حب غير مسموح الجزء الأول بقلم دارين الاطرش

الحلقة الاولي

شمس بنت جميلة ف اوائل العشرينات نايمة ومستغرقة ف النوم ومرة واحدة المنبه بيضرب بصوت عالي اوي الساعة 8 الصبح
شمس تصحي وهي بتتاوب وتقفل المنبه
شـمـــس:ايه يا ربي القرف ده بس!! توب علينا يا كرييم
وتقوم بسرعة علي اوضة سلمي ورضوي
شـمـــس:اصحوا يلا عندكوا جامعة ومدرسة
سلمي:طب سبيني انام شوية ونبي يا شمس
شـمـــس:لا يا حبيبتي الصحيان من النوم والجامعة والشغل مفيهاش يامه ارحمني
رضوي:يامه ارحمينا بقي من الموشح بتاع كل يوم هو انتي خلاص اعتبرتي نفسك امنا؟ ده انا ساعات بنسي انك اختنا الكبيرة
شـمـــس:بت انتي وهي مش عايزة وجع دماغ انا كده هتاخر علي شغلي وورايا شغل وقرف وبهدلة متتعبونيش يلا كل واحده ف ظرف ربع ساعة تكون جاهزة عبال ما احضر الفطار ده ايه الغلب ده ياربي!!
سلمي ورضوي يحطوا الغطا تاني علي وشهم
شـمـــس:انا اتاخرت علي شغلي ومش حمل الرزالة دي قوموا بدل ما اقسم بالله…….
رضوي وسلمي يقوموا بسرعة مرة واحدة
“خلاص خلاص قايمين اهو”
شـمـــس:وانتي يا موكوسة يالي ف تانية اداب مش هتصحي!!
سلمي بغيظ:قايمة يا شمس قايمة يا حبيبتي
شـمـــس:ماشي
شمس تروح تحضر الفطار بسرعة
سلمي تخرج لابسة هدومها هي ورضوي
شـمـــس:يلا الفطار جاهز
سلمي:لالالا مفيش وقت انا متاخرة
و تبوسها و تمشي بسرعة
شـمـــس:وانتي يارضوي؟
رضوي:لا انا كده هتاخر علي المدرسة انا اولي ثانوي السنادي…….. بااااي
و تبوسها علي الخد التاني و تمشي رضوي
شـمـــس:باي؟؟؟؟ونبي ما انتو فالحين ف حاجة
———————————–
ف بيت نادر
نادر:يا معتز!!اصحي يا معتز ……يا ماجد!!!…. ما تصحوا بقي
ماجد يخرج من الاوضة وهو بيتاوب
“ايه الغاغة الي انت عاملها دي يا نادر؟”
نادر:يعني مش عارفين ليه؟؟ انت هتتاخر علي جامعتك وهو هيتاخر علي مدرسته……..دي عيشة تقرف ارحموني ورايا شغل
ماجد وهو بيتوب:طب اهدي بس متزعلش نفسك الدنيا مش هتطير
نادر:اقولك!! عنكوا ما صحيتوا ولا روحتوا جامعة ولا مدرسة ادي الفطار اهو وانا رايح شغلي دي حاجة تقرف
ويخرج نادر ويرزع الباب وراه
ويصحي معتز ويخرج للصالة
“هو بيزعق ليه علي الصبح؟”
ماجد:يعني هي جديدة عليه مهو ده الموشح بتاع كل يوم ….امال لو مكنش اخونا الكبير كان عمل ايه؟
معتز:بص ادام خرج يلا نكمل نوم بلا جامعة بلا مدرسة بلا قرف
باسم:يلا
نادر يفتح الباب فجأة
نادر بصوت عالي وعصبية:لسه ملبستوش؟؟
ماجد ومعتز بفزع:حاااضر
———————————–
شـمـــس واقفة مستنية الاتوبيس ويرن موبايلها
و ترد شمس علي الموبايل
شـمـــس:الوووو ايوة يا خالو ازيك؟
خالها:الحمدلله وانتي اخبارك ايه انتي وسلمي ورضوي ؟
شـمـــس:الحمدلله ماشي الحال
خالها:ينفع اجيلك زيارة انهارده بليل
شـمـــس:خير؟
خالها:خير ان شاء الله…يعني ……….ف الواقع……..
