اسكربت كامل ــ تـفتكري هو مجاش ليه لغاية دلوقتي؟. = هو مين ده ــ قرة عيوني حبيبي = ما ترحمي نفسك وترحميني أنتِ مبتزهقيش خالص ــ ازهق إيه بس أنا لو أعرف أتأخر ليه ده كله = طب لخصي وخلينا نشوف اللي ورانا ــ المواصلات صعبة وغالية أكيد أتأخر بسببها =فرررح اظبطي بقا وركزي في شغلك ــ يووه يا ريم لازم تفصلي الواحد ده أنتِ غريبة بجد =اسكتي اسكتي أستاذ يوسف جاي علينا ومعاه حد ــ ضحكت وقولت الحكومة بذات نفسها الله يستر ـــ رجعت البيت بعد يوم مُـتعب وحقيقي الست ملهاش غير بيتها . ــ ماما ماما فينك اتخطفتي ولا إيه =داخلة تزعقي ليه يا أم لسان طويل ــ إيه يا ست الكل مش طايقاني ليه = يختي وأنتِ مين يطيقك ــ كتير يا ماما كتير بس أنتِ دوري = طيب بطلي رغي وادخلي غيري وصلي عشان تحطي الأكل ــ دخلت أوضتي وغيرت وصليت وقبل ما أخرج احط الأكل فتحت موبايلي أنزل بوست للخمسة ستة اللي متابعيني فانزاتي حبايبي وكتبت فيه : الإنتظار مُـهلك ومُـتعب للغاية لا تَـقلق لم يُـصيبُني الـملل ولكن يَـشتاقُ قلبي ويَـحِنُ لـكَ كثيراً ويَـرجُو لِـقائكَ لتطيب به النفس ويسكن به الفؤاد والروح ويمحو به الخوف والقلق ويجلو به الآلام ويحل به الآمال أنا فقط أحن لك وأرجو وجودك .") ـــ كتبت النص ونزلت البوست ولسه هريح وأنام سمعت ماما بتزعق = ده كله بتغيري وتصلي يا باردة الأكل برد ــ يا نهار أبيض الأكل ده أنا نسيت خالص، حاضر يا ماما جاية اهو خرجت حطيت الأكل لاقيت بابا ومروان جُم ." ــ حمدالله على سلامتكم يا حبايبي = الله يسلمك يحبيبة بابا تعالي عشان عايزاك في موضوع ــ اتفضل يا بابا = بعد الغدا يبت مش جعانة ــ ضحكت وقولت تيجي إزاي ده الأكل ده حبيبي حبيبي = ضحك وقال أنتِ هتقوليلي ـــ اتغدينا وعملت كوبايتن شاي وخرجت بيهم البلكونة عند بابا ." = تعالي يا فرح اقعدي ـ أيوة يا بابا اتفضل = أنتِ عارفة سميتك فرح ليه ــ تصدق مجاش في بالي قبل كده ليه بقا = عشان من أول يوم جيتِ فيه الدنيا والفرح زار قلبي قبل عيني لما شوفتك ــ ضحكت و قولت الله الله وبتقول شعر كمان يا بابا ده يبخت الست ماما = يا بت يا بكاشة خليني أكمل ــ كتمت ضحكتي وقولت خلاص المايك معاك اتفضل = يونس ابن عمك محمد طلب إيدك مني النهاردة ــ يونس ابن عمو محمد صاحب عمرك = أيوة ليه لأ، بنتي ماشاء الله عليها وهو شاب كويس ده تربيتي ــ مش عارفة بجد يا بابا أنا خايفة = مفيش خوف ولا حاجة صلي استخارة وقابليه ومفيش حد هيجبرك على حاجة ـــ دخلت أوضتي واترميت على سريري وسرحت بخيالي شوية معقولة يونس عايز يتقدم ليا طب ليه؟ يونس يبقي ابن صاحب بابا وصاحب مروان أخويا وأكبر منه بـ سنة ، مكنش فيه حاجة بتجمعنا غير التجمعات العائلية مثلاً نتقابل صدفة في الشارع كده، أعدي على مامته أقعد معاها شوية لكن عمري ما فكرت فيه زوج ليا أو حتى كان يبان عليه بس وماله الواد قمر وصوته قمرين يالاهوي إيه اللي أنا بقوله ده من أولها اتهبلت كده . قومت صليت استخارة وصليت القيام والفجر أذن صليت ودعيت ربنا يختار لي الخير ويهدي قلبي للخير وبس .") صحيت