خادمة في عصر اللذة الجزء الثاني

كريم تنهد بتعب وقال:حاسس ان مرضى بيقل جوايا من ساعت مشوفتها..عينها بتدينى الامان..عايزها جمبى يابابا..مش هتفهمنى..بس ارجوك ساعدنى..انا بجد عاوز اتجوزها..الصوت اللى بسمعه تاثيره قل..والتشنجات مش بتجيلى.لو حسيت بالامان معاها..انا بنفسى هروح عند الدكتور علشان اتعالج
حسين ضحك وخد ابنه ف حضنه وقال:هجوزهالك ياكريم…انا متاكد انها الاختيار الصح..ومش هندم ولو لثانية انى عملت كدة..ع خيرة الله يبنى
كريم:ربنا يخليك يابابا
ف فلة مها وفواز
حيدر:بتترعشى كدة ليه؟!
نسمة:مش هقدر ياحيدر
حيدر:خلاص احنا وصلنا…متخا.فيش انا جمبك..ومش هيقدروا يعملوا حاجة
نسمة:ربنا يستر

الحلقة 11
ف فلة مها وفواز
طق طق
الخدامة:اهلا ياحيدر بيه البيت نور
وبصت للى واقفة معاه ب استغراب ومعلقتش
حيدر:خدى الشنط وطلعيها فوق وهاتى حد من الخدم علشان يساعدك
الخدامة:هى الشنط دى بتاعت مين؟!
حيدر:مش شغلك..اعملى اللى بقولك عليه من غير نقاش..اومال فين ماما وبابا؟!
الخدامة: فواز بيه ف الشركة ومها هانم مع صحابها ف الصالون تحب اديها خبر
حيدر:متشكر..انا هروحلها بنفسى
ومسك ايد نسمة وقال:تعالى معايا
نسمة بقلق:لا ياحيدر ارجوك بلاش تعمل كدة..بلاش تحرجها قصاد الناس اللى عندها..انا بقول انك تمهد الموضوع وتتكلم معاها وانا مش موجودة افضل بعد كدة عرفنى عليها بلاش نخش عليها فجاه كدة
حيدر:مع انى مش مقتنع بس تمام هعمل اللى عاوزاه…يسرية
يسرية:نعم يابيه
حيدر:ورى نسمة هانم الاوضة بتاعتى وحطى هدومها ف الدولاب..مش عايزها تعمل اى حاجة حتى لو هى اللى طلبت منك كدة.مفهوم
يسرية بصدمة:اوريها اوضة حضرتك! هى اسم النبى حارسها نبقى مراتك؟!
حيدر:ايوة مراتى..نسمة روحى معاها..ولو عوزتك هطلب حد من الخدم علشان يجيبك..غير كدة تفضلى ف اوضتك
نسمة:حاضر.علشان خاطرى ياحيدر براحة…دول اهلك بردو..وبالوالدين احسانا..مش انا اللى اقولك..اظن انت فاهم كويس
حيدر مسك ايدها جامد كانه بيطمنها..هى ضحكت وبصت ليسرية اللى فعلا مصدومة وبتدعى ف سرها ان الموضوع دة يخلص ع خير
نسمة:ههههه انتى هتفضلى مبلمة كدة كتير..يلة خلينا نطلع
يسرية:معلش يانسمة هانم..اتفضلى معايا
ف الصالون
مها اول م شافت حيدر جريت عليه وحضنته جامد
وقالت بفرحة:مش كنت تقول انك جاى؟! وحشتنى اوى ياحبيبى..متتصورش انا كنت متضايقة اد ايه وانت مش موجود ف البيت
حيدر:لا مهو باين انك فعلا مش مبسوطة..ماما هو انتى متعرفيش ان عمى مات؟!
مها بلعت ريقها بصعوبة وقالت:عمك..عمك مين؟!
