كرامتي ولكن
ردت زهره عليه وهي بتتوجع وبتتألم من جواها :
_جوزي رجع من السفر وما كانش قايل لي ان هو هيرجع وكان عاملها لي مفاجأه والمفاجأة الأكبر ان هو مش هيسافر تاني،
احنا ما ينفعش نتكلم مع بعض تاني لازم تنساني وتنسى انك عرفت واحده اسمها زهره في حياتك لو كنت فعلا بتحبني وبتخاف عليا سيبني احفظ الباقي من كرامتي واحترامي لنفسي واتوب لربنا على اني عصيته وخنت .
جز معتز على أسنانه بغضب وقال لها:
_كلام ايه اللي انت بتقوليه ده يا زهره عايزه تبعدي عني عايزه تسيبيني بعد ما اتعلقت بيكي وحبيتك؟
عايزه تسيبيني زي ما هي ما سابتني ومشيت انتم ليه كلكم كده ليه كلكم خاينين ؟
وكمل بتهديد:
_لعلمك بقى مش بمزاجك تبدئيها ومش بمزاجك تنهيها يا هتطلبي منه الطلاق ونتجوز يا اما ههد المعبد على دماغك ودماغي ولا انتي تستريحي ولا انا استريح ،
ما يرضيش ربنا اللي احنا عملناه وما يرضيهوش برده انك تعلقيني وتخليني احبك وقلبي يتعلق بقلبك وتسيبيني وتمشي .
ضربت زهره على رجليها بخوف ورعب وقالت له :
_هنت عليك تهددني يا معتز !
زي ما كنت راجل معايا على طول كمل رجولتك للنهايه وسيبني اعيش لبيتي وجوزي واولادي واعتبرني زي اي حاجه مرت في حياتك واخذت وقت قصير معاك ومشيت غصب عنها ،
ارجوك يا معتز ما تدمرنيش وتدمر بيتي وتدمر حياتي خليك راجل معايا وقويني وقوي حالك علشان خاطر اللي احنا عملناه ما يصحش ابدا وربنا سترها علينا خليه يكمل ستره واللي بينا يندفن تحت التراب وما حدش يعرف عنه حاجه ونتوب لأن احنا ذنبنا كبير قوي قوي وذنبي انا اكتر .
بكى معتز ولاول مره يبكي لانه فعلا حبها واتعلق بيها وقال لها وهو بيبكي :
_هنت عليكي علشان جوزك رجع وبقيتي في حضنه نسيتي معتز اللي احتواكي وقت ما كنت مش لاقيه الحنيه ،
هنت عليكي تدوسي على قلبي ومشاعري بالطريقه دي علشان خاطر بقيت كارت محروق ومليش لازمه واللي اولى بيكي رجع وانا الدخيل اللي في حياتك اللي حبك من كل قلبه واداكي كل وقت وحنيته ترميه ورا ظهرك .
طريقته اللي كان بيتكلم بيها ودموعه كانت بتقطع في زهره وحسستها انها فعلا كانت احقر بني ادمه على وجه الارض ،
وفضلت تستسمحوا وتتحايل عليه لحد ما قال لها :
_انا هسيبك يا زهره مش هاذيكي ولا عمرك هتسمعي صوتي تاني ولا هتشوفي طيفي تاني بس قبل ما اقفل هقول لك حسبي الله ونعم الوكيل فيكي مش مسامحك ليوم الدين على قلبي اللي علقتيه وعلى وعودك ان احنا هنبقى لبعض في لحظات ضعفك .
