خلف الظلال الجزء الثالث بقلم يسرا مسعد

خرج سالم بصحبه رجاله والاطفال الصغار تاركين منال تلك المره تحطم كل ما وقع تحت يديها بنفس اشتعلت غضبا وغيظا

فيما كانت هاله جالسه فى السياره تنظر من الحين للاخر فى ساعتها ذات السوار الرفيع
الى ان شعرت انها لن تحتمل اضاعه المزيد من الوقت فى الانتظار وقررت الترجل من السياره والذهاب الى احضار طفليها بنفسها

وما ان ترجلت حتى اعترض طريقها الرجل الذى تركه سالم ليراعها فقال لها : على فين يا مدام؟

هاله : انا هروحلهم اتأخروا اووى

هز الرجل رأسه نافيا وقال لها : لا يا فندم …سالم بيه أمرنى انك تقعدى فى العربيه ماتتحركيش منها

قالت هاله بعصبيه : يعنى ايه هوا حابسنى عدينى ..

افسح لها الرجل الطريق باستسلام وسارت هاله بضعه خطوات ثم توقفت واستدارات وسألت الرجل بحيره : هوا العنوان فين …واروح ازاى ؟

نظر لها الرجل ساخرا وقام بفتح باب السياره وقال لها : انا رأيى ان حضرتك تستنيهم هنا …صدقينى كده اسلملك واسلملهم ..بدال مانقضوا نص النهار ندور عليهم والنص التانى عليكى

انصاعت هاله لامره ..فقد كان محقا وما ان همت بالركوب مره اخرى حتى ترآئت لها السياره التى تحمل سالم ورجاله على بعد عشره امتار فتوقفت وزادت دقات قلبها وتعلقت انظارها بتلك السياره تحاول استبيان اذا ما كانو اطفالها بها ايضا ام لا …

وماهى الاثوان معدوده حتى ترجل سالم وتقدم منها بمفرده فقالت هاله بيأس وكادت ان تبكى : مالقتهومش مش كده

ابتسم سالم على حين غره وقال : لما اقولك هجيبهوملك يبقى تعرفى انى اكيد هجيبهوم

وبعد ثوان ترجل الصغير عمر من السياره وجرى اولا تجاه امه فخرت هاله على ركبتيها سريعا واحتضنته
وانهمرت الادمع فرحا بلقاءه اخيرا
واخذت فى تقبيل كل ما وقعت عليه يداها من اعلى رأسه الى اخمص قدمه
وتقدم منها ياسين هو الاخر فضمته ضمه قويه الى جوار اخيه ليهدأ اخيرا قلبها الملتاع ويسكن انين دقاته
وظلت هاله تردد : وحشتونى …وحشتونى

رد عمر وقال : وانتى كمان …..انتى وحشتينى اووى يا ماما ….كنتى فين ..ليه سيبتينا وليه بابا قالنا انك موتى

قال ياسين هو الاخر : انا الصراحه كنت زعلان منك اووى …كنت فاكرك انك سيبتينا ومش عاوزه ترجعلنا لحد اما طنط منال قالت انك دخلتى السجن ..عشان …

صمت ياسين خجلا فقالت هاله بصوت متحشرج : بكره اما تكبروا وتفهموا هتعرفوا ان امكم بتحبكم اووى وعمرى مابعدت عنكم بكيفى والله ياولادى كان ظلم وغصب عنى …لكن اوعدكم من هنا ورايح طول مافيا نفس …عمرنا ماهنبعد عن بعض تانى