تاني يوم وأنا مرتاحة ولكن إحساس الخوف والتوهان ملازمني وده طبيعي لـ شخص أعتاد القلق والخوف زيي!. قومت صليت الضحي وفطرت ولبست ونزلت للمرمطة أقصد الشغل ." ــ السلام عليكم ورحمه الله وبركاته يا قوم = أستاذة إزعاج جت اهي ــ في إيه يبت مالك على الصبح محسساني إني ضرتك ليه!. = لا ده إحساسك العالي يا فنانة تعالي اقعدي عشان نبدأ مدعكة اليوم ــ لا أنا مفيش دماغ بصراحة بفكر أرجع بيتي = ترجعي فين يا سكر ده أستاذ يوسف عامل إجتماع ضروري النهاردة ــ يا وجع الصدمة يا ولاد إجتماع إيه بس هو مش بيزهق = لسانك ده هـتتطردي بسببه والله ــ شوحت بأيدي كده وقولتلها مش مهم مش مهم = سمعت صوت من ورايا : هو إيه اللي مش مهم ده؟ ــ برقت بـصدمة أصل ده صوت مستر يوسف يا ولاد لفيت ورايا لقيته باصصلي ورافع حواجبه، حمحمت وقولت وأنا شبه الكتكوت المبلول ــ بقول مش مهم أفطر خالص أهم حاجة الإجتماع والشغل طبعاً ــ بصيت لريم قولتلها : مش صح يا ريم قولت هضحي بصحتي وشوحت بأيدي كده = ريم وهيا بتكتم ضحكتها : طبعاً طبعاً اومال إيه بصلي بـنظرة يأس مني وقال وهو بيخبط كف على كف = مفيش فايدة منك يا فرح ، ورايا على الإجتماع وطبعاً يا جماعة مش عايزة أقولكم إنهم ظالميني ودول أعداء النجاح ملناش دعوة بيهم . بعد الإجتماع في فترة البريك في الشركة = لأ بس كنتِ عسل وأنتِ شبه الكتكوت المبلول كده ــ اسكتي بجد ده أنا قلبي وقع في رجلي = وقال أهم حاجة الشغل وأنتِ أصلاً بتيجي بالعافية والزق ــ طب اسكتي يا ريم عشان مش هقولك الحاجة المهمة خالص = سكت اهو قولي عايزة تقولي إيه ــ بصي أنا معملتش حاجة = لخصي إيه المصيبة الجديدة اللي جاية بيها ــ قولت بسرعة مش أنا ده في عريس متقدملي = طب ما حلو ده وهلبس الفستان والفقر يتفك ــ اتنيلي أنا خايفة أوي بجد = ليه بس تخافي مش مصداعنا بيه كل شوية ــ مش عارفة بجد نفسي أبطل أخاف محتاجة أوي أطمن = يبقي تبدأي خطوة جديدة الخوف مش هيفيدك ــ عارفة بس بحاول والله = افضلي حاولي لآخر نفس سكتنا شوية وبعدها ريم خضتني وهيا بتزعق = إزاي مسألتش مين العريس الله يعينه ــ ضحكت وقولت يونس ابن عمو محمد صاحب بابا = الواد اللي كنتِ بتقوليلي صوته حلو في القرآن ده ــ ضحكت وقولتها أيوة شوفتي = وبتقولي خايفة يا بنتي ده تتجوزيه وأنتِ مغمضة ــ نعم ليه يعني مش عشان حِـليوة وصوته حلوة يعني!. = والله وعرفتي منين يا قطة؟!. ــ إيه يا روما ما أنتِ عارفة إن صوته حلو من وهو صغير = هـتصيعي عليا يا فرح عرفتي منين إنو حِـليوة انطقي ــ اتوترت وقولت معرفش هو أكيد حلو برضو = بصتلي بتحذير فررح فين غض البصر ها ــ والله مكنتش أقصد أبص ليه والله = اومال جرا إيه؟ ــ من كام يوم وصلني أنا ومروان بـ العربية بتاعته وبالصدفة بصيت ليه بس والله بعدها استغفرت كتير ومرفعتش وشي تاني = خلاص سماح المرة دي وتاخدي بالك كويس ماشي ــ ضحكتلها بحب وقولتها تمام يا معلمي ريم صديقتي من أيام الجامعة واللي بحمد ربنا على صداقتها، كنت داخلة الجامعة تايهة وبدعي ربنا يرزقني بصحبة صالحة زيها واتمثلت كلها في ريم الحمدلله . رجعت البيت وبابا بلغني إنهم هيجوا بعد يومين عشان نقعد مع بعض وبـروتين طبيعي جداً عدا اليومين ما بين إني بصلي كتير وبحاول أطمن نفسي ما بين إني أبطل أوفر ثنكينج شوية. = متخافيش يا قلب ماما خليكِ هادئة وعلى طبيعتك وبس ــ حاضر يا ماما الله يستر = ضحكت وقالت مكنتش أعرف إنك عندك دم عادي زينا كده وبتخافي وتتكسفي ــ يوه يا ماما ده وقته، أقولك قوليلهم نايمة ولا مش موجودة قوليهم أي حاجة = اتكلمت وهيا بتزُقني يلا يا فرح الناس مستنية بره ــ خرجت وأنا بقدم رجل وآخر رجل من توتري معرفتش أشيل الصنية وبابا أخدها مني ودخلت وراه سلمت على طنط مروة مامته وعمو محمد باباه وبعدها أخته سارة وبنتها لين وقعدت جنب بابا ومروان ومافوقتش غير وبابا بيقول الجملة المعتادة " نسيب العرسان مع بعضهم شوية" رفعت رأسي لـ بابا طمني وقالي أنو قاعد قريب مننا سمعت صوته وهو بيقولي = عاملة إيه يا فرح ــ الحمدلله وأنت كويس الحمدلله = ضحك وقال طب استني أرد ــ قولت بسرعة مفيش وقت إحنا في زمن السرعة = اتكلم بخبث وقال عندك حق عشان كده دخلتي ومسلمتيش عليا ــ رفعت رأسي وأنا ببص ليه لأول مرة من أول ما دخلت ــ يا خبر أنا مسلمتش عليك بجد = ضحك وقالي أيوة شوفتي ــ معلش بقا أكيد ما أخدتش بالي = ولا يهمك قوليلي حابة تعرفي عني إيه ــ مش عارفة اللي حضرتك عايز تقوله = طيب يا ست البنات أنا يونس خريج هندسة، عندى 25 سنة شغال في شركة كويسة، وملتزم بـ صلاتي وخاتم القرآن بفضل الله ومعلم قرآن في المدرسة اللي جمبنا هنا وأوقات بكون إمام في المسجد عندنا . ــ ماشاءالله اللهم بارك الله يزيدك يارب = اللهم آمين وإياكِ ، قوليلي عايزة تعرفي إيه تاني ــ مش فـكرة أعرف إيه قد ما يهمني جداً إنك تحافظ عليا وتتقي الله فيا، وتـقدر خوفي وتوتري و قرار إني أخرج من بيت أهلى لـ بيت جديد عليا ومسئولية أكبر وحاجات كتير تانية. من الآخر" أنا خايفة وفرصتي ليك إنك تتطمني لو عرفت تتطمني يبقي كسبتني" = الله يجعلني خير الزوج والرفيق ليكِ، أوعدك أفضل أحاول لآخر نفس وأفعالي تكون شاهدة عليا . اكتفيت بـ ابتسامة خفيفة ليه وبعدها بابا وباقي عيلتي وعيلته دخلوا وقضينا وقت لطيف ومشيوا ـــــــــــــــــــــــــــــــــــــــــــــــــــــــــــــــــــــــــــــــــــــ دخلت أوضتي وأنا الفرحة مش سيعاني، كنت بدعي بـ زوج صالح وناس طيبة يبقوا عيلتي التانية من بعد أهلي وقد كان الحمدلله عمو محمد زي بابا تمام في حنيته وخوفه، ومراته طنط مروة شبه ماما أوي وبتحبني وهيا وماما أصدقاء مع بعض من زمان أما سارة أخته فـ دي حتة سكرة بجد اينعم علاقتنا قلت من بعد ما اتجوزت بعيد وبقيت أشوفها كل فين وفين لكن وقت ما احتاجها بـلاقيها ده غير إني كنت على طول خايفة إني أبعد عن ماما وأقعد بعيد لكن ده أنا هسكن بعد ماما وطنط مروة بـ شارعين بس يعني مسافة السكة بس يا تري يونس هيعرف يطمني ويكسب قلبي؟. قطع عليا لحظة التفكير دي لما سمعت صوت الباب بيخبط وكان مروان أخويا = الجميل فاضي أتكلم معاه شوية ــ نعم جميل وفاضي قولي عايز إيه؟ = يعني لازم أعبرك عشان مصلحة مثلاً ــ آه كلها مصالح وبتتصالح = ماشي لما نشوف آخرة الدبش بتاعك إيه ــ ضحكت وقولت آخرتها في بيته إن شاء الله = مدلوقة مدلوقة أوي يعني ــ لأ استني مدلوقة إيه مش عشان صاحبك يعني = وماله صاحبي ده حتى الواد قمر والله وياما حذرته بس شكله واقع خالص يعيني حطيت رجل على رجل وقولت بغرور : ــ طبعاً لازم يقع يبني هو أنا أي حد = بصلي بقرف وقال الصبر يارب ــ ضحكت وقولته خلاص قولي يلا عايز تقول إيه = عايز أقولك إني عارف إنك خايفة وقلقانة ومش عارفة تاخدي قرار صح!. ــ صح جداً يحبيب أختك = مش هقولك متخافيش بس على الأقل بطلي تحسبي كل حاجة وسيبيها على الله شوية ــ والله بعمل كده يا مروان بس غصب عني بخاف أوي = متخافيش يا عيون مروان ،يونس فعلاً بيحبك وهيحافظ عليكِ وعلى قلبك ــ ابتسمت و مروان أخدني في حضنه يطمني. __ عارفين يا جماعة بتبقي حاجة لذيذة خالص لما كل اللي حواليكِ بيشوفوا حب الشخص ليكِ مهما كان مين بس لما حد يجي يقولك الشخص ده بيحبك بجد بتعرفي إنو فعلاً بيحبك بجد وإحساس الخوف هنا بيتلاشي تدريجياً ." ومـرت الأيام ووافقت على يونس واكتفينا بـ حفلة خِـطوبة هادية فيها أهلنا وأصدقانا المقربين وبس، وأناشيد حلوة وفستان بسيط وشَـبْكة جميلة ." مع الوقت بدأ الخوف عندى يقل شوية بـ شوية ومشاعري تكبر ناحية يونس عِـرف يطمني، رغم التزامنا بـ ضوابط الخطبة من أول لحظة يعني مثلاً : ( مفيش مكالمات فون إلا للضرورة زي حاجة متعلقة بـ شقتنا مثلاً ولازم بابا أو مروان يكونوا موجودين، خروجات من غير محرم وكلام حب وغرام ممنوع تماماً، كلامنا واتساب بيكون فى جروب مراون فيه) وحقيقي كان شاطر في كل اختبار مرينا بيه وكل مشكلة عدينا عليها . وفي يوم كنت بـبارك لـ سارة أخته على حملها الجديد وبـ حُـكم إن سارة متجوزة بعيد عن منطقتنا في بتيجي زيارة كل فين وفين، والنهاردة جت منطقتنا لأول مرة من بعد الخطوبة. ــ إيه الخبر الجميل بزيادة ده اللهم بارك = الله يبارك فيكِ ، يلا ستي شدى حيلك أنتِ والواد أخويا وأجي أباركلكم على النونو الجديد كده بإذن الله ــ قولت بضحك وماله يختي قولي لـ أخوكِ يتلحح كده وينجز سمعت صوته المحبب لـقلبي وهو بيرد عليا ويقول = طب اجهزي عشان جاي عندكم في الليل بإذن الله والله مش هكسرلك كلمة ولـسوء الحظ يونس سمع آخر جملة قولتها عشان الهانم كانت فاتحة الاسبيكر وهي في المطبخ قولت بـ صدمة وأنا لسه بستوعب إنو سِـمع كلامي ــ استني يا هندسة والله كنت بهزر منك لله يا سارة = استني إيه تاني داخلين على سنة يا فرح عايزة إيه تاني مكنتش لاقية رد مناسب حقيقي ليه استني بجد عايزة إيه أكتر من راجل فعلاً بيفهمني وبيحبنى وبيخاف عليا أكتر من نفسه ومش مجرد كلام، أفعاله البسيطة أثبتت ليا ده وقِـدر يكسب قلبي من أول جولة.") فوقت من تفكيري وسرحاني على صوت سارة وهيا بتقولي = فرح روحتى فين يا بنتي ــ آسفة والله يا سارة سرحت شوية =قولي إنك موافقة يلا ــ موافقة على إيه بس = على اللي يونس هيقولك عليه لما يجي ــ طب مش لما