خلف الظلال الجزء الثالث بقلم يسرا مسعد
اخرجت امانى رزمه من الاوراق كانت فى حقيبتها وقالت : بصى لقيت ايه وانا بدعبس فى ملفات الشركه عندنا …عشان تعرفى ..ربك مابيضيعش حق حد ابدا
هاله بقلق : لقيتى ايه ؟؟
امانى بفرح: ملفات الحسابات الاصليه اللى ماتلعبش فيها ….اللى لو كانت ظهرت كنتى استحاله تدخلى السجن… وكانت ساعاتها اللى هتدخل السجن واحده اسمها منال السيد ..سبحان الله انتى اسمك هاله السيد …ودى اسمها منال السيد
اتسعت عينا هاله دهشه : دى مرات عادل ..دى صاحبتى اللى كانت معايا فى الشغل ….يعنى هيا اللى كانت مدبرالى المصيبه السودا دى ..عشان انا ادخل السجن وهيا تتجوز عادل …
امانى : ربنا ينتقم منها …الملفات اهيه بقت فى ايدك يا هاله وتقدرى تثبتى براءتك قصاد العالم كله
هاله بأسى : بعد ايه يا امانى بعد اما اتسجنت 5 سنين ظلم ؟
امانى : خلى عندك ثقه ان ربنا هيعوضك عنهم ..وخلاص يا هاله ماتبصيش لوره بصى قدامك وشوفى عيالك وارفعى راسك
هاله متهكمه : والمفروض دلوقتى اعمل ايه
امانى بحزم: تعملى ايه ..تروحى القسم طبعا ومعاكى الملفات دى تثبتى براءتك فيها ….والشركه اللى راحت من الراجل الغلبان ده واخدتها الست نانسى وجوزها بالتلاعب وبرخص التراب ترجعله او على الاقل ياخد تعويض
هاله ساخره : فكرك ؟ هوا البوليس فى الزمن ده هيرجع حق حد
امانى بلهجه تحمل لوما وعتابا : طيب ماهو جالك لحد عندك وقالك نحط ايدينا فى ايد بعض وانتى اللى رفضتى ..احنا اللى بنقف سلبيين ونرمى تخاذلنا على اخطاء غيرنا والدنيا بتخرب
صمتت هاله لبرهه : ماهو ممكن لما اروحله يساومنى ..اما اساعده عشان يساعدنى واما مايعملش حاجه
امانى مستنكره: ويمكن تروحيله ويطلع اجدع منك ..ولو ان نفسى ترجعى لعقلك
قاطعتها هاله قائله : انا استقلت النهارده
امانى بحذر : طيب عال وكويس اووى ..ماقلكيش حاجه
هاله بأسى : ماشوفتوش …بقالى اربع ايام ماشوفتوش
امانى حانقه : وزعلانه انك مش هتشوفيه
هاله باستسلام: كده الصح ولازم اعود روحى …والافضل انى ابعد عنه عشان ارتاح
امانى راجيه: احسن برضه …بس ده مايمنعش انك تروحى للظابط وتقوليله على الورق اللى معاكى
هاله بغلظه : هيقولى وانا مالى هوا مكافحه مخدرات.. مش اموال عامه ..ولو رحت الاموال العامه مش بعيد يركنوا الملفات على جنب… بعدها تعمل شوشره وتتأذى انتى وتسيبى الشغل
