وعاد من جديد الجزء الثاني بقلم أحزان البنفسج
الفصل الرابع
ذهب حازم بصحبه والدته الى المسجد
جلسا يستمعان الى الخطبه … وبعدما انتهيامن الصلاة فضل والده على ان يسيرا قليلا معا
رأفت: والله وحشنى المشى معاك يا حازم
حازم بضحكة: يابابا انا عجزت شويه وهتلاقينى وقعت منك
رأفت: ولما انت عجزت انا أبقى إيه… موميا مثلا
حازم: لا بعد الشر عنك يا بابا.. ربنا يطولنا فعمرك … بس خلاص يا بابا رجلى مبقتش مسعدانى
رأفت: يابنى دا انت واحدو تلاتين سنه يعنى لسه شباب وبصحتك … ورجلك زى الفل .. انت اللى بتدلع
حازم ضاحكا: كده يارأفت ؟… ماشى
ضحك رأفت: قولى بقى هتعمل إيه فشغلك؟… وقاعد ولا مسافر المانيا تانى
حازم: والله يابابا ..بفكر ابقى بين هنا وهناك … يعنى عاوز افتح مكتب استشارات تجاريه هنا … وافضل فالتدريس هناك
رأفت: مش تعب دا يابنى؟… نفسى تستقر هنا بقى وتتجوز وافرح بعيالك قبل ما اموت
حازم: بعد الشر عنك يابابا …. م كفياك كلام من النوع دا بقى بدال ما اسلط عليك مديحه
رأفت: هههههههه والله ما حد هيسلط عليك مديحه غيرى… فكر يابنى تستقر بقى هنا.. مش كفايه عشر سنين بنشوفك فيهم زى الضيف… وبتجرى اول ما الاجازة تخلص وكأنك بتهرب من حاجه
صمت حازم وكأنه شعر بما يلمح به والده
حازم: ماتيجى نروح بقى يا رأفت … نلحق الغدا يعنى
رأفت: ماشى … نفوت دى … يلا ياسيدى نروح البيت
* * * *
لم تدرى ميار الى متى ظلت نائمة ..كل ما تعلمه ان هناك طرقات تريد نزعها من نومها
صوت ينادى بإسمها وهى تابى التحرك
حازم: ميار
فالبدايه لم تميز ميار الصوت
ميار بصوت نائم: عشر دقايق ياعمتو بالله عليكى وهقوم
حازم: قومى يا ميار انا حازم … اصحى
تململت قليلا ثم انتفضت فجأة لتجده يقف داخل غرفتها
ميار وصوتها لازال نائما: انت بتعمل إيه فأوضتى؟…
حازم: ماما قالتلى اصحيكى قبل ما انزل من اوضتى
ميار بتبرم: ومش اللى يصحى حد يخبط الاول؟
حازم: اخبط؟… انا كان باقيلى شويه وهكسر الباب… انتى كنتى نايمه ولا مغمى عليكى
لم ترد فقط وضعت يدها فوق راسها للتتأكد ان شعرها ليس ظاهرا
حازم: انتى اخدتى المهدئ يا ميار؟…
ميار: لا ما اخدتوش
نظر لها لحظة وكأنه يتأكد ان كانت كاذبه ام صادقه
حازم: طيب يلا عشان الغدا جاهز
ميار بذعر: غدا؟.. ليه هى الساعه كام ؟
حازم: الساعه إتنين ونص.
ميار: يانهار ابيض.. انا ماسمعتش أذان الظهر أصلا ولا صليت لدلوقتى …انا نمت كل ده …
