اهواك ولن انساك فاطيما يوسف

بسم الله الرحمن الرحيم
لا اله الا الله وحده لا شريك له له الملك وله الحمد يحيي ويميت وهو علي كل شيء قدير

قاعد ماهر مع شريكه في الشركة فبيتكلم محمد شريكه وبيقول بحزن :

_ البنت بنتي مغلباني اوي ياماهر من ساعه مارجعت من عند مامتها من كندا وهي مطلعه عيني خروج وسهر وفسح وحياتها كلها عايشاها علي نمط حياة الغرب في لبسها وفي تحررها مامتها دلعتها زيادة عن اللزوم ونفسيتي تعبت مبقتش قادر عليها .

ضيق ماهر عنيه وقال له بإستغراب:
_ إزاي ده ياباشا ده نص حياتها مقضياها معاك هنا وكانت كيوت خالص انا مشفتهاش تقريباً من ساعه ماكانت في تانيه إعدادي .

رد عليه محمد بحزن :

_ لا يا ماهر يابني دي مبقتش خالص البنت اللطيفه الكيوت اللي إنت تعرفها دي بقت حاجه تانيه خالص قعادها مع والدتها السنين اللي فاتت دي كلها غيرها وخلاها واحده مش شايفه غير نفسها وبس طبعتها بطبع الغرب وعوايدهم وتقاليدهم وخلاص انا اعصابي تعبتني ومش عايز اضغط عليها اكتر من كده لا تسيبني وترجع لها تاني ،

وفي الاخر انا اللي هندم .

قعد ماهر يفكر هو وابوها هيعمل معاها ايه ويطرحوا حلول مع بعضهم لحد ما قال ماهر لابوها باقتراح :

_طب ما تجوزها لراجل يكون شديد شويه ويعرف يتعامل معاها ومع طريقتها مره باللين ومره بالشدة وكمان تضمن انها مترجعش تعيش برة تاني ولا ترجع لحياتها اللي هتدمرها دي .

برق محمد عينيه وقعد بيفكر في الفكره ويطرحها في دماغه يمين وشمال وتقريبا الفكره عجبته جدا ،

وبص على ماهر وقال له بتساؤل :

_فكرتك حلوه قوي يا ماهر بس مين ده اللي هروح اقول له اتجوز بنتي ؟

كمان انا مش عايزه اديها لاي حد انا عايز واحد يحتويها ويعرفها ويعلمها بدون ما يأذيها نفسيا ويعقدها ،

هي مهما كانت بنتي وما لهاش ذنب في اللي هي وصلت له الذنب ذنب امها اللي عملت فيها كده ووصلتها للمرحله السيئه دي غير انها مقتنعه كمان بان بنتها ما فيهاش اي حاجه وان هي اللي طورتها وفهمتها الدنيا .

ضيق ماهر عينيه بتعجب وقال له :

_عايز تفهمني يا باشا ان والدتها لما انت كلمتها مش معترفه بالمرحله اللي وصلتها لبنتها ومش في دماغها اصلا !

انت كده يا باشا المفروض ما توديهاش لمامتها تاني لان اللي هيتصلح هيرجع تاني اسوء من الاول فلازم تبعدها تماما عن جو والدتها خالص علشان تبقى ميه ميه .

حرك محمد راسه بموافقه على كلام ماهر لان كل كلامه صحيح لازم فعلا يبعدها خالص عن جو والدتها علشان خاطر ما ترجعش للقرف اللي هي عايشه فيه ده تاني ،

وفاجأه خطرت على باله فكره وقالها لماهر بسرعه :

_طب ايه رايك يا ماهر تتجوز جنه وتكسب في عمك محمد ثواب والله جنه بنتي جميله وذكيه بس مامتها حولت ذكائها ده من حاجه تنفعها لحاجه تضرها ،

وكمل كلامه وهو بيشرح له باستفاضه:

_حتى لو تتجوزها على الورق وتعمل اللي انا مش قادر اعمله وبعد كده لو ما استريحتش معاها طلقها يا ابني وانا مش هزعل بس اسمي عملت اللي عليا وانا مش هثق في حد قد ما بثق فيك .