شـمـــس باشمئزاز:آآآآآآآآآآآه يعني ؟؟؟وفي الواقع؟؟؟؟ يبقي جايبلي عريس……صح؟؟
خالها باندهاش:ايه ده؟عرفتي منين؟
شـمـــس بسخرية:مهي واضحة زي الشمس …..يعني ..وفي الواقع وعمال تلئلئ يبقي اكيد ف مصيبة سوداء من المصايب الي بتجبهالي
خالها:حرام عليكي انا عمري جبتلك مصايب؟
شـمـــس:انت عمرك ما جبت غير المصايب يا خالو ….اهييييي هنضحك علي بعض بقي !!
خالها:اطمني المرة دي ان شاء الله خير ومش هنخرج من باب الشقة الا……
شـمـــس مقاطعة بسخرية:عارفة عارفة متكملش ونبي حفظاها,مش هنخرج من باب الشقة الا واحنا سامعين زغروطة تهد البيت,يخربيت ام الزغروطة الي مش عايزة تيجي دي ياخالو
خالها:لا المرة دي بقي عريس مضمون
شـمـــس:يا خالو حرام عليك ارحمني قولتلك 100 مرة انا مبفكرش ف الجواز دلوقتي انا ورايا مسؤليااااات
خالها:يابنتي مينفعش ترفضي الي بيتقدمولك وتوقفي حالك علشان اخواتك….هما يعني كانوا اطفال رضع ؟؟؟دول بسم الله ماشاء الله كبار وعاقلين
شـمـــس باستسلام:ماشي يا خالو حاضر
خالها:هااا يعني اجي واجيب العريس؟
شـمـــس:ماشي…اديني نبذه مختصرة كده عنه بسرعة علشان الاتوبيس جي
خالها:اسمه يوسف وعنده 28 سنة
شـمـــس:حلو ….يوسف و28 سنة انا متفائلة
خالها:مش بقولك لقطة
شـمـــس:طب هو بيشتغل ايه؟
خالها:معرفش بصراحة
شـمـــس:ماشي ….الاتوبيس جه …..سلام
خالها:سلام
وتغلق شمس الخط
شمس ركبت الاتوبيس اول ما وصل وطبعا اتمرمطت وسط الزحام
———————————–
نادر وصل الشغل وقعد علي مكتبه مع زمايله
نادر بتنهيد:صباح الخير
الموجودين:صباح النور
احد زمايله:ايه نموسيتك كحلي ولا ايه؟
نادر:لا وانت الصادق حياتي كلها الي كحلي يا عمرو
عمرو:ليه بس؟؟تقصد يعني علشان اخواتك وكده؟
———————————–
شـمـــس:لا مش اخواتي بس حاجات كتير اوووي انا خلاص قرفت وتعبت من ساعة ما بابا وماما ماتوا وانا الي شايلة الطين علي دماغي وساكتة
رنا:معلش انتي طول عمرك متحملة ايه الي جد يعني؟
———————————–
نادر:الي جد بقي ان كل لما بيكبروا مشاكلهم بتزيد اكتر واكتر
عمرو:معلش اتحمل انت قدها ومتنساش انك اخوهم الكبير ….انت اخوهم الكبير يا نادر
———————————–
شـمـــس:يوووووووووووو انا اتخنقت من الكلمة دي خلاص عارفة ان انا اختهم الكبيرة ليه بتفكروني
رنا:انا عايزة افهمك بقي انك مش لوحدك الي بتعاني عادي كلنا ف الهوا سوا
شـمـــس:ياربي بقي ارحمني ياارحم الراحمين
———————————–
رضوي ف المدرسة ف الفسحة
نرمين:بقولك يا رضوي
رضوي:نعم؟
نرمين:ايه رايك ف الواد المز الي هناك ده؟؟
رضوي:بقولك ايه انا مليش ف الكلام ده
نرمين:ايه انتي بتخافي من اختك ولا ايه؟
رضوي:انا مبخفش من حد
نرمين:يابنتي اتنصحي شوية
رضوي:الي هو ازاي بقي؟
نرمين:يعني اعرفيلك ولدين 3 واتصحبي عليهم وكده
رضوي:لالالالا ده كانت شمس تموتني
نرمين:شوفتي!! انا مجبتش حاجة من عندي
رضوي:بقولك ايه؟؟ قفلي بقي ….عندنا مين الحصة الي بعد الفسحة؟؟
نرمين:استاذ عماد شلبي
رضوي:ماشي يلا بينا نطلع الفصل مليش مزاج اتمشي ف الحوش اكتر من كده
نرمين:يلا يا عقد ابقي خلي اختك تنفعك
———————————–
شمس ف شغلها وهي بتتكلم مع رنا والمدير يدخل
المدير:ايه سايبن شغلكوا وبتتكلموا؟
رنا:اسفين يا بسيوني بيه
المدير وهو بيبص ل شمس باهتمام
“صباح الخير ياانسة شمس”
شمس وهي مش طايقاه بابتسامة صفرا
“صباح النور يا بسيوني بيه”
بسيوني بهمس وابتسامة كلها برود:انتي اتاخرتي انهارده بس متقلقيش انا مش هخصملك انتي عارفة انا بعزك قد ايه!
