:ابدا ,انا هروح
مروه:مش هسيبك تسوقي وانتي في الحاله ده
ليلى:معلش يا مروه سيبيني محتاجه اكون لوحدي
مروه:على فكره انا مش مصدقه ساره ده خالص
ليلى:من فضلك مش عايزه اتكلم فالموضوع ده
وخرجت ليلى من الشركه ركبت عربيتها وراحت البيت كان باباها ومامتها في الشغل وده كان احسن بالنسبه ليها فدخلت اوضتها وقعدت عالسرير ولقيت الكاميرا بتاعتها عالمكتب فراحت مسكتها وقلبت في الصور اللي اتصورتها في دبي مع خالد وحست انها كانت في حلم جميل وصحيت منه على كابوس وقعدت تعيط ……………………..
الفصل الثامن والعشرون
بعد ما فات سنه على اليوم اللي قابلت فيه ليلى ساره وقالتلها انها اتخطبت لخالد ليلى بعتت استقالتها عالايميل ولما ايهاب عرف عرض عليها تشتغل في شركة باباها ولما سألها عن طلبه للجواز منها قالتله انها مش بتفكر في الجواز دلوقتي وطلبت منه يبقوا اصدقاء وفعلا ايهاب وافق بس كان عنده امل انها هتحبه مع الايام وفضلت ليلى طول السنه ده تحاول تنسى حبها لخالد اللي قررت تبعده عن تفكيرها وتركز في شغلها بس كانت بتحلم بيه كتير اوي ساعات بيضحك وساعات زعلان وطبعا مقدرتش تبعده عن احلامها…………..