أعرفه الأول = يا غبية يا غبية بجد ــ ضحكت وقولت متشكرين يا أم لين متشكرين =طب يا ذكية هقفل أنا عشان لين بتعيط سلام ــ ماشي يحبيبي سلام خرجت أقول لـ ماما إن يونس جـاى لقيت البيت كله عارف وأنا المغلفة اللي في النص حاسه فيه حاجة هتحصل يلا أروح أجهز ـــــــــــــــــــــــــــــــــــــــــــــــــــــــــــــــــــــــــ مش قولتلكم حاسه فيه حاجة هتحصل طب النهاردة كتب كتابي آه والله أنا مصدومة زيكم تماما. كان يوم مختلف بكل تفاصيله من أول لحظة فيه ، مشاعر كتير متلخبطة ما بين سعادة و خوف وشوق وتوتر وحُـب ومع ده كله أنا متطمنة بوجوده . قررت أنا ويونس إن كل حاجة تكون بسيطة كتب كتابنا يكون في مسجد منطقتنا ، الرجال تحت والنساء فوق اخترت فستان بسيط يشبه الفراشة خمار جميل وساتر وأناشيد هادية وهدية بسيطة للمعازيم القريبين مننا واللي بيحبونا بجد مش كنتِ بتقوليلي هو مجاش ليه لغاية دلوقتي؟ ضحكت وأنا بفتكر السؤال اللي قرفتها بيه وقولت -ما خلاص بقا عفونا عنه يا ست ريم بصتلي وعيونها كلها دموع وقالت =مش متخيلة إنك عروسة وواقفة قدامي بفستانك شكلك حلو أوي بجد بصلتها بعد ما عيني دمعت ــ طب بتعيطي ليه دلوقتي يا بت بقيتِ نكد زيي ولا إيه؟. = ضحكت وقالت لأ يا ست هما قالوا لازم تعيطي في اللحظات دي ــ بصتلها بغيظ بقا كده ماشي يا ريم قربت وأخدتني في حضنها وهيا بتدعى ربنا يتمم لنا على خير.") شوية هدوء وأنا سامعة يونس بيردد ورا المأذون وبيقول " أعاهد الله والحاضرين أن اتقي الله فيها وأن اعاملها معاملة الإسلام " وبرغم توتري كانت جملة كفاية إنها تتطمن قلبي لـ سنين لقدام ،بس سبحان الله والله لحظات كتب الكتاب مُـهيبة، سبحان من وصفه بـ الميثاق الغليظ. بعدها صوت المأذون بقا عالي وهو بيقول " بارك الله لهما وبارك عليهما وجمع بينهما في خير " أول ما سمعنا صوت المأذون بِالجُملة دي ماما والستّات الموجودين و طنط مروة وريم وسارة زغرطوا ، حضنت ماما جامد وأنا لسة مش مستوعبة إن خلاص بقيت على اسم واحد تاني! بعد المُـباركات والأحضان الناس بدأت تقل وكله طلع بره ولقيت يونس جاي عليا بـ ابتسامته اللي خطفت قلبي سألته بإستغراب بتبص حواليك ليه نسيت حاجة؟. =بصلي وهو بيقول آه في حاجة تايهة مني استغرابي زاد وأنا بسأله نسيت إيه ؟. بصلي وقال بكل حب = نسيت قلبي معاكِ ممكن ترجعيه "طب ده يترَد عليه بـ إيه بجد!؟ ضحكت من قلبي وأنا مكسوفة ووطّيت رأسي، مَد إيدُه ورفع وِشي وبَص ليا:" = مبسوطة؟ رديت بكل تلقائية وحُـب وقولت _طايرة من الفرحة بجد ابتسم وقالي _فرحتي النهاردة متتوصفش يا فرح حاسِس إن نجمة من نجوم السما بقِيت ملكي ــ محدش فرحان قدى يا يونس، تعرف لو زمان كان اتقالي إنك هتكون من نصيبي مكنتش هصدقه، حقيقي أنتَ عوض ربنا ليا ونعمة كبيرة هفضل أشكر ربنا عليها اخدني في حضنه وهو بيقول = مُـبارك عليا وجودك في حياتي يا كل حياتي .') "جَـمّلتَ في عيني الحياة جميعها وزرعت زهرًا نابتًا في داخلي أنت الذي اختارته بين الورى يا أوّل الأحباب بين أوائلـي❤️" انتهت بـقلم / نـدى عمر