شـمـــس بصوت عالي وحدة:بسيوني بيه!!……من فضلك انا عندي شغل ومش فاضية واذا كان علي التاخير فاانا اسفة مش هتكرر تاني…عايز تخصملي مفيش مشاكل
بسيوني يحس انها احرجته ويبتدي يتكسف
“احم احم طيب ياانسة شمس اتفضلي كملي شغلك…عن اذنكوا”
شـمـــس:اوووووووووف
رنا:ياباااااااااي انا مش شوفتش ارزل من كده
شـمـــس:مين سمعك انا خلااااص علي اخري من البني ادم ده هو مش حاسس بسنه ده عنده عيال قدي
رنا:انا مش فاهمة هو شايف نفسه كده علي ايه؟؟بذمتك ف بني ادم ف الدنيا يبقي اسمه “بسيوني خليفة” ههههههههههه
شـمـــس:هههههههههه
———————————–
نادر ف عمله قاعد علي المكتب وبيشغل
عمرو:بقولك ايه؟
نادر:ايه؟
عمرو:ماتتجوز يااخي
نادر:هههههههههههه ضحتكني وانا مكنش ليا نفس
عمرو:وايه الي بيضحك يعني؟
نادر:يا مؤمن اتجوز ازاي ؟؟انا من ساعة ما ابويا وامي ماتوا وانا الي شايل اخواتي شيل .. ده انا ورايا هم ما يتلم
عمرو:محسسني انك كبير العيلة ورب اسرة ياعم انت يادوب عندك اتنين اخوات بتصرف علي تعلميهم وكلها كام سنة يتخرجوا ويشتغلوا ويتجوزوا كمان
نادر:عارف بس مين بقي الي ممكن تقبل بظروفي المهببة دي؟
عمرو:البنات علي قفا من يشيل وانت بسم الله ماشاء الله مهندس كمبيوتر قد الدنيا وزي القمر
نادر:ربنا يسهل الاقي بس عروسة
عمرو بثقة:عروستك موجودة
نادر وهو بيشرب القهوة وهسيبها بسرعة
“مين؟؟؟؟؟”
عمرو بابتسامة وفخر:اخت المدام
نادر بقلق:آآآآآآآآآآآآه ودي بيني وبينك يعني اخبارها ايه؟
عمرو:ما تلم نفسك يااخي بقولك اخت المدام
نادر:طيب وتفتكر توافق بيا
عمرو:مؤكد …..ها قولت ايه اخدلك معاد؟؟
نادر بقلق:بس….
عمرو مقاطع:تمام هخدلك معاد
ويقوم يسلم عليه
نادر حس انه ادبس وقلق من كلام عمرو وطريقته
نادر ف سره:وانا هقلق من ايه بس؟؟ ما يمكن تطلع كويسة
———————————–
شمس راجعة من الشغل الساعة 6 وتلاقي خالها مصطفي ف وشها ادام باب الشقة
شمس:ايه ياخالو خضتني حرام عليك
مصطفي:معلش مكنتش اقصد
شمس:خير فيه ايه؟
مصطفي:خير ايه؟انتي نسيتي ولا ايه؟؟؟مش قولتلك جي وجايب عريس
شمس:آآآآآآه طيب ماشي هو فين؟
مصطفي:سلمي ورضوي فين؟
شـمـــس:جوه,اكيد كل واحدة رجعت من بره
مصطفي:تمام هو مستني تحت
شمس:ومطلعش ليه؟
مصطفي:بيتكسف
شـمـــس بصوت عالي:يااااا اخيرا جبتلي حد عنده دم
مصطفي بهمس:وطي صوتك ليسمعك
شـمـــس:ماشي قوله يجي ودخله اما نشوف المرة دي جايبلنا ايه؟
مصطفي بفخر:جايبلك السعد والوعد يابنت اختي وهتشوفي
شمس بصبر ومكر:ماشي يا خالو
مصطفي:ادخلي طيب وانا هطلعه واجي
شمس:ماشي
شمس تدخل الشقة وتحط شنطتها وتظبط نفسها ف المراية والباب يخبط
شـمـــس وهي رافعة ايديها:ياااارب
واول ما تفتح الباب هتلاقي………………………………………