نفوس قاسية الجزء الثالث
نظرت له سهر وقالت:
– بلاش انفعال يا محمود أنت عايزنا نبقى فالشقة معاك أنت وعروستك ليلة فرحك تيجي أزاي يعني.
جلس محمود على طرف فراشها وقال:
– أنا مقدرش يا سهر هبقى خايف وقلقان عليكم مقدرش على الموضوع ده يا سهر ده أنا برفض أترقى فشغلي علشان مرجعش القاهرة تاني وأسيبكم.
حاولت سهر أن تقترب من محمود لتُفاجأ نفسها بربتها على كتفه فحدق بها بصدمة فرسمت ابتسامة اطمئنان على وجهها وقالت:
– متخافش علينا يا محمود ولما ترجع من أسبوع العسل نبقى نشوف موضوع الترقية ده كمان اللي مخبيه علينا وحياتي يا محمود حاول تفرح بقى.
اختطف محمود يدها وقبلها لتسحبها سهر بخوف وابتعدت عنه وهي تقول:
– يلا بقى يا محمود الوقت هيعدي وكده هتتأخر على عروستك.
—————
وقف آدم يتطلع إلى موج البحر من نافذة غرفته بالفندق فها هو في الإسكندرية منذ أسبوع لينهي بعض أعمال شركته ليتعطل حينما ابلغه مندوب الشركة التي سيعقد معها اجتماعه بغياب أحد المحاسبين لزواجه مما اضطره ليؤجل سفرة ليرحب بتلك العطلة بين أحضان البحر والسماء، طرق مازن باب غرفته ودخل يبتسم ويقول:
– هتيجي معانا نسهر ولا هتفضل مستني هنا يا عم إسكندرية بالليل حاجة تانية تنسيك نفسك.
ابتسم آدم وقال:
– هاجي يا زنان قال وبتقول على الغلبان دومي حبيب قلبي هو اللي بيزن يلا يا مازن أنا مش عارف ليه حاسس أني عايز أخرج النهاردة.
جلس مازن بجانب هايدي وجلس آدم بعيدًا عنهم يحمل الصغير ويلاعبه فنظرت له هايدي وهمست لمازن وقالت:
– هو آدم مش ناوي يتجوز هيفضل كدا عايش لوحده ما تكلمه يا مازن حرام العمر اللي بيضيع منه ده.
زفر مازن بضيق وقال:
– لسه متخانق معاه من يومين بسبب الموضوع ده قلت له رافض بيقول مبيفكرش فالجواز نهائي قافل قلبه وحياته عليها هي وبس ومحمل نفسه ذنب أنها ضاعت منه وأظن أنتِ عارفة ليه بسبب اللي عملتوه فيه أنتِ كنتِ أزاي بالجبروت ده يا هايدي جالك قلب أزاي تساعدي بابا على اللي عمله فيه.
همست هايدي وهي على وشك البكاء:
– مش عارفة أنا عملت أزاي كده أنا كنت عايزة انتقم منه لما رمى فوشي صوري معاك وقال أنه خلاص هيتجوز سهر وأنه رايح يعلن أسلامه، محستش بنفسي ألا وأنا بنفذ كل اللي طلبه والدك، دخلت مكتب عصام وحطيت ورق التنازل فالملف اللي كان مجهزه علشان يمضيه من غير ما حد يعرف، واتصلت بقرايبه فعاليا وبلغتهم باللي هيعمله وتاني يوم كان والدك بعت اللي أخده متخدر وسافر كطرد دبلوماسي من السفارة، أنا عارفة اللي عملته لا يمكن يسامحني عليه أبدًا بس اللي عمله والدك فيا لما عرفت أنهم حبسينه وبيعذبوه رفضت ووقفت أدامه وهددته أني مش هديله التنازل إلا لما يسيب آدم، لكن متوقعتش أنه هيروح لعمي فأسيوط ويوريله الصور وعمي متوصاش لأنه طول عمره كاره أني خرجت عن طوعه ورفضت ابنه رد فيا كل حاجة عملتها فآدم أضعاف أنا عمري ما هنسى لما حبسني مع ستات البلد يكشفوا عليا وحتى بعد ما أكدوا له أني بنت حفرلي قبر فبدروم بيته وحطني فيه لولا أنك وصلت لي كان زماني مت، أنا بتمنى أكفر عن اللي عملته فآدم بس يا ريت يسامحني.
