ليلى الجزء الأول
ليلى:اوكيه يلا بينا
ومشيت ليلى جنب ايهاب ووصلت عند خالد وسلمت عليه بعدم اهتمام وخصوصا لما لقيت ساره ماسكه دراعه كأنه ملكها وقدمت نفسها للمهندس محمود اللي شكرها على مجهودها الواضح في الحفله وفضلت تتكلم مع المهندس محمود في الشغل ومكنتش واخده بالها ان خالد عينيه منزلتش من عليها وساره حست بكده فحاولت تشده عشان الرقصه الألى بدأت وراح خالد يرقص مع ساره وفي الوقت ده طلب ايهاب ليلى للرقص واستأذنت و راحت ترقص مع ايهاب وكل شويه عينيها تيجي في عينين خالد وهي تبعد بعينيها وتحاول تركز في كلام ايهاب اللي كان اعجابه بيها باين جدا ولما خلصت الاغنيه قرب خالد من ليلى وايهاب وقالهم:
خالد:ممكن ارقص مع زميلتي في الشركه
وقبل ما ليلى او ايهاب يردوا عليه ابتدت الاغنيه اللي بعدها وخالد خد ليلى بين ايديه وابتدوا يرقصوا وساره كانت مدايقه جدا من ليلى .
فضل خالد باصص في عينين ليلى وهي بتهرب وقالها:
خالد:بقالي كتير ما شوفتكيش
ليلى:مخدتش بالي على فكره
خالد:فستانك جميل اوي
ليلى:وفستان ساره كمان
خالد ضحك لما حس ان ليلى غيرانه من ساره
ليلى:بتضحك على ايه؟
خالد:اصل شكلك حلو وانتي مكشره
ليلى:انا مش مكشره
خالد:انتي سوقتي لغاية هنا لوحدك؟
ليلى:لا بابا وماما وصلوني ومستنيني في الكافيه
خالد:معقوله طب ليه مدخلوش الحفله؟
ليلى:عادي عشان ابقى براحتي
خالد:ليلى………………
ليلى:نعم؟
خالد:تعالي نخرج نتمشى شويه بره
ليلى من غير ما تفكر مشيت معاه وخرجوا بره القاعه ومحدش خد باله الا ساره اللي قررت انها لازم تبعد ليلى عن طريق خالد ……
يا ترى ساره هتعمل ايه؟
الفصل الرابع عشر
خرجت ليلى مع خالد وابتدوا يتمشوا وخالد فضل ساكت وليلى حست انه مش عايز يتكلم فسكتت وبعد شويه وقف خالد وبصلها وقالها:
خالد:انتي حبيتي قبل كده؟
ليلى:لا
خالد:ليه؟
ليلى:كنت مركزه في دراستي وبعد كده اشتغلت وكمان مقابلتش انسان يشدني بشخصيته
خالد:طب وايه رأيك في ايهاب؟
ليلى:من ناحية ايه؟
خالد:يعني مستواه وشخصيته
ليلى:هو شاب كويس وطبعا مستواه ممتاز
خالد:يعني انتي معجبه بيه؟
ليلى:لا طبعا ايهاب مش هو اللي في خيالي
خالد:بس هو شكله معجب بيكي اوي
ليلى:هو حر
خالد:وكمان هو غني اوي
ليلى:الفلوس مش كل حاجه
خالد:امال ايه المهم من وجهة نظرك؟
ليلى:يعني يكون انسان شخصيته قويه, رومانسي, يحترمني يعني تقريبا هي ده كل المواصفات
