المتاهة فاطيما يوسف

عند احلام في المستشفى في بالليل وكان ماجد قاعد جنبها وماسك ايديها وبيقول لها :

_ياه على العيون الجميله لما تتفتح وتنور الدنيا وتنور لي قلبي وحياتي ،

احلى لومه في الدنيا بحالها بتبقى قمر وهي لسه صاحيه من النوم  .

ابتسمت احلام على كلامه وقالت له بتساؤل لان ده هيبقى نظام حياتها على طول اسئله لحد اما تعرف وتفتكر هي مين وحياتها كانت عامله ازاي :

_انت باينك بكاش كبير قوي وكنت بتاكل بعقلي حلاوه ،

ممكن اعرف احنا اتعرفنا على بعض ازاي واتجوزنا ازاي وانا مين وأهلي مين ؟

طبطب ماجد على إيديها وقال لها بابتسامه :

_انت حبيبتي اسمك احلام خريجه كليه آداب ومن الصعيد اتقابلنا انا وانتي في الجامعه وحبينا بعض وكانت قصه حبنا اسطوريه الجامعه كلها كانت بتحكي عنها ،

وانا اول ما شفتك حبيتك ووقعت في غرامك وأنتي كنتي تقيله عليا جدا بس على مين فضلت وراكي لحد مخليتك تحبيني وتعشقيني واتقدمت لوالدك في الصعيد وهو وافق واتخطبنا سنه واتجوزني يا حبيبتي .

استغربت من كلامه انها من الصعيد وسألته باستفسار :

_هو ازاي انت بتقول انا من الصعيد وبتكلم بلغه قاهريه عادي جدا ؟

ابتسمت ما جد ورد عليها وجاوبها :

_لان ببساطه إنتي قضيتي اربع سنين في الكليه وكمان متجوزين بقى لنا خمس سنين فطبيعي ان لغتك ولسانك يتعود على كلامنا وطريقتنا .

سألته سؤال تاني علشان تعرف اكثر عن حياتها قبل كده :

_طب ازاي انت بتقول ان انا من الصعيد وان وافقت اتكلم معاك عادي واحنا في الكليه ونحب بعض قبل ما نتخطب ؟

جاوبها ماجد بابتسامه هاديه :

_ده انتي ساعتها ذلتيني وجريتيني وراكي ما كنتيش بترضي تتكلمي معايا خالص ولما لقيتيني مصمم عليكي اضطريتي ان إنتي تسمعيني وبعد ما عرفتي واتاكدتي ان انا اكثر واحد بيحبك في الدنيا قلتي لي انا مش بتاعت مشي وكلام فاضي وعلى طول رحت اتقدمت لك وكانت صاحبتك هند شاهدة  على قصه حبنا .

اطمنت لما سمعت الكلام اللي هو قاله وسألته:

_طيب احنا ازاي متجوزين بقى لنا خمس سنين وما خلفناش لحد دلوقتي ؟

زعل ماجد انها سالت السؤال ده ما كانش عايز يدخل في التفاصيل دي دلوقتي وقال لها  بتهرب :

_كفايه اسئله النهارده انت تعبتي وكمان الدكتور منبه عليا انك ما تتكلميش كثير وما تشغليش بالك كثير علشان خاطر إنتي لسه تعبانه وكده خطر على دماغك ما تقلقيش يا حبيبتي بكره هتفتكري كل حاجه واحده واحده وانا معاكي ومش هسيبك كل اللي انا طالبه منك انك تهدي خالص علشان خاطر ما يحصلكيش انتكاسه بسبب ضغطك على عقلك فنهدى شويه وكل حاجه هنعرفها في وقتها .

هي فعلا كانت حاسه بصداع شديد بسبب الدوامه والمتاهة اللي هي عايشه فيها وقالت له :

_انا اصلا عندي صداع رهيب مش عارفه الصداع ده هفضل فيه كثير وهيخلص امتى ؟

قرب ماجد منها وبص جوه عيونها وقال لها بحب و حنان :

_باذن الله الصداع يومين وهيهدي ما تضغطيش انت بس على نفسك وبكره هتبقي كويسه وميه ميه وترجعي تنوري حياتنا تاني يا قلبي .

___________________________

استاذن خالد من شغله هو بيشتغل في العريش بيروح عشرين يوم في الشهر ويرجع العشر ايام الاخر يقضيهم مع مراته وابنه ،

اللي مش عارف عنهم حاجه دلوقتي ولا عارف جرالهم ايه،

وقاعد في القطر على اعصابه وميت سيناريو وسيناريو عمالين يدوروا في دماغه ،

وفي نفس الوقت إللي هو راجع فيه كان راجع بردوا أخوها وأبوها من الصعيد في القطر بردوا ،

والقلق واكلهم علي بنتهم ،
ولكن يشاء القدر يحصل عطلة في القطر بسبب انقلاب قطر في مكان تاني وقفت السكة كلها ،

لأن الحادثة والانقلاب مكنش هين ،

فده في طريقه وده في طريقه القلق زاد أكتر واكتر ،

فبيكلم ابوها مع ابنه وهو قاعد قلقان:

_ طيب هنعمل ايه يابني الجطر وقف بينا في مكان مجطوع ولا هنعرف نتحرك من مكاننا.

رد عليه ابنه وقال له وهو بيضرب كف على كف:

_ مش بايدينا حاجه يابوي أدي الله وأدي حكمته مضطرين نستني لحد مالفرج يجي من عند الله ،

اتصل بجوزها عرفه إن الجطر تبعنا عطل ومضطرين نستني لحد ما يطلع .