حيدر:عمى احمد ياماما..بجد حاجة تكسف ازاى مروحتيش تعزى بنته؟!.هى دى الاصول اللى ربيتينى عليها
مها بصدمة وصوت متقطع: انت عرفت منين انك ليك عم وعنده بنت كمان..اكيد بيكدبوا عليك؟! انت معندكش عمام غير عمك حسين وصبرى بس
حيدر:خليكى ذكية ياماما…ف حاجة اسمها بطاقة وبنته اسمها نسمة احمد عبدالحميد النصر…خلاص الحقيقة ظهرت..ومفيش داعى انك تكدبى..علشان قيمتك مش تتهز قصادى
مها حطت ايدها ع وشه وقالت بكدب:اكيد غسلولك دماغك علشان انت طيب وغلبان..اه عندك عم اسمه احمد..بس صدقنى هو راجل مش كويس..كان عايز ياذى اخواته وكان طمعان ف حقهم ولما فواز عرف بالموضوع دة وواجهه انكر وعرفنا انه متجوز من ورانا وهى اللى سخنته ع اخواته..وجدك الله يرحمه خيره بينا وبينها اختارها هى وراح عاش ف المكان اللى يستحقه..وبالنسبة لمرضه دة عقاب ربنا ليه علشان اللى عمله فينا..وبالنسبة لبنته احنا حاولنا معاها كتير علشان تيجى وتعيش معانا بس شرطنا عليها تنسى ابوها خالص بس هى رفضت تصور هى شغالة ايه؟! دى شغالة رقاصة اكيد هتسالنى عرفت منين؟! انا رقبتها فترة وعرفت اللى عرفته..تفتكر ناس زيهم نستاهل الشفقة لا دول يستاهلوا الشنق ف مدان عام
حيدر بصدمة نزل ايد امه من ع خده وقال:حاسس انى بشوفك ل اول مرة..للدرجادى شغلى خد من وقتى ومخلنيش اعرفك ع حقيقتك..للدرجادى بتكرهوا اوى كدة..الله يرحمه كان ف وشه نور يخلى اى حد يشوفوا يحبه..الراجل مكنش عايز اى حاجة من الدنيا دى غير انه يطمن ع بنته..فضل يحارب المو…..ت علشانها ولما حس انه خلاص اطمن استسلم للم،ـ,ـوت وراح للى ارحم منى ومنك…مكنش عايز حقه اتنازل عنه بسهولة علشان مش عايز مشاكل معاكوا..وبالنسبة لبنته من جواها صالحة ع فكرة بس من قسوتكوا عليها خليتوها تمشى ف طريق كارهاه..ولما جتلها الفرصة انها تبعد عن الطريق دة بعدت وانتقبت علشان تستر الجسم اللى اتعرا غصب عنها..هى اه ضعيفة علشان اختارت اسهل طريق بس هى واحدة ست واكيد معرفتش تفكر كويس..ربنا بص ع قلبها اللى بيصرخ علشان يصفى من السواد اللى كان جواه..وربنا اكيد كان راضى عنها علشان انعم عليها باللى هى فيه دلوقت..بس خلاص ياماما عمى مات عمى اللى ظلمته لمجرد انه حب واحدة فقيرة بجد محدش بيتعظ ابدا..تفكيركوا بقا سطحى ورخيص.. بس بنته عايشة ع وش الدنيا..وحقها هتاخده..
مها برقت عنيها بصدمة من كلام ابنها…لسانها اتشل ومش عارفة تتكلم..حست انه خلاص ابنها هيقف ضدها علشانها
مها:انت عرفت كل دة منين؟!
حيدر:ماما..جدى كان كاتب ف الوصية بتاعتوا ان عمى احمد ليه نصيب ف الارض والشركة مش كدة؟!
مها بكدب:معرفش
حيدر:ماما خافى ربنا وقولى الحقيقة
مها:قولتلك معرفش..عندك ابوك اتكلم معاك انا مليش دعوة
حيدر:تمام..طالما ملكيش دعوة يبقى خلاص مش من حقك تعلقى ع جوازى سواء بالقبول او الرفض..وافتكرى انك قولتى دة بنفسك مش انا اللى قولته
مها بعصبية:جوازك!..انت اتجوزت من ورانا ياحيدر دى اخرت تربيتنا فيك..يانهار ابيض..انت اتجوزت
حيدر:اتجوزت اللى ف دماغك ايوة ياماما نسمة…ومش عايز اى كومينت خالص…انا حر واعمل اللى عاوزه