مبخلفش بقلم سارة رجب
باصلى وهو بيحاول يكون شجاع وقالها عادى كده، انتى طالق ..
محاولش يشدنى لحضنه ويصرخ ويرفض كل اللى بيحصل ويقول اننا هنفضل مع بعض لحد مانموت، مفكرش يسألنى عن كل اللى وجعنى ويقرر يمحي كل ده ويقولى انه كان غلط وفاق من غلطه.
خرجت من عند المأذون بس وقفنى وادانى 5 الاف جنيه هما المؤخر بتوعى، خدتهم وقولتله ان دول مش كل حقوقى اللى عنده، رد عليا وقالى انه ميقدرش يدينى العفش، لان ظروفه متسمحلوش انه يجيب غيره، وسألته ايه الحل فى كده؟، قالى مفيش حل لو اتوفر معايا فلوس فى اى وقت هحاول اديكى قيمة العفش، وطبعا ده كلام فى الهوا مش حقيقي ومش هيحصل منه حاجه، خرجت من جوازى منه 10 سنين ب 5 الاف جنيه، يابلااااش!!
رجعت للاوضه اللى فى بيت الشيخ محمد، بس كنت راجعه اقوى، احساس الحريه حلو، بس فى حالتى دى مش اوى بس اهو احسن من اللى كنت لسه هعيشه لو فضلت على ذمته ومرميه فى شقة امه….
نمت وفضلت نايمه لحد الصبح وصحيت على صوت خبط الباب فتوقعت انها بنت الشيخ محمد جايبه الفطار كالعاده فقومت بنشاط وفتحت الباب وكانت الصدمه انه الشيخ محمد هو اللى على الباب مش بنته، كنت لابسه عبايه نص كوم وبشعرى، بس احترامه انقذ الموقف لانه كان واقف بعيد عن الباب وبجنبه وباصص فى الارض وانا اول ما لمحته دخلت جرى ولبست وبعدها طلعتله، اتأسف انه طلع من غير مايبعت بنته الاول بس كان عايز يتطمن عملت ايه امبارح
انا: اتطلقت، ومحتاجه من حضرتك تشوفلى شغلانه اى شغلانه اصرف منها على نفسي وكفايه عليكم كده متكفلين بأكلى وشربى وحاسه انى بقيت عبئ عليكم.
الشيخ محمد بدفاع: مين اللى قالك.كده بقى هو احنا اشتكينالك!!
انا: بس لازم الانسان يكون عنده دم، وانا بجد محتاجه اشتغل واعتمد على نفسي من هنا ورايح.
الشيخ محمد: اللى تشوفيه وبيتى هيفضل مفتوحلك لحد مالاقيلك شغل وتشتغلى، بس بشرط واحد
انا: ايه هو؟
الشيخ محمد: ماتنزليش وتدورى على شغل بنفسك ابدآ، انا اللى هدور واول ماهلاقى هقولك.
بعد الكلام ده بينا عدت ايام كتير اوى وكل ماتجيلى فرصه اسأل الشيخ عن الشغل يقولى انه لسه مالقاش ليا حاجه مناسبه وانه هيدور تانى، فضلت الايام تعدى على الحال ده لحد ماعدا 3 شهور وهو لسه مستمر انه يبعتلى اكل وانا كنت بنزل كل كام يوم اشترى اكل ليا وليهم واخبط عليهم اديهلهم وبطلع اوضتى وانا اسعد واحده بس عارفه ان عمرى ماهقدر اوفى حق الناس دى عليا، ده انا حتى عرضت عليه اكتر من مرة ادفع ايجار الاوضه بس كان رافض تمامآ ومش بيديلى حتى فرصه اتكلم كتير فى الموضوع، انا مبسوطه ان لسه فى ناس كده وبالكرم ده.