وجه يتصل لقي إن الموبايل معدوم من الشبكة ومفيش شبكة خالص لحد مافقدوا الأمل ،

أما عند خالد في القطر بيحاول يتصل علي حماه يسأله وصل ولا لأ لقي موبايلاتهم غير متاحة والقلق زاد في قلبه وقعد يكلم نفسه وقال :

_ معقولة يكون مراتي وابني جري لهم حاجة وقفلوا تليفوناتهم علشان ميقلقونيش ؟!

معقولة أكون فقدت عيلتي الصغيرة وأنا مش دريان وبعيد عنهم مئات الأميال ؟!

يارب هونها عليا وابعت لي إشارة تطمني عليهم أنا تعبت ومبقتش عارف أعمل إيه وأنا بعيد عنهم وقدامي ساعات علشان أروح وأطمن عليهم .

وفضل علي حاله يكلم نفسه ودماغه تجيب يمين وشمال وشرق وغرب وآلاف الأفكار الحزينة تيجي في دماغه والقلق والتوتر بينهش فيه نهش .

________________________

أما في المستشفي قاعد ماجد مع الدكتور بيطلب منه وبيقول له :

_ يعني يادكتور حالتها متسمحش إني أخد مراتي وأروح بيها وهجيب لها فريق ممرضين يتابعوا حالتها ؟

رد عليه الدكتور وقال له بعملية:

_ لسه مضطرين نبلغ عن الحادثة إللي حصلت لها علشان يشوفوا مين إللي داسها بالعربية لان دي حادثه وما ينفعش تدخل المستشفى وتخرج وما نبلغش بس كنا مستنيين انها تفوق علشان خاطر نبلغ .

رد عليه ماجد وقال له بنفي :

_معلش يا دكتور بلاش تبلغ علشان خاطر هي تعبانه ومش حمل اسئله ولا ايه اللي حصل كفايه اللي هي فيه وكفايه اصلا فقدانها للذاكره اللي مخليها تعبانه نفسيا ولحد دلوقتي مش فاكراني اصلا .

هزه الدكتور راسه بموافقه ورد عليه :

_تمام براحتك تقدر تاخدها عادي هي بقى لها خمس ايام اهي بس خلي بالك المستشفى هنا كانت هتراعيها اكتر بس طالما قلت هتجيب لها فريق ممرضين براحتك .

وخرج ماجد روح على اوضه احلام وهو فرحان وقال لها وهو ماسك ايديها :

_خلاص يا حبيبتي الدكتور كتب لك على خروج هنلم حاجتنا ونروح على بيتنا وهناك ممكن تفتكري وذاكرتك ترجع لك تاني .

ابتسمت احلام وطلبت منه :

_انا عايزه لما اروح البيت تتصل على صاحبتي وتخليها تيجي تقعد معايا شويه لو سمحت يا ماجد .

ابتسم ماجد وقال لها وهو بيشاور علي عينيه :

_ده انت تؤمريني يا قلبي من العين قبل العين دي .

وبدا يلم في حاجتها وخلصوا كل حاجه في اسرع وقت ونزل ركبها العربيه وروح على بيته .

_________________________

اما عند خالد اخيرا وصل شقته كانت الساعه 2:00 الصبح واول ما دخل قعد ينادي على مراته :

_ياأم مالك  إنتي فين وحشتيني .

لكن ما فيش رد دخل الاوض كلها لقى هدومها زي ما هي بس ابنهم مش موجود القلق بدا ينهش فيه من كل حته خلاص فقد اعصابه،

ما استناش راح خبط على باب الست الكبيره جارتهم اللي كانت دايما بتقعد معاها احلام وبتسيب مالك ابنهم معاها فضل يخبط لحد ما فتحت له الست بخضه لما شافتهم العين السحريه وقالت له بفرحه :

_حمد لله على السلامه يا ابني اخيرا رجعت تعالى ادخل مالك نايم جوه .

استغرب  خالد جدا وقال لها بتساءل واستفسار :

_هي أم مالك ومالك نايمين عندك هم جرى لهم حاجه ولا ايه ؟

طمنيني علشان اعصابي باظت .

ردت عليه الست الكبيره بحزن وجاوبته:

_مراتك يا ابني مش موجوده ومالك اللي معايا بقاله خمس ايام ومش مبطل عياط عليك وعلى والدته ،

هي كانت نازله تجيب طلبات البيت من  السوق وسابته لي كالعاده ومن ساعتها ما رجعتش ،

وانت عارفني ست كبيره  ولا بقدر انزل ولا بقدر اطلع بخدم نفسي بالعافيه وهي الله يسترها اللي كانت بتجيب لي كل حاجه،

وبرده معيش تليفون بفهمش في المحمول بتاعكم ده عشان كنت ارن عليك وابلغك اللي حصل،

واديك رجعت بالسلامه دور عليها يا حبيبي ممكن تكون جرى لها حاجه ولا في اي مستشفى .

حس خالد ان في حد ضربه على دماغه ضربه شديده وان هو في كابوس وما بقاش عارف ينطق بعد الكلام اللي سمعه من الست جارتهم ودخل اخذ ابنه في حضنه وراح على شقته والصباح رباح ،

اي نعم عينه مش هتغمض لحد الصبح بس ما قدمهوش غير الصبر المرير بالنسبه له .