انصدم ماهر من عرض محمد اللي كان ولا علي باله ولا على خاطره ولسانه اتلجم وما عرفش ينطق يقول ايه علشان ده جواز مش اي حاجه وبعد فتره سكوت قال له بحيرة:

_ والله انت فاجئتني يا باشا وانا يعز عليا ارفض لك طلب بس برده ده جواز ومسؤوليه وحياه تانيه خالص فاديني فرصه افكر وايا كان قراري طبعا احنا مش هنزعل من بعض انت زي ابويا وانا ما اقدرش اختلف معاك في اي حاجه .

طبعا كان محمد عرف ان ده هيبقى رايي ماهر لان ماهر من النوع اللي بيحب يحسب للخطوه كويس جدا قبل ما يتقدم لها فقال له بشرود وحزن :

_ايا كان قرارك يا ابني فانا عمري ما ازعل منك ولا اشيل لان ده جواز وما فيهوش اجبار حتى لو كان على الورق بس هي جوازه وهتتحسب عليك بس حطه في اعتبارك ان انت بموافقتك هتقدم لي جميل عمري ما هنساه لك لان زي ما قلت لك كده ما اقدرش اثق في حد غيرك ادي له بنتي .

وفضلوا الاثنين يتكلموا مع بعض ويتشاوروا في الموضوع ده لحد ما قام ماهر وهو بيقفل زرار بدلته وقال باستئذان وادب :

_تمام يا باشا انا هستاذن انا بقى وان شاء الله اللي عايزه ربنا هيكون ومش عايزك تزعج نفسك وتقلقها ربنا سبحانه وتعالى عليه التدبير وباذن الله مش هيضرك فيها .

امن محمد على كلامه وسابه ماهر ومشي وهو قعد شويه يشتغل في المكتب وبعدين بص في الساعه لقى الوقت متاخر فروح على البيت على طول وكالعاده لقى جنه مهاش موجوده في البيت فاتصل عليها بالتليفون ولما ردت عليه قال لها بغضب :

_انتي فين يا هانم ايه اللي مخليكي لحد الساعه 11:00 بالليل بره مش هتبطلي بقى السهر والسكر اللي انتي فيه ده ؟!

ردت عليه جنه بتأفف وقالت له :

_هو انت كل يوم ما عندكش غير الكلام في الموضوع ده يا بابي فيها ايه يعني لما اخرج واسهر واعيش حياتي زي اي بنت في سني الموضوع مش اوفر يعني زي ما انت مأفور وكده،

ما انا معايا بنات وعايشين في مصر ما كانوش عايشين في بلاد اوروبيه وبيخرجوا معايا وبيسهروا وعايشين تمام يعني

ما حدش بيقول لهم رايحين فين ولا جايين منين ولا باباهم ولا مامتهم بتتصل بيهم اصلا ما فيش غيرك اللي محبكها عليا ومقفلها عليا خالص ،

انا كده هرجع اعيش مع مامي واخرج على كيفي وارجع على كيفي .

هدى محمد من تعصبه وتوتره علشان خاطر ما يخوفهاش منه وقال لها بطيبه :

_كل ده علشان بقول لك ترجعي بدري علشان انت وحشاني وما بشكش في اخلاقك لا سمح الله بس كل اللي انا طالبه منك يا جنه انك تراعي ان ابوك راجل من اصل صعيدي وبيغير على اهل بيته جدا وخاصه بقى لما تكون بنته مش اي حد،

يلا يا حبيبه بابي انا مستنيكي ترجعي علشان نتعشى مع بعض ولا انا ما وحشتكيش ؟

جنه صعب عليها تحايل باباها عليها هو مهما كان باباها بتحبه جدا بس هي مدلعه شويه وردت على باباها وقالت له بموافقة:

_حاضر يا بابي انا جاي اهو وما تزعلش مني لو انا اتعصبت عليك يلا انا جاية في السريع يا حبيبي .

وقفلت جنه معاه وروحت على البيت واتعشت مع باباها وراضته وعدوا اليوم بسلام ،

وعدى كذا يوم على كلام ماهر ومحمد مع بعض ماهر لسه بيفكر وما ردش عليه وده طبعا قالق محمد لكن هو مدي له فرصته،