غصب عني ضعفت
_كنت حاسس انك موجوعه وتعبانه وحياتك ضايعه من غير وجودنا مع بعض ومن غير كلامنا ،
ما تعيطيش يا حبيبتي حقك عليا ان انا طاوعتك وسبتك الاسبوعين اللي فاتوا دول وانا عارف انك ما لكيش حد تفضفضي معاه ولا تتكلمي معاه حقك عليا يا حياتي .
زادت شهقتها في البكي اكتر لأن كل كلمه قالها كانت حقيقه ،
وفي اللحظه دي كرهت نفسها ولعنت الجواز ولعنت سفر جوزها ولعنت كل حاجه خليتها تبقى متدمره وتخالف شرع ربنا وتخون ،
وقالت له من بين دموعها :
_بس ما ينفعش يا معتز لازم ما نضعفش علشان خاطر انا بقيت بشوف نفسي حقيره وبقيت كرهاني اكتر من الاول وبقيت بتمنى الموت واني ما اكونش موجوده على وش الدنيا بسبب اني انشغلت واتعلقت وحبيت وانا متجوزه .
رد عليها معتز وهو تايه ومتضايق :
_خلاص إنتي تطلبي الطلاق من جوزك واول ما عدتك تخلص نتجوز واوعدك اني هشيلك فوق راسي وجوه عيوني انا خلاص ما بقتش قادر استغنى عنك والاسبوعين اللي فاتوا دول انا اتعذبت عذاب ما لوش اول من اخر ثقي فيا واطلقي منه واوعدك اني هكون ليكي كل حياتك واني هسعدك واحاول انسيكي المر اللي عشتيه كله في حياتك بس ما تسيبينيش انا ما بقتش قادر اكمل حياتي ولا يومي من غيرك .
ردت عليه زهره بنفي وقالت له:
_ما ينفعش اسيب اولادي وبيتي واجري ورا قلبي لازم اضحي علشان خاطر ولادي وعلشان خاطر سمعتي وعلشان خاطر كل حاجه ما تتهدش على دماغي .
قال لها معتز كلام خرج بتلقائيه منه :
_خلاص خلينا ما نسيبش بعض ونتكلم مع بعض ويبقى الحال كما هو عليه مش هيبقى موت وعذاب قلوب وبعاد كمان .
للاسف وافقت وضعفت قصاده وقصاد محايلته والشيطان صور لها ان ما حدش هيعرف اي حاجه عن اللي هي بتكلمه وجوزها كده كده مسافر مش هيحس بيها وما حسبتش حساب المفاجأه اللي هتحصل لها ،
عدت الايام والشهور وهم كل يوم بيتكلموا مع بعض وطبعا المكالمات اتطورت ما بينهم اكتر من الأول ففي مره وهم بيتكلموا مع بعض قال لها معتز وهو بيبص لها بشغف :
_بقول لك ايه يا زهرتي انا نفسي اشوف لون شعرك ايه حاسس انه هيبقى لونه اصفر لان ده اللي هيليق عليكي وريه لي بجد نفسي اشوفه جدا .
رفضت زهره في البدايه واستنكرت كلامه طبعا بس بعد محايلته وافقت وخلعت حجابها واول ما شافها قال لها :
_زي ما توقعت جميله في كل حالاتك انا مش فاهم ازاي واحد زي جوزك يبقى عنده واحده بالجمال والرقه دي كلها ويسيبها ويسافر ويبعد عنها السنين دي ولا يبقى فارق له؟!
